Ezila 8 - IBAYIBOLO 2024

Abantu banyokako kubukayidi

¹ Aba bo balongozi abamunyumba babo bakaba kubukayidi mu Babiloni, sona babo bakanyokela ku Yelusalemu poka nu Ezila, bo u mwene u Alitakiselesesi akulaghila:

² Abaluko ulwa Finehasi nulwa Gelishoni nulwa Itamali nulwa Daniyeli nulwa Devedi nulwa Hatushi

³ nulwa Shekaniya nulwa Paloshi nulwa Zekaliya sona na bantu 150 babo bakasimbiwa poka nawe.

⁴ Abaluko ulwa Pahati Mowabu nulwa Eliyehoyenayi umwana uwa Zelahiya, poka na bantu 200 babo bakaba nawe.

⁵ Abaluko ulwa Zatu nulwa Shekaniya umwana uwa Yahaziyeli poka na bantu 300 babo bakaba nawe.

⁶ Abaluko ulwa Adini nulwa Ebedi umwana uwa Yonatani poka na bantu 50 babo bakaba nawe.

⁷ Abaluko ulwa Elamu nulwa Yeshaya umwana uwa Ataliya poka na bantu 70 babo bakaba nawe.

⁸ Abaluko ulwa Shefatiya nulwa Zebadiya umwana uwa Mikayeli poka na bantu 80 babo bakaba nawe.

⁹ Abaluko ulwa Yowabu nulwa Obadiya umwana uwa Yehiyeli poka na bantu 218 babo bakaba nawe.

¹⁰ Abaluko ulwa Bani nulwa Shelomiti umwana uwa Yosifiya poka na bantu 160 babo bakaba nawe.

¹¹ Abaluko ulwa Bebayi nulwa Zekaliya umwana uwa Bebayi poka na bantu 28 babo bakaba nawe.

¹² Abaluko ulwa Azigadi nulwa Yohanani umwana uwa Hakatani poka na bantu 110 babo bakaba nawe.

¹³ Abaluko ulwa Adonikamu, aba bumalilo nkani, babo amatabwa ghabo ghakaba gho agha: U Elifeleti nu Yeweli nu Shemaya poka na bantu 60 babo bakaba nawe.

¹⁴ Abaluko ulwa Bigivayi nu Utayi nu Zakuli poka na bantu 70 babo bakaba nawe.

U Ezila akubasala aba Levi aba mu Nyumba iya Chala

¹⁵ Nkababungannya bosi poka pampindulila yiyo yikinjila mu Ahava sona tukikala muvisakasa amasiku matatu palapala. Po nkagha ukuti pakasi pabantu bala pakabapo abaputi, loli patakabapo aba Levi.

¹⁶ Po nkamwitizya u Eliyezeli nu Aliyeli nu Shemaya nu Elinatani nu Yalibu nu Elinatani nu Natani nu Zekaliya nu Meshulamu, babo bakaba balongozi nu Yoyalibi nu Elinatani, babo bakaba bantu abamahala,

¹⁷ po nkabatuma kwa Ido, yuyo akaba mulongozi uwamu Kasifiya. Nkababuzya izyakuti bamubuzye u Ido na bamwabo na babombi aba mu Nyumba iya Chala mu Kasifiya, umwakuti batutumile abambombo ku Nyumba iya Chala witu.

¹⁸ Pachifukwa ichakuti u Chala akatupelela ichisa, bakatutumila u Shelebiya, umuntu uwamahala, uwaluko ulwa Mahili umwana uwa Levi, umwana uwa Izilayeli na bana abalumendo aba Shelebiya na bawamwabo poka na bantu 18

¹⁹ nu Hashabiya poka nu Yeshaya abaluko ulwa Melali na bawamwabo na bipwa bache poka na bantu 20.

²⁰ Bakiza sona na babombi aba mu Nyumba iya Chala 220, babo u Devedi na makambala ghache bakabasala ukuti babavwanje aba Levi. Bosi banaba bakasimbiwa ukuyana na matabwa ghabo.

²¹ Palapala pampindulila iya Ahava nkafumusya ukuti abantu batuzye pakulya, umwakuti twiyisye pamaso pa Chala witu nukumulaba ukuti aswe na bana bitu poka nu katundu wesi ukuti tubanje nu bulendo ubwiza.

²² Nkaba ni soni pakumulaba u mwene ukuti atupe abasilikali na bantu abakukwela pafalasi ukuti batuvighilile muzila kubalwani bitu, pachifukwa ichakuti tukamubuzya u mwene ukuti, “U Chala witu akumusaya umuntu wesi yuyo akumusubila, loli akumukalalila umuntu wesi yuyo akumukana.”

²³ Tukatuzya pakulya nukumulambilizya u Chala witu ukuti atuvighilile, po akivwa ulwiputo lwitu.

²⁴ Nkabasala abaputi abasongo 12 poka nu Shelebiya nu Hashabiya na bawamwabo 10.

²⁵ Po nkabapimila usiliva nu golide ni vibombelo vivyo u mwene na makambala ghache na balongozi sona naba Izilayeli bosi babo bakaba palapala bakabika ukuti vibanje vyakwiyipa mu Nyumba iya Chala.

²⁶ Nkabapimila amatani 22 agha siliva ni vibombelo amakilogalamu 70 agha siliva sona na makilogalamu 3,400 agha golide

²⁷ ni mbale 20 izya golide ubwakung'wama amakilogalamu 8 nu hafu ni vibombelo vibili ivya mukuba umwenecho, ubwakunyezimila nkani ni vyamutengo ivyakuyana nu golide.

²⁸ Nkababuzya nkati, “Amwe mwe bapaghuliwa kwa Mwene poka ni vibombelo ivi. Usiliva nu golide cho chakwiyipa icha bwighane kwa Mwene, u Chala uwa banyenya binyu.

²⁹ Muvisungaye akiza mupaka muvipime muvipinda ivyakusungilamo ukatundu mu Nyumba iya Mwene mu Yelusalemu pamaso pa baputi abasongo naba Levi na balongozi abanyumba izya Izilayeli.”

³⁰ Po abaputi naba Levi bakapokela usiliva nu golide ni vibombelo ivipaghuliwa vivyo vikapimiwa ukuti bavibikaye mu Nyumba iya Chala witu mu Yelusalemu.

³¹ Pisiku ilya 12 mumwezi uwakwanda tukepapo pampindulila iya Ahava, po tukabuka ku Yelusalemu. U Chala witu akatupelela ichisa, po akatuvighilila kubalwani bitu nakumavyondongo muzila.

³² Bo twafika mu Yelusalemu tukatuzya amasiku matatu.

³³ Pisiku ilyafolo tukabuka mu Nyumba iya Chala witu, po kulakula tukapima usiliva nu golide ni vibombelo ivipaghuliwa nukuvibika munyobe izya Melemoti umwana uwa umuputi u Uliya. U Eleyazala umwana uwa Finehasi akaba poka nawe nu mu Levi u Yozabadi umwana uwa Yeshuwa nu Nowadiya umwana uwa Binuyi.

³⁴ Ivintu vyosi vila vikabelengiwa nukupimiwa, po ubung'wama bwache bosi bukasimbiwa pakabalilo kalakala.

³⁵ Po abantu babo bakanyokako kubuzya bakabika ivyakwiyipa ivyakocha kwa Chala uwa Izilayeli. Ivyakwiyipa vinivi vikaba vyo ivi: Inkambaku 12 ukuti zibanje izya ba Izilayeli bosi na badubi 96 nu twadubi 77 sona na basabwe 12 pakuba chakwiyipa ichakupepesezya imbibi. Vyosi vinivi vikaba chakwiyipa ichakocha kwa Mwene.

³⁶ Bakasenda ukalata yuyo akafuma kwa mwene nukughapa amakambala, na balaghili aba kwisila ilya lusoko ulwa Yufuleti, babo bakabavwa abantu, ni Nyumba iya Chala.