Ezila 7 - IBAYIBOLO 2024

Ezila abuka ku Yelusalemu

¹ Bo pachilapo amaka aminji nkani sona bo u mwene u Alitakiselesesi uwa Peleziya akulaghila, pakabapo umuputi yumo u Ezila umwana uwa Selaya, umwana uwa Azaliya, umwana uwa Hilikiya,

² umwana uwa Shalumu, umwana uwa Zadoki, umwana uwa Ahitubi,

³ umwana uwa Amaliya, umwana uwa Azaliya, umwana uwa Melayoti,

⁴ umwana uwa Zelahiya, umwana uwa Uzi, umwana uwa Buki,

⁵ umwana uwa Abishuwa, umwana uwa Finehasi, umwana uwa Eleyazala, umwana uwa Aloni, yuyo akaba muputi usongo.

⁶ U Ezila yunuyu akanda ubulendo bwache mu Babiloni sona akaba mumanyisi pakuti akamanya nkani Indaghilo izya Mozesi, zizyo u Mwene u Chala uwa Izilayeli akamupa. U mwene akamupa ivintu vyosi vivyo akavilondagha, pakuti u Mwene u Chala wache akaba nawe.

⁷ Aba Izilayeli bamo poka na baputi na Levi na bimbi na balindilili aba pamulyango na babombi aba mu Nyumba iya Chala bope bakabuka ku Yelusalemu mumwaka waseveni bo u mwene Alitakiselesesi akulaghila.

⁸ U Ezila akafika mu Yelusalemu mumwezi uwafayivi mumwaka waseveni bo u mwene akulaghila.

⁹ Akanda ubulendo bwache mu Babiloni pisiku ilyakwanda ilya mwezi uwakwanda, po akafika mu Yelusalemu pisiku ilyakwanda mumwezi uwafayivi, pakuti u Chala wache akamupelela ichisa.

¹⁰ U Ezila akiyipa nkani ubumi bwache bosi pakumanyila nukuzikonka Indaghilo izya Mwene, sona nukubamanyisya aba Izilayeli ivimanyisyo na malamulo agha Mwene.

U mwene u Alitakiselesesi akumusimbila ukalata u Ezila

¹¹ U mwene u Alitakiselesesi akamupa ukalata umuputi Ezila, yuyo akaba mumanyisi, pakuti akamanyila nkani amalamulo ni vimanyisyo vivyo u Mwene akabapa aba Izilayeli. Ukalata yula akaba ngati ulu:

¹² Ane ne Alitakiselesesi, u mwene uwa bamwene. Nkukulamuka. Nkukusimbila awe we muputi u Ezila sona umumanyisi uwa Ndaghilo izya Chala uwakumwanya:

¹³ Losi ulu nkubika ululaghilo ulwakuti nanti alipo mubumwene bwane umu Izilayeli pamo umuputi pamo umu Levi yuyo akulonda pakubuka poka nawe ku Yelusalemu, angabuka.

¹⁴ Ane poka na makambala ghane seveni twe tukubatuma ku Yelusalemu na mu Yuda ukuti mwennye nanti abantu bakuzikonka Indaghilo zizyo u Chala winyu akabapa.

¹⁵ Ukonjelezyapo, musende usiliva nu golide yuyo ane ne mwene na makambala ghane tukabika mubwighane bwitu kwa Chala uwa Izilayeli, yuyo ubuzilo bwache ubwakwikalako buli mu Yelusalemu.

¹⁶ Musende sona usiliva na golide wesi, yuyo mungamwagha muchigaba icha Babiloni poka ni vyabupi vivyo abantu na baputi bakabika mubwighane bwabo mu Nyumba iya Chala wabo mu Yelusalemu.

¹⁷ Mwenelezye ukuti mwabombezya indalama zinizi pakughulila inkambaku na badubi nu twadubi poka ni vyakwiyipa ivya busu ni vyakwiyipa ivyakung'wela nukuvibika pachighemo mu Nyumba iya Chala winyu mu Yelusalemu.

¹⁸ Awe poka naba Yuda abamwinyu mungamanya namumo mungabombezezya usiliva nu golide wesi yuyo angasyalako ukuyana nu bwighane ubwa Chala winyu.

¹⁹ Mubikaye kwa Chala mu Yelusalemu ivibombelo vyosi vivyo mukapeghiwa ukuti vibombeziwanje pachiputo mu Nyumba iya Chala winyu.

²⁰ Mungasenda kunyambi iya bumwene ivintu vyosi vivyo mukulonda ukuti vibombaye mu Nyumba iya Chala winyu.

²¹ Losi ulu ane ne mwene u Alitakiselesesi, nkubalamula abasunga nyambi bosi aba kwisila ilya lusoko ulwa Yufuleti ukuti mumupe lubilolubilo umuputi u Ezila, umumanyisi uwa Ndaghilo izya Chala uwakumwanya vyosi vivyo akulonda,

²² ghangaba amakilogalamu 3,400 agha siliva na makilogalamu 10,000 agha ngano na malita 2,000 agha mafuta agha misyunguti poka ni mbeya inyinji nkani.

²³ Ichintu chosi chicho u Chala uwakumwanya akwiza pakulamula, chibombiwanje umwakwiyula mu Nyumba iya Chala uwakumwanya, umwakuti atakankalalilaye ane poka na bana bane.

²⁴ Uzimanye sona ukuti awe ute nu bulaghili nabumobumo pakubasonkezya umusonko abantu, pamo ukusangulizya ivyabupi ni vintu ivinji ukufuma ku baputi naba Levi na bimbi na balindilili aba pamulyango sona na babombi aba mu Nyumba iya Chala pamo abambombo abanji bosi aba mu Nyumba iya Chala yiniyi.

²⁵ Nawe bulo we Ezila, ubasale abalongozi na balongi, ukuyana na mahala ghagho Chala wako akupiye ukuti balongaye mubwanaloli inongwa izya bantu bosi aba kwisila ilya lusoko ulwa Yufuleti, babo bamenye indaghilo izya Chala wako. Umumanyisyanje umuntu wesi yuyo atazimenye indaghilo zinizi.

²⁶ Umuntu wesi yuyo atakukonka indaghilo izya Chala wako sona ni ndaghilo izya mwene naloli aghoghiwanje pamo achimbiziwanje muchisu pamo afyuliwanje ukatundu wache pamo ighaliliwanje mujele.

²⁷ Apaliwanje u Mwene, u Chala uwa banyenya bitu, yuyo abikite inyinong'ono zinizi mumoyo uwa mwene ukuti ayichindikaye Inyumba yache mu Yelusalemu

²⁸ sona yuyo ampeleye ichisa pamaso pa mwene na makambala ghache na balongozi bache bosi abamaka. Pachifukwa ichakuti u Mwene u Chala wane akaba nane, ane nakaziwa nkani pakubabungannya abalongozi aba mu Izilayeli ukuti babukaye poka nane.