Ezila 6 - IBAYIBOLO 2024

Ululaghilo ulwa mwene u Daliyasi lwaghiwa sona

¹ U mwene u Daliyasi akabika ululaghilo, po abantu bakalondelezya mumabuku agha mbili ghagho ghakaba munyumba izyakusungilamo amabuku aghakale mu Babiloni.

² Po bakalyagha ibuku mukaya akakulu nkani aka Ekibatana muchigaba icha Medi. Ivi vyo vivyo vikasimbiwa mwibuku lila:

³ Mumwaka uwakwanda bo u mwene u Sayilasi akulaghila, akabika ululaghilo nizya Nyumba iya Chala mu Yelusalemu ulwakuti: Leka Inyumba yizengiwe sona pakuba pakubikilapo ivyakwiyipa sona ulwalo lwache lwaliwe sona. Inyumba yiniyi mumwanya yibanje amamita 27 sona mububaba yibanje amamita 27.

⁴ Imizele mitatu yizengiwanje na mabwe amakulu, sona umuzele ghoka ghuzengiwanje na matabwa. Indalama izyakubalipila abambombo zisendiwanje kunyambi iyabumwene.

⁵ Vyope ivibombelo ivya golide nu siliva ivya mu Nyumba iya Chala, vivyo u Nebukadineza akefyamo mu Nyumba iya Chala mu Yelusalemu nukubuka navyo ku Babiloni, vinyosiwanje mubuzilo bwache mu Nyumba iya Chala mu Yelusalemu.

⁶ Polelo u Tatenayi umulaghili uwa kwisila ukwa lusoko ulwa Yufuleti nu Shetali Bozenayi, poka namwe mwe makambala agha muchigaba chilachila, mutakabanje kupipi.

⁷ Mutakayivulungannyanje imbombo iyakuzenga Inyumba iya Chala. Mumuleke umulaghili uwa chisu icha Yuda, na balongozi aba ba Yuda ukuti bazenge sona Inyumba iya Chala pabuzilo bwache ubwakale.

⁸ Ukonjelezyapo nkubika ululaghilo ulwa mumo mukwiza pakubabombela abalongozi aba ba Yuda, babo bakwiza pakuzenga Inyumba iya Chala iyi: Abantu banaba mubalipilaye indalama izya kunyambi iya bumwene, zizyo zikufuma pamusonko uwa kwisila ilya lusoko ulwa Yufuleti, umwakuti imbombo yiniyi yendelelaye.

⁹ Vyosi vivyo vingalondiwa, kokuti ingwata, na badubi nu twadubi ukuti vibanje vyakwiyipa ivyakocha kwa Chala uwakumwanya ni ngano ni mbeya nu vinyo sona na mafuta agha misyunguti, ukuyana namumo vikulondeliwa na baputi mu Yelusalemu, mubapanje isiku ni siku umwakusita kupotwa,

¹⁰ umwakuti babikaye ivyakwiyipa vivyo vikumuhobosya u Chala uwakumwanya, sona munyiputilaye ukuti u Chala ansaye poka na bana bane abalumendo.

¹¹ Nkubika ululaghilo ulwakuti nanti umuntu andula zizyo nalamula, ulutaliko ulwa nyumba yache luwesiwanje nukumukomela palapala, po inyumba yache yikwiza pakuba chituntululu.

¹² U Chala yuyo akasalite akaya akakulu nkani aka Yelusalemu pakuba buzilo bwache ubwakumuchindikilamo, amwefye pabumwene u mwene pamo umuntu wesi yuyo akwandula ululaghilo ulu, pamo ukuyinangannya Inyumba iyi mu Yelusalemu. Ane ne Daliyasi nabika ilamulo linili. Po umuntu wesi iyulaye nkani pakulikonka.

Ukupaghuliwa ukwa Nyumba iya Chala

¹³ U Tatenayi umulaghili uwa kwisila ilya lusoko ulwa Yufuleti nu Shetali Bozenayi na makambala aghamwabo bakabomba zizyo u mwene u Daliyasi akalamula.

¹⁴ Po abalongozi aba ba Yuda bakabombagha imbombo iyakuzenga Inyumba yila sona yikendagha akiza nkani umwakukaziwa nu mulaghuzi u Hagayi nu Zekaliya umwana uwa Ido. Bakamalizya pakuzenga Inyumba iya Chala ukuyana namumo akalamulila u Chala uwa Izilayeli sona ukuyana nu lulaghilo ulwa Sayilasi nu Daliyasi sona u Alitakiselesesi, babo bakaba bamwene aba mu Peleziya.

¹⁵ Inyumba iya Chala yikamala pakuzengiwa pisiku ilyabutatu ilya mwezi uwa Adala, mumwaka uwasikisi bo u mwene u Daliyasi akulaghila.

¹⁶ Po aba Izilayeli, kokuti abaputi naba Levi na banji bosi babo bakanyokako kubuzya bakaba nu lusekolo ulwakupaghulila Inyumba iya Chala umwakuhoboka nkani.

¹⁷ Palusekelo lulalula abantu bakabikagha inkambaku 100 na badubi 200 nu twadubi 400 sona na basabwe 12 pakuba chakwiyipa ichakupepesezya imbibi izya inko 12 izya ba Izilayeli.

¹⁸ Bakababika abaputi muvigaba vyabo sona aba Levi mutubukatila twabo ukuti bamubombelaye u Chala mu Yelusalemu, ukuyana namumo zisimbiliwe mwibuku ilya Mozesi.

Ulusekelo ulwa Pasa

¹⁹ Pisiku ilya 14 mumwezi uwakwanda abantu babo bakanyokako kubuzya bakaba nu Lusekelo ulwa Pasa.

²⁰ Abaputi naba Levi bakiswefya bene, po bosi bakaswepagha. Aba Levi bakaghogha umwana uwa ng'ozi uwa pa Lusekelo ulwa Pasa ukuti chibanje chakwiyipa icha bantu bosi babo bakanyokako kubuzya na baputi abawamwabo sona nicha babo.

²¹ Po aba Izilayeli babo bakanyokako kubuzya bakalya poka na babo batakinyazya bene ni vintu ivibibi ivya inko izinji zizyo zikikalagha muchisu chilachila, umwakuti bamuchindikaye u Mwene u Chala uwa Izilayeli.

²² Bakaba nu Lusekelo ulwa Chibama chicho chite ni chilungo umwakuhoboka amasiku seveni, pachifukwa ichakuti u Mwene akabahobosya nkani pakumupela u mwene uwamu Asiliya ukuti andule inyinong'ono zyache, umwakuti akabavwa pambombo iyakuzenga Inyumba iya Chala uwa Izilayeli.