Ezila 4 - IBAYIBOLO 2024

Abalwani bakubapelela intamyo

¹ Bo abalwani aba bantu aba mu Yuda, naba mu Benjamini, bivwa ukuti abantu babo bakanyokako kubuzya banda pakuzenga Inyumba iya Mwene, u Chala uwa Izilayeli,

² bakiza kwa Zelubabeli, na ku balongozi abanyumba nukuti, “Zagha tubavwe pakuzenga Inyumba iya Chala pakuti naswe bulo tukumuchindika u Chala winyu sona twabikagha ivyakwiyipa kukwache ukwandila pakabalilo aka mwene u Esalihadoni uwamu Asiliya, yuyo akiza naswe kuno.”

³ Loli u Zelubabeli nu Yeshuwa, sona na balongozi abanyumba izya Izilayeli bakabamula bakati, “Tutakulonda ukuti mutwavwe pakuzenga Inyumba iya Chala witu. Aswe twebene tukwiza pakumuzengela Inyumba u Mwene u Chala uwa Izilayeli ukuyana namumo akatulamulila u mwene u Sayilasi uwamu Peleziya.”

⁴ Po abantu babo bakikalagha muchisu chila bakanda pakubawisya amaka nukuboghofya abantu aba mu Yuda ukuti baleke pakuzenga.

⁵ Bakaghabeka amakambala ukuti ghavulungannye imbatiko izya buzengi bula pakabalilo kosi aka mwene u Sayilasi uwamu Peleziya mupaka pakabalilo aka mwene u Daliyasi uwamu Peleziya.

⁶ Bo u mwene u Ahaziwelo anda pakulaghila, abalwani bala bakasusannya na bantu aba mu Yuda naba mu Yelusalemu pakusimba ukalata.

⁷ Umwakuyana bulo, bo u mwene u Alitakiselesesi uwamu Peleziya akulaghila, u Bishilamu nu Mitiledati nu Tabeli na bamwabo abanji bosi bakamusimbila ukalata u mwene u Alitakiselesesi uwamu Peleziya. Ukalata yulayula akasimbiwa mu Chialamu sona bakamusanusyanga bo bakumubelengela u mwene.

⁸ Pisinda pache u Lehumu umulaghili uwa chisu nu Shimushayi umusimbi bope bakamusimbila ukalata u mwene u Alitakiselesesi uwakususannya na bantu aba mukaya akakulu nkani aka Yelusalemu. Ukalata yula akasimbiwa ngati ulu:

⁹ Nene u Lehumu ne nasimba ukalata uyu poka nu mulaghili uwa chisu nu Shimushayi umusimbi poka na bamwitu abanji bosi, kokuti abalongi na makambala agha muchisu icha Eleki nicha Babiloni naba Elamu aba mu Susa,

¹⁰ na bantu bosi abanji, babo u Osinapala u mwene usongo nu muchindikiwa akabasamya nukubikazya mukaya akakulu nkani aka Samaliya sona na muchigaba icha kwisila ilya lusoko ulwa Yufuleti.

¹¹ Amazyu ghagho bakasimba mwakalata yula gho agha: Tukukusimbila awe we mwene u Alitakiselesesi. Aswe twe bambombo bako aba kwisila ilya lusoko ulwa Yufuleti twe tutukusimbila ukalata yunuyu.

¹² Wee mwene, twalondagha uzimanye ukuti aba Yuda babo bizite kuno ukufuma kukwako babuka ku Yelusalemu. Losi ulu bali pakuzenga sona akaya akakulu nkani akakusambuka na kabibi kala. Bali pakuzenga sona ulupaso nu lwalo.

¹³ Wee mwene, uzimanye sona ukuti nanti akaya akakulu nkani kanaka kazengiwa poka nu lupaso lwache, abantu banaba batakwiza pakusonka nalumo umusonko pamo ukubika ivyabupi ni vintu ivinji vyosi, po kunyambi iya bumwene kutakwiza pakubako indalama nazimozimo.

¹⁴ Pakuti watubombela ivyinji nkani, po tutakulonda ukuti awe we mwene usamuliwanje. Twatuma amazyu ghanagha ukuti tukumanyisye

¹⁵ umwakuti ulondelezye vivyo visimbiwe mumabuku agha mbili iya bamwene babo bakalaghilagha kwisinda. Mumabuku ghanagha ukwiza pakwagha ukuti akaya akakulu nkani kanaka ko kakusambuka sona kabapelela nkani intamyo abamwene na muvigaba ukwanda ko kubwandilo. Ichi cho chifukwa akaya akakulu nkani kanaka kakamongoliwa.

¹⁶ Wee mwene, uzimanye ukuti nanti akaya akakulu nkani kanaka kazengiwa poka nu lupaso lwache, kokuti awe utakwiza pakuba nu bulaghili nalumo kwisila ilya lusoko ulwa Yufuleti.

¹⁷ Po u mwene akamula akati: Nkukusimbila awe we Lehumu umulaghili uwa chisu nu Shimushayi umusimbi poka na bamwinyu abanji bosi, mwe mukwikala mu Samaliya, sona na kosi kwisila ilya lusoko ulwa Yufuleti: Nkubalamuka.

¹⁸ Ukalata yuyo mukantumila abelengiwa pamaso papane umwakwivwika akiza bulo.

¹⁹ Po nkalamula ukuti abantu balondelezye mumabuku agha mbili nukwagha ukuti naloli akaya akakulu nkani kanaka kali ni mbili iya bamwene abakusambuka ukwanda ko kubwandilo sona momumo mukwikala abantu abakusambuka na babibi.

²⁰ Mu Yelusalemu mwame abamwene abamaka babo balaghilagha kwisila ilya lusoko ulwa Yufuleti sona abantu batakasonkagha umusonko nukubika ivyabupi sona ni vintu ivinji.

²¹ Losi ulu mubalamule abantu banaba ukuti baleke imbombo yiyo bakubomba, umwakuti akaya akakulu nkani kanaka katakazengiwe sona mupaka papo nabalamula pakubomba bunubu.

²² Zinizi zibombiwe lubilolubilo, pakuti ntangitikizya ukuti ichintu chibibi chinichi chibombiwe nukunvulazya ane ne mwene.

²³ Bo ukalata uwa mwene u Alitakiselesesi abelengiwa pamaso pa Lehumu nu Shimushayi umusimbi na bamwabo abanji bosi, bakabuka lubilolubilo pakubafyenga aba Yuda aba mu Yelusalemu ukuti baleke pakubomba imbombo.

²⁴ Po imbombo iyakuzenga Inyumba iya Chala mu Yelusalemu yikalekeleziwa tasi mupaka mumwaka uwabubili uwa bulaghili ubwa mwene u Daliyasi uwamu Peleziya.