Ezila 1 - IBAYIBOLO 2024

U mwene u Sayilasi akubalamula aba Yuda ukuti babwelaye

¹ Mumwaka uwakwanda bo u mwene u Sayilasi uwamu Peleziya akulaghila, u Mwene akakwanilisya zizyo akamubuzya umulaghuzi u Yelemiya pakunyamusya umoyo uwa Sayilasi ukuti asimbe indaghilo nukuzifumusya mubumwene bwache bosi izyakuti:

² “U mwene u Sayilasi uwamu Peleziya ati, “ ‘U Mwene u Chala uwakumwanya anyimika ukuti imbanje ne mulaghili uwa chisu chosi ichapasi sona ansalite ukuti imuzengele Inyumba mu Yelusalemu muchisu icha Yuda.

³ U Mwene u Chala abanje nu muntu wesi pakasi papinyu sona amwitikizye ukuti abukaye ku Yelusalemu muchisu icha Yuda pakuzenga Inyumba iya Mwene u Chala uwa Izilayeli, yuyo akwikala kulakula.

⁴ Kosi kuko abantu abakusyala bumi bakwikala, abantu aba mulamula babapanje usiliva nu golide ni vintu ivyiza ni vitekwa sona ni vyakwiyipa mubwighane bwabo pakuba vya mu Nyumba iya Chala mu Yelusalemu.’ ”

⁵ Po abalongozi abamunyumba izya luko ulwa Yuda nulwa Benjamini na baputi sona naba Levi, kokuti umuntu wesi yuyo u Chala akamupalamasya umoyo, akiyannya pakubuka ku Yelusalemu pakuzenga Inyumba iya Mwene.

⁶ Abapalamani babo bosi bakabapa usiliva nu golide nu katundu ni vitekwa sona ni vyabupi ivyamutengo, pakonjelezya pa vyakwiyipa vivyo bakabapa mubwighane bwabo.

⁷ Wepe u mwene u Sayilasi akefya kuzi ivibombelo vyosi ivya mu Nyumba iya Mwene, vivyo u Nebukadineza akavisenda mu Yelusalemu nukuvibika munyumba iya bachala bache.

⁸ U mwene Sayilasi uwamu Peleziya akamulamula u Mitiledati umusunga nyambi ukuti ize navyo, yuyo akavibelenga pamaso pa Sheshibazali umulongozi uwamu Yuda.

⁹ Ivintu vyosi vikaba ngati ulu: Amabeseni agha golide ghakabapo 30 na mabeseni agha siliva ghakabapo 1,000 ni vyakukazingila ivya siliva vikabapo 29.

¹⁰ Imbale izya golide zikabapo 30 ni mbale inandi izya siliva zikabapo 410 sona ni vibombelo ivinji vikabapo 1,000.

¹¹ Ivibombelo ivya golide ni vya siliva vyosi poka vikabapo 5,400, vivyo u Sheshibazali akavisenda, bo abazya bala bakunyokela ku Yelusalemu ukufuma ku Babiloni.