Ezekiyeli 9 - IBAYIBOLO 2024

Abantu abakwiputa ivifwani baghoghiwa

¹ Po nkamwivwa u Chala akwitizya umwakukolomoka akuti, “Zagha na bantu babo bakubuka pakukafunda akaya akakulu nkani aka, bo umuntu wesi alemite ichilwilo munyobe yache.”

² Po nkabennya abantu sikisi bakufumila kumulyango uwapamwanya ghugho wenizye kumitu, bo umuntu wesi alemite munyobe yache ichilwilo icha kughoghela, pakasi papabo pakaba umuntu yumo yuyo akavwala umwenda umutonte, yuyo akapinya ichakusimbila palubazu. Bakinjila bosi nukwimilila palubazu ulwa chighemo icha mukuba.

³ Po ubuchindamu ubwa Chala uwa Izilayeli bukakwela ukufuma pamwanya pabakelubi, papo akaba po akabuka pamulyango uwa Nyumba iya Chala. Po u Mwene akamwitizya umuntu yuyo akavwala umwenda umutonte sona akaba ni chakusimbila palubazu.

⁴ Akamubuzya akati, “Buka mukaya akakulu nkani mosi mu Yelusalemu nukubikapo ichimanyilo pavyeni vyabo bosi babo bali nichitima nukulila, pachifukwa icha vintu ivyamwiko vivyo vikubombiwa mulamula.”

⁵ Bo nkuteghelezya akababuzya abanji akati, “Mumukonke ukwendela mukaya akakulu nkani nukubaghogha abantu babo batakaba nichimanyilo, mutakabapelelaye ichisa pamo pakuba nabo ni chililizi.

⁶ Mubaghoghe abaghosi na balumendo na balindu na bakolo sona na bana loli utakamupalamasye yuyo ali ni chimanyilo. Anda pabuzilo bwane ubuzelu.” Po bakanda na baghosi babo bakaba pantazi pa Nyumba iya Chala.

⁷ Po u Mwene akababuzya akati, “Muyinyazye Inyumba iya Chala nukwizuzya ulubinjilo nimivimba. Buka!” Po bakabuka nukwanda pakubaghogha abantu mosi mukaya akakulu nkani aka Yelusalemu.

⁸ Bo bali pakubaghogha abantu, nkasyala bulo nemwene, nkawa umwakukupama, nukulila ukuti, “Wee Mwene Uwamaka Ghosi! Nkimba ukwiza pakubaghogha bosi abakusyalako mu Izilayeli pakwefyapo ubukali bwako pa Yelusalemu?”

⁹ Akanyamula akati, “Imbibi izya aba Izilayeli sona nizya Yuda nkulu nkani, ichisu chizuye nukukupula ibanda sona mutwaya mute ubwanaloli nabumobumo. Bakuti, ‘U Mwene achileka chene ichisu sona atakwennya.’

¹⁰ Po ntakwiza pakubapelela ichisa pamo pakubaleka bumi, loli nkwiza pakubatanizya pazizyo babombite.”

¹¹ Po umuntu yuyo akavwala umwenda umutonte, yuyo akaba ni chakusimbila palubazu lwache akiza kwa Mwene nukumubuzya ukuti, “Nabomba ngati mumo ukandamulila.”