Ezekiyeli 8 - IBAYIBOLO 2024

Ichisetuka ichabubili icha Ezekiyeli nizya Chala 8.1—10.22 Ukwiputa ivifwani mu Yelusalemu

¹ Pisiku ilyafayivi, mumwezi uwasikisi mumwaka uwasikisi, bo nikaye munyumba yane sona abasongo aba mu Yuda bakikala pamaso papane, amaka agha Mwene Uwamaka Ghosi ghakanyizila ane palapala.

² Po nkatalankannya nukwennya ichintu chimo chicho chikabonekagha ngati muntu. Ukwanda mumusana ukwika pasi chikabonekagha ngati moto, ukukwela kumwanya chikabonekagha ngati chela chicho chikusunguluka.

³ Akagholosya chicho chikabonekagha ngati nyobe nukuzilema isisi zyane kumutu wane. Umuzimu uwa Chala ghukanyamulila mumwanya pakasi pachisu ichapasi nicha kumwanya, muchisetuka icha Chala umuzimu yula akabuka nane ku Yelusalemu, kumulyango uwa kumitu uwa lubinjilo, papo pakaba ichifwani icha kabini.

⁴ Po palapala nkabwennya ubuchindamu ubwa Chala uwa Izilayeli, ngati chisetuka chicho nkachennya mwikombe.

⁵ Po akambuzya akati, “Wee mwana uwa muntu, ennya kumitu.” Po nkennya, pamulyango uwa kumitu uwa chighemo, nkachennya ichifwani icha kabini.

⁶ Po akandalusya akati, “Wee mwana uwa muntu, nkimba ukuzyennnya zizyo bakubomba? Ennya ivyamwiko vivyo aba Izilayeli bakubomba, ivintu vivyo vikwiza pakubabika kubutali nu buzilo bwane ubuzelu? Loli mukwiza pakwennya ivyamwiko nkani ukuchilapo.”

⁷ Po akiza nane pamulyango uwa palubinjilo. Po nkatalankannya nukwennya, ichidobozwi palubumba.

⁸ Akambuzya akati, “Wee mwana uwa muntu, dobola palubumba.” Po nkadobola palubumba pala nukuwennya umulyango uwakufumila.

⁹ Akambuzya akati, “Injila nukwennya ububibi nivya mwiko vivyo bakubomba pano.”

¹⁰ Po nkinjila nukutalankannya, nkennya ivituzituzi palubumba ivyakwavula ivyakulekanalekana, ivinyamana ivinyazu ni vifwani vyosi ivya ba Izilayeli.

¹¹ Pantazi papabo pakimilila abasongo 70 aba Izilayeli nu Yazaniya umwana uwa Shafani, yuyo akimilila pakasi papabo. Umuntu wesi akaba nicha kochelapo utwakununkila munyobe yache, ilyosi ilya vyakununkila likakwela mumwanya.

¹² Po akandalusya akati, “Wee mwana uwa muntu, nkimba wavyennya vivyo abasongo aba Izilayeli bakubombela muchisi? Bakuti, ‘U Mwene atakutwennya, u Mwene achilekite chene ichisu ichi.’ ”

¹³ Akambuzya sona akati, “Ukwiza pakubennya bakubomba ivintu ivyamwiko nkani ukuchila vinivi.”

¹⁴ Po akabuka nane pamulyango uwakwinjilila uwa kumitu uwa Nyumba iya Mwene, nkabennya abakolo bikaye palapala, bali pakumulila u chala u Tamuzi.

¹⁵ Akandalusya akati, “Wee mwana uwa muntu, nkimba ukuvyennya vinivi? Ukwiza pakuvyennya ivintu ivyamwiko nkani ukuchila vinivi.”

¹⁶ Po akanyinjizya mulubinjilo ulwa Nyumba iya Mwene, palapala pamulyango uwa Nyumba iya Chala pakasi pibalaza ni chighemo, pakaba abantu 25. Inkoto zyabo zikennya ku Nyumba iya Mwene bo ivyeni vyabo vikennya kubufumilo bwizuba, bakalyiputagha izuba.

¹⁷ U Chala akandalusya akati, “Wee mwana uwa muntu, nkimba wazyennya zinizi? Nkimba chintu chipepe nkani kuba Yuda pakubomba ivintu ivyamwiko vivyo bakubomba pano? Nkimba bizuzye ni vyongo ichisu nukwendelela pakunkalalizya? Bennye, napapo bakakolomoka nkani loli ntakabateghelezya!

¹⁸ Polelo, ntakwiza pakubaleka bulo, ntakwiza pakubapelela ichisa pamo ukubaleka bumi. Napapo bakukolomoka mumakutu ghane, ntakwiza pakubateghelezya.”