Ezekiyeli 7 - IBAYIBOLO 2024

Ubumalilo ubwa ba Izilayeli buli papipi

¹ U Mwene akambuzya akati,

² “Wee mwana uwa muntu, izi zyo zizyo u Mwene Uwamaka Ghosi akuchibuzya ichisu icha Izilayeli ubumalilo: Ubumalilo bwafika, pankuto folo izya chisu.

³ Po ubumalilo bwafika papinyu, nkwiza pakupungulila ubukali bwane papinyu. Nkwiza pakubalonga ukuyana ni nkalo yinyu, nukubatanizya, pachifukwa icha inkalo yinyu iya mwiko yiyo mwabomba.

⁴ Ntakwiza pakubapelela ichisa pamo ukubaleka bulo. Naloli nkwiza pakubatanizya, pachifukwa icha nkalo yinyu iya mwiko, yiyo mwabomba pakasi papinyu. Po mukwiza pakumanya ukuti ane ne Mwene.”

⁵ U Mwene Uwamaka Ghosi akuti, “Ukunanganika! Ukunanganika! Ennya ukunanganika kwafika.

⁶ Ubumalilo bwafika! Ubumalilo bwafika! Ennya bwabawila, wee Izilayeli, bwafika!

⁷ Amwe mwe mukwikala muchisu! Ukunanganika kwabawila, akabalilo kafikila, isiku lili papipi, kuli ukuvulungana, patalipo ukusekela pamaghamba.

⁸ Indi papipi pakupungulila ubukali bwane papinyu, sona nukubakalalila amwe Nkwiza pakubalonga, pachifukwa icha nkalo yinyu, sona ni mbombo zyinyu izya mwiko.

⁹ Ntakwiza pakubapelela ichisa, pamo pakubaleka bulo. Nkwiza pakutanizya pachifukwa icha nkalo yinyu, sona ni mbombo zyinyu izya mwiko pakasi papinyu. Po mukwiza pakumanya ukuti, ane ne Mwene yuyo akughogha.

¹⁰ “Ennya, isiku lyafikila! Lyafika kale! Ubufwe bwafika, ububibi bwinyu bwabazya ngati bwezya, sona ukwituvya kwinyu kuli pabuzelu!

¹¹ Ivyongo vyanyamuka, po vyaba ngati ndisa iya bubibi. Patalipo nayumoyumo umuntu, yuyo akwiza pakusyalapo, ivintu vyabo vikwiza pakumala, ubukabi bwabo bukwiza pakumala.

¹² Akabalilo kafikila, isiku lyache lili papipi. Mutakamwitikizye uwakughula ukuti asekelaye, pamo uwakughulizya ukuti asulumannyanje, pakuti ubukali bwane buli pachilundilo chosi.

¹³ Uwakughulizya atakwiza pakunyokela, ku vivyo aghulizizye, bo bosi babili bumi. Pakuti zizyo nanena pachilundilo chabo chosi, zitakwiza pakwanduliwa. Pachifukwa icha mbibi zyabo, sona atalipo nayumoyumo, yuyo akwiza pakuba mumi.

¹⁴ “Napapo bakulizya ipati, nukuyannya vyosi, atalipo nayumo umuntu uwakubuka pakulwa kubwite, pakuti ubukali bwane buli pachilundilo chosi.

Aba Izilayeli bakufundiwa pachifukwa icha mbibi

¹⁵ “Kuzi kuli ubwite, mukasi muli ichiwaya nizala. Abantu babo bali muchisu, bakwiza pakufwila kubwite, sona abantu babo bali mukaya akakulu nkani, bakwiza pakufwa nizala sona ni chiwaya.

¹⁶ Nanti balipo abantu abakupona, bakwiza pakuchimbilila mumaghamba. Umuntu wesi akwiza pakukoloma, ngati nkunda izya mumakombe, pachifukwa icha mbibi zyache.

¹⁷ Inyobe zyabo zyosi zitakwiza pakuba namaka, sona ivimpevu vyabo vyosi, vikwiza pakuba videdebazu ngati mizi.

¹⁸ Bakwiza pakuvwala amasaka, sona ubogha bukwiza pakubalema. Ivyeni vyabo vikwiza pakuba ni soni, sona bakwiza pakumwa isisi kumitu yabo.

¹⁹ “Bakwiza pakusumba usiliva wabo mumisebo, sona u golide wabo akwiza pakuba munyazu. Usiliva nu golide wabo vitakwiza pakubapoka, pisiku ilya bukali ubwa Mwene. Batakwiza pakwikutizya izala zyabo, pamo pakwizuzya inyanda zyabo nu siliva nu golide, pakuti ubukabi bwabo, bwabapela ukuti banangaye.

²⁰ Bakituvyanga ni vintu ivyakwibonesekezya akiza, pakupangila ivifwani ivyamwiko. Polelo nkwiza pakuvipela pakuba vyakubanyazya.

²¹ Po nkwiza pakuvibika munyobe izya bayeni, ngati vyakufyula nukuvibika munyobe, izya bantu ababibi aba muchisu, abene bakwiza pakuvinyazya.

²² Nkwiza pakubapa inkoto, umwakuti amavyondongo ghachinyazye ichisu chane, pakwinjilamo nukuchinyazya.

²³ “Yannya ubunyololo, pakuti ichisu chizuye nukukupula ibanda, sona akaya akakulu nkani kizuye ni vyongo.

²⁴ Nkwiza na bantu ababibi aba inko, pakufyula inyumba zyabo. Nkwiza pakumazya amaka abakwituvya, sona ubuzilo bwabo ubuzelu, bukwiza pakuba bunyazu.

²⁵ Bo ubogha bwiza, bakwiza pakughulonda umutende, loli batakwiza pakuwagha.

²⁶ Intamyo zikwiza pakuwila pantamyo izinji, sona imbili yikwiza pakuwila pa mbili iyinji. Bakwiza pakulonda ichisetuka ku mulaghuzi, loli ubumanyisi ubwa lulaghilo ulwa muputi lukwiza pakusobela, po abasongo batakwiza pakumanyisya sona amahala.

²⁷ U mwene akwiza pakulila, lyope ikambala likwiza pakwizula nubogha, sona inyobe izya bantu aba muchisu zikwiza pakutetema. Nkwiza pakubabombela ukuyana ni nkalo yabo, nukubalonga ukuyana namumo bakubalongela abamwabo. Po bakwiza pakumanya ukuti ane ne Mwene.”