Ezekiyeli 6 - IBAYIBOLO 2024

U Mwene akubasusya pachifukwa icha kwiputa ivifwani

¹ U Mwene akambuzya akati,

² “Wee mwana uwa muntu, ennya icheni chako kumaghamba agha Izilayeli ughalaghulile umwakughasusya ukuti,

³ U Mwene Uwamaka Ghosi akuti, ‘Mwee maghamba agha Izilayeli, ivwa izyu ilya Mwene Uwamaka Ghosi. Izi zyo zizyo u Mwene Uwamaka Ghosi akughabuzya amaghamba nu tughamba, sona utusoko na makombe. Indi papipi pakubizila nu bwite, sona nkwiza pakubunangannya ubuzilo bwinyu ubwapamwanya ubwakwiputilapo ivifwani.

⁴ Nkwiza pakuvimongolannya ivighemo vyinyu sona nkwiza pakuvitiza ivyakufukizizyapo utwakununkila. Nkwiza pakubaghogha abantu binyu pamaso pavifwani vyinyu.

⁵ Nkwiza pakuyilambalika imivimba iya ba Izilayeli pamaso pavifwani vyabo, sona nkwiza pakughanyampannya amafupa ghinyu umwakuzyungulila ivighemo vyinyu.

⁶ Kosi kuko mukwikala utwaya twinyu utukulu tukwiza pakunanganika, po ubuzilo bwinyu ubwapamwanya bukwiza pakumongoliwa, umwakuti ivighemo vyinyu vikwiza pakuba visami, ivifwani vyinyu vikwiza pakutiziwa nukulekiwa, vyope ivyakufukizizya utwakunukila vikwiza pakutiziwa, vyosi vivyo mwapanga vikwiza pakumala.

⁷ Abantu bamo pakasi papinyu bakwiza pakughoghiwa, po mukwiza pakumanya ukuti ane ne Mwene.

⁸ “ ‘Loli nkwiza pakubaleka bamo bumi, pakuti bamo bakwiza pakupona kubwite bo mwanyampana pakasi pavyisu sona napa inko.

⁹ Po inko zizyo mwasendiwako pakuba bazya babo bapona bakwiza pakunkumbuka, namumo najimbiye pakwiputa kwabo ukwabumyasi, vivyo vyabapela pakunsambukila sona amaso ghabo ghabapela pakuvinyonywa ivifwani. Po bakwiza pakuchibenga ichinyonywa chabo, pachifukwa icha vintu ivyamwiko vivyo bambomba.

¹⁰ Po bakwiza pakumanya ukuti ane ne Mwene. Intakaboghofya pabulo ukuti imbawisizye intamyo zinizi.

¹¹ “ ‘U Mwene Uwamaka Ghosi akuti: Koma inkufi sona kanya nkani pasi ulwayo lwako nukukolomoka ukuti, “Chighune nkani!” Pachifukwa icha bubibi sona ni vintu ivyamwiko vivyo aba Izilayeli babomba, pakuti bakwiza pakughoghiwa kubwite, nizala sona ni chiwaya.

¹² Umuntu yuyo ali kubutali akwiza pakufwa ni chiwaya, sona umuntu wesi yuyo ali papipi akwiza pakufwila kubwite, umuntu wesi yuyo aponite sona mumi akwiza pakufwa nizala. Po ubukali bwane bukwiza pakuwila papabo.

¹³ Po bakwiza pakumanya ukuti ane ne Mwene, bo abantu babo baghoghiwe pakasi pavifwani vyabo umwakuzyungulila ivighemo vyabo, pamwanya patughamba tosi sona na pamwanya pamaghamba ghosi, na muntende mwikwi, nikwi ilya mupandapanda lilyo lilembite, sona na pabuzilo bubo bakufukizizyapo utwakununkila ku vifwani vyabo vyosi.

¹⁴ Po nkwiza pakulanjizya amaka ghane nukuchipela ichisu chabo pakuba chisami ukwanda kunkolongo mupaka ku Dibula kosi kuko bakwikala. Po bakwiza pakumanya ukuti ane ne Mwene.’ ”