Ezekiyeli 5 - IBAYIBOLO 2024

U Ezekiyeli akumwa isisi zyache

¹ U Mwene akambuzya akati, “Wee mwana uwa muntu, senda upanga yuyo akwete nkani nukumubombezya pakumwa isisi kumutu wako sona ni ndevu zyako. Zipime pachipimilo nukuzigaba isisi patatu.

² Bo isiku ilya kuzyunguliliwa kwako lyamala, ocha ichigaba chako ichabutatu icha isisi mo mukasi mukaya akakulu nkani. Senda sona ichigaba ichabutatu nukudumula nupanga ukuzyungulila akaya akakulu nkani. Uchipupuzye mumpepo ichigaba ichabutatu. Pakuti nkwiza pakubachimbizya nupanga.

³ Loli sendapo isisi linandi bulo nukulipinyilila kubumalilo ubwa nkazo yako.

⁴ Usendepo sona linandi bulo nukulisumba mumoto nukulyocha. Umoto ghukwiza pakufika mupaka muchisu chosi icha Izilayeli.”

⁵ Po u Mwene Uwamaka Ghosi akuti, “Uyu we Yelusalemu, yuyo namubika pakasi pa inko, ni vyisu vivyo vimuzyunguliye.

⁶ Abantu aba mu Yelusalemu mububibi bwabo baghasambukila amalamulo ni ndaghilo zyane ukuzichila inko ni vyisu vivyo vimuzyunguliye. Bazikana indaghilo zyane sona bataghakonka amalamulo ghane.”

⁷ Polelo, u Mwene Uwamaka Ghosi akuti, “Mwe bamadinko ukuzichila inko zizyo zibazyunguliye sona mutakughakonkite amalamulo ghane pamo indaghilo zyane. Loli mukazikonka indaghilo izya inko zizyo zibazyunguliye.”

⁸ U Mwene Uwamaka Ghosi akuti, “Nane bulo nkulwana nawe Yelusalemu nkwiza pakukufunda pamaso pa inko.

⁹ Pachifukwa icha vifwani ivyamwiko, nkwiza pakubabombela ichintu chicho intabombitepo nalumo sona ntakwiza pakuchibombapo nalumo.

¹⁰ Pakasi papinyu abapapi bakwiza pakubalya abana babo, sona abana bakwiza pakubalya abapapi babo. Nkwiza pakubafunda amwe, nukubanyampannya abakusyalikila kosi na kosi.”

¹¹ U Mwene Uwamaka Ghosi akulapa akuti, “Pachifukwa ichakuti mwabunyazya ubuzilo bwane ubuzelu ni vifwani sona ni nyiho zyinyu izya mwiko, po ane ntakwiza pakubaleka bulo nukubapelela ichisa.

¹² Ichigaba ichabutatu icha bantu bakwiza pakufwa ni chiwaya pamo nizala, ichigaba ichabutatu bakwiza pakufwila kubwite kuzi ukwa kaya kinyu akakulu nkani, sona ichigaba ichabutatu nkwiza pakubanyampannya kosi na kosi, nukubachimbizya nupanga.

¹³ “Po ukukalala kwane kukwiza pakuleka sona ubukali bwane bukwiza pakutozoka, bakwiza pakubatanizya. Po nanti nabakalalila, bakwiza pakumanya ukuti ane ne Mwene nanena na kabini.

¹⁴ “Nkwiza pakuchipela ichisu chinyu pakuba chisami nukuba chakusekiwa pakasi pa inko na bantu babo babazyunguliye, sona na babo bakudumusannyapo.

¹⁵ Ukwiza pakuba chintu chakusekiwa ni chakusamuliwa. Sona ukwiza pakuba we soki ni chintu ichakoghofya ku inko zizyo zikuzyunguliye, bo nkubafunda amwe mu kukalala sona na mubukali bwane nukubachemela.

¹⁶ Nanti nkubasumbila utulasilo twane utwakoghofya utwa zala sona nutwakunangannya, nkwiza pakubalasa nukubaghogha. Nkwiza pakubawisizya izala inkulu nukwefya ivyakulya vyinyu ivya isiku ni siku.

¹⁷ Nkwiza pakubawisizya izala nukubatumila ivinyamana ivya munkolongo pakubafyula abana binyu, ichiwaya ichakoghofya nukukupula ibanda vikwiza pakubaghogha, po nkwiza pakwiza nubwite papinyu. Ane ne Mwene nanena.”