Ezekiyeli 48 - IBAYIBOLO 2024

Ivigaba vivyo bakazigabila inko izyakumitu

¹ U Mwene Uwamaka Ghosi akuti, “Agha gho matabwa agha baluko, ukwanda kumpaka iyakumitu, u Dani akwiza pakuba ni chigaba choka yikwiza pakwenda mumusebo uwa Hetiloni mupaka ku kaya akakulu nkani aka Lebo Hamati naka Hazali Enani sona na kumitu kubumalilo ubwa chisu icha Damasika papipi nichigaba icha Hamati, chikwiza pakuba chigaba choka icha Dani.

² “U Asheli akwiza pakuba ni chigaba choka, impaka iya chisu icha Dani yikwiza pakwanda kubufumilo bwizuba mupaka kubwinjililo bwizuba.

³ “U Nafutali akwiza pakuba ni chigaba choka, impaka iya Asheli yikwiza pakwanda kubufumilo bwizuba mupaka kubwinjililo bwizuba.

⁴ “U Manase akwiza pakuba ni chigaba choka, impaka iya Nafutali yikwiza pakwanda kubufumilo bwizuba mupaka kubwinjililo bwizuba.

⁵ “U Efulayimu akwiza pakuba ni chigaba choka, impaka iya Manase yikwiza pakwanda ku kubufumilo bwizuba mupaka kubwinjililo bwizuba.

⁶ “U Lubeni akwiza pakuba ni chigaba choka, impaka iya Efulayimu yikwiza pakwanda kubufumilo bwizuba mupaka kubwinjililo bwizuba.

⁷ “U Yuda akwiza pakuba nichigaba choka, impaka iya Lubeni yikwiza pakwanda kubufumilo bwizuba mupaka kubwinjililo bwizuba.

Ichigaba icha palubazu chapaghuliwa

⁸ “Impaka iya Yuda yikwiza pakwanda kubufumilo bwizuba mupaka kubwinjililo bwizuba, chikwiza pakuba chigaba chicho mukwiza pakubika pakuba chabupi ichipaghuliwa. Mububaba chikwiza pakuba amakilomita 12 nu hafu, ubutali bwache ukwanda kubufumilo bwizuba mupaka kubwinjililo bwizuba vikwiza pakuyana bulo nivigaba vivyo vikagabiliwa kubaluko. Po Inyumba iya Chala yikwiza pakuba pakasi na pakasi.

⁹ “Ichigaba chicho mubikaye kwa Mwene mubutali chikwiza pakuba amakilomita 12 nu hafu sona mububaba chikwiza pakuba amakilomita 10.

¹⁰ Ichi cho chigaba ichipaghuliwa icha baputi. Chikwiza pakuba amakilomita 12 nu hafu ukwanda kumitu mupaka kuntende, sona mububaba chikwiza pakuba amakilomita fayivi. Inyumba iya Mwene yikwiza pakuba pakasi na pakasi.

¹¹ Ichigaba ichi chikwiza pakuba cha baputi babo bapaghuliwe, aba Zadoki, babo bakaba basubiliwa pakumbombela ane sona batakasobela ngati mumo aba Levi bakabombela, bo aba Izilayeli bakusobela.

¹² Chikwiza pakuba chabupi ichipaghuliwa kukwabo ukwanda pachigaba ichizelu icha chisu, impaka iya chigaba ichizelu nkani yikwiza pakuba kubumalilo ubwa chisu icha ba Levi.

¹³ “Mulubazu ulwachisu chicho bakagabiliwa abaputi, naba Levi mubutali chikwiza pakuba amakilomita 12 nu hafu ukwanda kubufumilo bwizuba mupaka kubwinjililo bwizuba, mububaba chikwiza pakuba amakilomita fayivi ukwanda kumitu mupaka kuntende.

¹⁴ Batakaghulizye pamo ukughulizannya ni chintu chimo. Chinichi cho chisu ichiza nkani sona chitakapeghiwe ku muntu uyunji, pakuti chipaghuliliwe kwa Mwene.

¹⁵ “Ichigaba ichakusyalako, mububaba chikaba amakilomita mabili nu hafu, mubutali amakilomita ghakaba 12 nu hafu, ubuzilo bunubu bunyazu, bukwiza pakuba buzilo bwakubombelapo umuntu wesi, apakuzengapo, sona nukulimapo. Akaya akakulu nkani kakwiza pakuba pakasi na pakasi,

¹⁶ sona kakwiza pakuyana bulo imbazu zyosi, ulubazu loka kakwiza pakuba amamita 2,250.

¹⁷ Akaya akakulu nkani kakwiza pakuba napakudimilapo ivitekwa, pakwiza pakuyana bulo imbazu zyosi, ulubazu loka pakwiza pakuba amamita 125.

¹⁸ Ubuzilo ubwakusyalako papipi nu buzilo ubuzelu, ubutali bwache bubanje amakilomita fayivi, kubufumilo bwizuba bubanje amakilomita mabili nu hafu, sona kubwinjililo bwizuba bubanje bwakulimapo abantu babo bakwikala mukaya akakulu nkani kalakala.

¹⁹ Abambombo aba mukaya akakulu nkani, babo bakwiza pakulimagha mulamula bakwiza pakufuma mu inko zyosi izya Izilayeli.

²⁰ Ubuzilo ubuzelu bubo buli pakasi bula bukwiza pakuyana bulo mubutali na mububaba, ulubazu loka bukwiza pakuba amakilomita 12 nu hafu, poka ni chigaba icha kaya akakulu nkani.

²¹ “Chicho chasyalako kuvigaba vyosi vibili ivya buzilo ubuzelu ni chigaba icha kaya akakulu nkani, bukwiza pakuba buzilo ubwa mwene. Bukwiza pakonjeleziwako ukwanda kubufumilo bwizuba ubwa buzilo ubuzelu, mupaka ku kumpaka iya kubwinjililo bwizuba, ubuzilo bosi bunubu umwakwenannya ni chigaba icha luko bukwiza pakuba bwa mwene, Ubuzilo Ubuzelu poka ni Nyumba iya Chala vikwiza pakuba pakasi na pakasi.

²² Ichigaba icha ba Levi ni chigaba icha kaya akakulu nkani vikwiza pakuba pakasi na pakasi pabuzilo ubwa mwene. Ichigaba chicho cha mwene chikwiza pakuba pakasi ni mpaka iya Yuda sona niya Benjamini.

Ivigaba vivyo bakazigabila inko izyakuntende

²³ “Po abaluko babo basyalako bakwiza pakuba ngati ulu: “U Benjamini akwiza pakuba nichigaba choka, chikwiza pakwandila kubufumilo bwizuba mupaka kubwinjililo bwizuba.

²⁴ “U Simiyoni akwiza pakuba ni chigaba choka, impaka iya chisu chache yikwiza pakwanda kuchisu icha Benjamini kubufumilo bwizuba mupaka kubwinjililo bwizuba.

²⁵ “U Isakala akwiza pakuba nichigaba choka, impaka iya chisu chache yikwiza pakwanda kuchisu icha Simiyoni, ukwanda kubufumilo bwizuba mupaka kubwinjililo bwizuba.

²⁶ “U Zebuloni akwiza pakuba nichigaba choka, impaka iya chisu chache yikwiza pakwanda kuchisu icha Isakala kubufumilo bwizuba mupaka kubwinjililo bwizuba.

²⁷ “U Gadi akwiza pakuba nichigaba choka, impaka iya chisu chache yikwiza pakwanda kuchisu icha Zebuloni kubufumilo bwizuba mupaka kubwinjililo bwizuba.

²⁸ “Impaka iya Gadi iyakuntende yikwiza pakwanda kuntende kuchigaba icha Tamala mupaka kumizi agha Meliba Kadeshi, po yikwiza pakwenda kulusoko ulwa Ijiputi mupaka ku Nyanja iya Medeteleniya.

²⁹ “Ichi cho chisu chicho ukwiza pakubagabila abaluko ulwa ba Izilayeli pakuba mpyana yabo, sona vinivi vikwiza pakuba vigaba vyabo.” U Mwene Uwamaka Ghosi anena.

Imilyango iya Yelusalemu

³⁰ “Yiniyi milyango iyakufumila mukaya akakulu nkani: “Ukwandila kulubazu ulwa kumitu, yiyo mubutali yili amamita 2,250,

³¹ imilyango iya kaya yikwiza pakwitiziwanga amatabwa agha baluko ulwa Izilayeli. Imilyango mitatu kulubazu ulwakumitu yikwiza pakwitiziwanga amatabwa agha Lubeni nu Yuda, sona nu Levi.

³² “Kulubazu ulwakubufumilo bwizuba, pabanje imilyango mitatu mubutali yikwiza pakuba amamita 2,250, yikwiza pakwitiziwanga amatabwa agha Yosefu nu Benjamini sona nu Dani.

³³ “Kulubazu ulwakuntende, kubanje imilyango mitatu, mubutali yibanje amamita 2,250, yikwiza pakwitiziwanga amatabwa agha Simiyoni nu Isakala, sona nu Zebuloni.

³⁴ “Kulubazu ulwa kubwinjililo bwizuba kubanje imilyango mitatu, mubutali yibanje amamita 2,250, yikwiza pakwitiziwanga amatabwa agha Gadi nu Asheli, sona nu Nafutali.

³⁵ “Akaya kosi akakulu nkani umwakuzyungulila kakwiza pakuba amamita 9,000. Ukwanda pakabalilo kalakala mupaka muntazi, akaya akakulu nkani kakwiza pakwitiziwanga ukuti, ‘U Mwene ali Palapala.’ ”