Ezekiyeli 47 - IBAYIBOLO 2024

Imbwibwi iyakufuma mu Nyumba iya Chala

¹ Umuntu yula akanyosezya kumulyango uwa Nyumba iya Chala, po nkennya amizi ghakufuma kuzi ukwamulyango ghugho ghukennya kubufumilo bwizuba. Amizi ghala ghakikilagha kuntende ukwa lubazu ulwa Nyumba iya Chala, kuntende ukwa chighemo.

² Po akamfumizya pamulyango uwa kumitu nukuzyungulizya kuzi nukufika kumulyango uwakuzi ghugho wenizye kubufumilo bwizuba, amizi ghakendagha ukufuma kuchigaba icha kuntende.

³ Bo umuntu yula akubuka kubufumilo bwizuba nichakupimila munyobe yache, akapima akasoko kala amamita ghakaba 500 po akenda nane mumizi, amizi ghala ghakafika mutupunkunyu.

⁴ Akapima sona amamita aghamwabo 500, nukwenda nane mumizi po ghakafika muvimpevu. Akapima amamita aghamwabo 500 nukwenda nane mumizi, amizi ghala ghakafika mumusana.

⁵ Akapima sona amamita 500, loli pakabalilo aka lukaba lusoko, lulo intangaloboka, pachifukwa ichakuti amizi ghakizula nkani sona ghakaba mibizu nkani.

⁶ Akandalusya akati, “Wee mwana uwa muntu, nkimba ukuvyennya vinivi?” Po akanyosezya mulubazu ulwa lusoko lula.

⁷ Bo nafika kula, nkennya amakwi aminji nkani kulubazu losi ulwa lusoko.

⁸ Po akambuzya akati, “Amizi ghakubuka muchigaba icha kubufumilo bwizuba nukubuka mwikombe ilya lusoko ulwa Yolodani, ghakwinjila mu Nyanja Imfwe, ghakughapela amizi pakuba miza nkani.

⁹ Kosi kuko ulusoko lukubuka ivipeliwa ivya mulusoko vikwiza pakuba nubumi. Iswi zikwiza pakuba nyinji nkani, pachifukwa ichakuti amizi ghakwinjila mulamula nukughapela amizi agha mbeya pakuba miza, kosi kuko ulusoko lukubuka ichipeliwa chosi chikwiza pakubanga nubumi.

¹⁰ Abalobaswi bakwiza pakwimilila mulubazu ulwa nyanja, ukwanda muchigaba icha Eni Gedi nukufika ku Eni Egilamu pakwiza pakuba ubuzilo ubwakwanikilapo ivilepa. Iswi zikwiza pakuba zya luko ulwakulekanalekana ngati iswi izya mu Nyanja iya Medeteleniya.

¹¹ Loli ubuzilo ubwa makanta mulubazu ulwa nyanja mutakwiza pakuba na mizi amiza, mukwiza pakuba mwambeya.

¹² Ivikomwa ivya luko lwakulekanalekana vikwiza pakumela mumbazu zyosi zibili izya lusoko. Amani ghache ghatakwiza pakufoka, pamo pakupotwa pakwela ivikomwa vyache. Vikwiza pakwela umwezi nu mwezi, pachifukwa ichakuti amizi aghakufuma mu Nyumba iya Chala ghakughasembelela amakwi ghala. Ivikomwa vyache vikwiza pakuba vyakulya, sona amani ghache ghakwiza pakuba ghakuposezya abantu.”

Impaka izya chisu

¹³ U Mwene Uwamaka Ghosi akuti, “Izi zyo mpaka zizyo muzikonke pakuzigabila inko 12 izya ba Izilayeli pakuba mpyana yabo, abene abaluko ulwa Yosefu bakwiza pakupokela ivigaba vibili.

¹⁴ Ukwiza pakuchigaba ichisu umwakuyana bulo. Pachifukwa ichakuti nkulapa nkwiza pakubapa abanyenya binyu, ichisu ichi chikwiza pakuba mpyana yinyu.

¹⁵ “Iyi yibanje mpaka iya chisu ukwanda kumitu ukwa Nyanja iya Medeteleniya, ukwendela mukaya akakulu nkani aka Hetiloni nukwinjila mu Lebo Hamati mupaka ku Zedadi,

¹⁶ Belota nu Sibilamu akaya kako kali pakasi pa Damasika nu Hamati, mupaka ku Hazeli Hatikoni, kako kali kumpaka iya Haulani.

¹⁷ Impaka yikwiza pakonjeleziwa ukwanda ku Nyanja iya Medeteleniya mupaka ku Hazali Enani, mulubazu ulwa mpaka iyakumitu iya Damasika, kumpaka iyakumitu ukwa chisu icha Hamati. Yiniyi yikwiza pakuba mpaka iyakumitu.

¹⁸ “Kulubazu ulwakubufumilo bwizuba impaka yikwiza pakwenda pakasi pa Haulani nu Damasika, mulubazu mulusoko ulwa Yolodani pakasi pa Giliyadi ni chisu icha Izilayeli, kubufumilo bwizuba ubwa Nyanja Imfwe mupaka ku Tamala. Yiniyi yikwiza pakuba mpaka iyakubufumilo bwizuba.

¹⁹ “Kulubazu ulwakuntende impaka yikwiza pakwandila muchigaba icha Tamala mupaka kumizi agha Meliba Kadeshi, ukufuma palapala yikwiza pakufika muchisu icha Ijiputi mupaka ku Nyanja iya Medeteleniya. Yiniyi yikwiza pakuba mpaka iyakuntende.

²⁰ “Kulubazu ulwa kubwinjililo bwizuba, Inyanja iya Medeteleniya yikwiza pakuba mpaka umwakwenannya nakaya aka Lebo Hamati. Yiniyi yikwiza pakuba mpaka iyakubwinjililo bwizuba.

²¹ “Mubagabile ichisu chinichi abaluko ulwa ba Izilayeli.

²² Mubombe amayele bo mukugabana ichisu pakuba mpyana iyinyu ni yinyu, sona nabayeni babo bakwikala pakasi papinyu, babo bapapite abana pakasi papinyu. Mubapimaye pakuba benekaya babo bapapiliwe mu Izilayeli, bakwiza pakupokela ichilingo poka nabaluko ulwa Izilayeli.

²³ Umuntu wesi umuyeni akwiza pakupokela ichilingo chache poka na baluko babo akwikala nabo.” U Mwene Uwamaka Ghosi anena.