Ezekiyeli 46 - IBAYIBOLO 2024

U mwene nu lusekelo

¹ “ ‘U Mwene Uwamaka Ghosi akuti: Umulyango uwa muchipinda icha mukasi ghugho wenizye kubufumilo bwizuba wighaliwanje amasiku sikisi agha mbombo, loli wighuliwanje Pisiku Ilyakutuzya nilya Kupanta ukwa Mwezi.

² U mwene akwinjila pamulyango uwa kanyumba, uwakufumila kuzi nukwimilila pantanda izya pamulyango. Abaputi babikaye ivyakwiyipa ivya kocha ni vyakwiyipa ivyabupoka. Iputaye pamulyango uwakufumila kuzi, loli umulyango ghutakwiza pakwighaliwa mupaka pachamabwila.

³ Pamasiku Aghakutuzya nagha Kupanta ukwa Mwezi abantu biputaye pamaso pa Mwene pabwinjililo uwa mulyango uwa lupaso.

⁴ Ichakwiyipa ichakocha chicho u mwene akubika kwa Mwene Pisiku Ilyakutuzya babanje bana abang'ozi sikisi nu dubi weka yuyo ate ni chilema nachimochimo.

⁵ Pachakwiyipa icha dubi onjelezyepo ichakwiyipa icha busu ichidudunga choka, sona ni chakwiyipa icha bana abang'ozi, u mwene abikaye ubusu mumo angalondela. Abikaye sona amalita matatu agha mafuta pa chidudunga chosi icha busu.

⁶ Pisiku ilya Kupanta ukwa Mwezi mubikaye inkambaku inandi, nabana abang'ozi sikisi nudubi weka, yuyo ate ni chilema nachimochimo.

⁷ Pachakwiyipa icha nkambaku onjelezyepo ichakwiyipa icha busu ichidudunga choka, sona ni chakwiyipa icha dubi, u mwene abikaye ubusu mumo angalondela. Abikaye sona amalita matatu agha mafuta pa chidudunga chosi icha busu.

⁸ Bo u mwene akwinjila, injililaye nukufumila pamulyango uwa lupaso, sona afumilaye pamulyango ghulaghula.

⁹ “ ‘Bo abantu aba muchisu bakwiza pamaso pa Mwene patubalilo utwa lusekelo ulupaghuliwa, umuntu wesi yuyo akwinjilila pamulyango uwa kumitu pakwiputa afumilaye kumulyango uwa kuntende, sona umuntu wesi yuyo akwinjilila pamulyango uwa kuntende afumilaye kumulyango uwa kumitu. Patakabepo umuntu uwakunyokela sona kumulyango ghugho akinjilila, loli umuntu wesi afumilaye kumulyango uwakwenannya ghula.

¹⁰ U mwene abanje pakasi papabo, nukwinjila poka nabo bo bakwinjila sona nukufuma poka nabo bo bakufuma.

¹¹ Patubalilo utwa lusekelo sona nulusekelo ulupaghuliwa, pabanje ichakwiyipa icha busu ichidudunga choka poka ninkambaku, sona ichidudunga choka icha busu nudubi weka, nabana abang'ozi abikaye mumo angalondela. Abikaye sona amalita matatu agha mafuta pa chidudunga chosi icha busu.

¹² “ ‘Bo u mwene abika ichakwiyipa icha mubwighane kwa Mwene manyi chakwiyipa ichakocha pamo ichakwiyipa ichabupoka, bamwighulilaye umulyango ghugho wenizye kubufumilo bwizuba. Akwiza pakubika ichakwiyipa ichakocha pamo ichakwiyipa ichabupoka ngati mumo akubombela Pisiku Ilyakutuzya. Po akwiza pakufumila kuzi, sona bo afuma kuzi, ulwiyi lukwiza pakwighaliliwa.

Ichakwiyipa icha isiku ni siku

¹³ “ ‘Isiku ni siku mubikaye umwana uwa ng'ozi uwa mwaka ghoka yuyo ate ni chilema nachimochimo pakuba chakwiyipa ichakocha kwa Mwene, indabindabi yosi mukwiza pakubikagha.

¹⁴ Indabindabi yosi mukwiza pakubika sona ichakwiyipa icha busu ichigaba choka pavigaba sikisi ividudunga poka namalita matatu agha mafuta aghakutontezya ubusu. Pakubika ichakwiyipa icha busu chinichi kwa Mwene lo lubanje lulaghilo ulwa bwila na bwila.

¹⁵ Po umwana uwa ng'ozi ni chakwiyipa icha busu namafuta vikwiza pakubikiwa indabindabi yosi pakuba chakwiyipa ichakocha isiku ni siku.

U mwene ni chisu

¹⁶ “ ‘U Mwene Uwamaka Ghosi akuti: Nanti u mwene akubika ichabupi ukufuma muchilingo chache kuweka uwabana bache, chope chikwiza pakuba chabana bache, pakuti chikwiza pakuba mpyana yabo.

¹⁷ Loli nanti akubika ichabupi ukufuma muchilingo chache kuweka uwa babombi bache, naloli chikwiza pakuba cha mubombi yula mupaka mumwaka uwabusatuke, po chikwiza pakunyokela kwa mwene. Ichilingo chache chabana bache abalumendo bene, chicho chabo ni chabo.

¹⁸ U mwene atakafyulaye ichilingo icha bantu, nukubachimbizyamo muchisu chabo. Abapanje abana bache ichilingo ichabo ni chabo, umwakuti patakabepo nayumo uwabantu bane uwakufyuliwa ichilingo chache.’ ”

Apakupiyilapo mu Nyumba iya Chala

¹⁹ Po umuntu yula akanyinjizya pabwinjililo palubazu ulwa mulyango uwa vipinda ivizelu vivyo vikennya kumitu, vivyo vikaba vyabaputi, nukundanjizya ubuzilo kubumalilo ubwa bwinjililo bwizuba.

²⁰ U mwene akambuzya akati, “Ubu bo buzilo bubo abaputi bakwiza pakupiyilamo ichakwiyipa ichakupepesezya inongwa sona ni mbibi nukupiya ichakwiyipa icha busu, umwakuti baleke pakufuma navyo muchipinda icha kuzi nukubapela abantu pakuba bazelu.”

²¹ Po akiza nane mulubinjilo ulwakuzi nukundanjizya munkuto zyosi folo, munkuto yili yosi nkennyamo ulubinjilo.

²² Munkuto folo zila mukaba ulubinjilo ulunandi lulo mubutali lukaba amamita 20, mububaba lukaba amamita 15, ulubinjilo losi lukayana bulo.

²³ Ukuzyungulila inkuto zyosi folo izya lubinjilo, bakabambikamo amabwe, po muntende mukaba ubuzilo ubwakupembelapo umoto.

²⁴ Akambuzya akati, “Ubu bo buzilo bubo ababombi aba mu Nyumba iya Chala bakupiyilamo ivyakwiyipa ivya bantu.”