Ezekiyeli 45 - IBAYIBOLO 2024

Ichigaba icha Mwene icha chisu

¹ “ ‘Bo mukugaba ichisu pakuba mpyana yinyu, mugabayeko ichigaba choka pakuba chigaba icha Mwene chicho chizelu. Ubutali bwache chibanje amakilomita 12 nu hafu mububaba amakilomita 10. Ichigaba chosi chikwiza pakuba chizelu.

² Muchipime ichigaba chicho chiyanite bulo imbazu zyosi, chikwiza pakuba buzilo ubwa Nyumba iya Chala, chikwiza pakuba amamita 250 kumbazu zyosi, bubo buzyunguliliwe nulubinjilo mububaba bube amamita 25.

³ U hafu uwa chigaba chinichi abanje amakilomita 12 nu hafu mububaba amakilomita fayivi. Mulamula mukwiza pakuba Inyumba iya Chala izelu nkani.

⁴ Chikwiza pakuba chigaba ichizelu icha chisu icha baputi, babo bakubomba Munyumba iya Chala nukupalamila pamaso pa Mwene nukumubombela. Bukwiza pakuba buzilo ubwa nyumba zyabo, sona nu Buzilo Ubuzelu ubwa Nyumba iya Chala.

⁵ Nkwiza pakubapa hafu uwa buzilo bwane aba Levi babo bakubombela munyumba yane, utwaya utukulu tuto bakwiza pakwikalamo tukwiza pakuba kulakula.

⁶ “ ‘Pakukonkapo Ubuzilo Ubuzelu, musale ichigaba mubutali chibe amakilomita 12 nu hafu sona mububaba chibe amakilomita mabili nu hafu. Chipaghuliwanje pakuba kaya akakulu nkani umwakuti chibanje chaba Izilayeli.

Ichisu icha mwene

⁷ “ ‘U mwene akwiza pakuba nichisu chicho chenanizye ni chisu icha buzilo ubuzelu nu buzilo ubwa kaya akakulu nkani, impaka yache yikwiza pakwennya kubwinjililo bwizuba nakubufumilo bwizuba, umwakuti ubutali bwache bukwiza pakuyana bulo nivigaba vivyo abaluko ulwa Izilayeli bagabiliwa.

⁸ Ichisu chila chikwiza pakuba mpyana iyache ni yache, po abamwene bane batakwiza pakubayivya sona abantu bane, loli bakwiza pakubitikizya aba Izilayeli pakuba ni chisu ukuyana nuluko lwabo.

Indaghilo izya mwene

⁹ “ ‘U Mwene Uwamaka Ghosi akuti: Mwabomba imbibi akabalilo akatali, mwee bamwene aba muchisu icha Izilayeli! Leka ivyongo nukubayivya abantu sona mubombaye ubwanaloli nu bugholosu. Mutakabachimbizyanjemo abantu bane muchisu chabo, u Mwene Uwamaka Ghosi anena.

¹⁰ Ivipimilo vyinyu, ichidudunga sona indobo vibanje vyiza.

¹¹ Ichidudunga nindobo vibanje vipimilo vyakuyana bulo, ivintu vivyo mwapima mundobo 10 ivya homala viyane bulo muvidudunga 10 ivya homala, homala cho chipimilo icha vintu vyosi.

¹² Ubung'wamu ubwa ndalama izya shekeli bubanje amagela 20 poka na mashekeli 20 ukonjelezyapo amashekeli 25 ukonjelezyapo sona amashekeli 15 ghakwiza pakukwana imina weka.

¹³ “ ‘Ivi vyo vibanje vyakwiyipa ivipaghuliwa, ichigaba choka pavigaba sikisi icha chidudunga icha mapemba.

¹⁴ Ivyakupimila amafuta vyope vibanje bunubu, vibanje chigaba choka pavigaba 10 ivya indobo.

¹⁵ Sona ing'ozi yoka yifumaye mumudimo ghoka uwa ng'ozi 200 zizyo zikufuma muchisu icha Izilayeli. Vinivi vyo vyakwiyipa ivya busu, ni vyakwiyipa ivyakocha sona ni chakwiyipa ichabupoka ukuti vibanje vyakupepesezya imbibi, u Mwene Uwamaka Ghosi anena.

¹⁶ Abantu bosi aba muchisu bakwiza pakubika ivyabupi ivipaghuliwa kwa mwene uwamu Izilayeli.

¹⁷ Yikwiza pakuba mbombo iya bamwene pakubika ivyakwiyipa ivyakocha, ni vyakwiyipa ivya busu ni vyakwiyipa ivya vinyo ivyapa lusekelo nu Kupanta ukwa Mwezi sona na Masiku Aghakutuzya palusekelo ulwa nyumba iya ba Izilayeli. Akwiza pakubika ivyakwiyipa ivyakupepesezya mbibi, ni vyakwiyipa ivya busu, ni vyakwiyipa ivya kocha sona ni vyakwiyipa ivyabupoka, pakuba vyakwiyipa ivyakupepesezya imbibi izya ba Izilayeli.

Amasiku agha lusekelo

¹⁸ “ ‘U Mwene Uwamaka Ghosi akuti: Pisiku ilyakwanda mumwezi uwakwanda mubaghiye pakusenda inkambaku inandi yiyo yite ni chilema nachimochimo nukuyiswefya Inyumba iya Chala.

¹⁹ Umuputi abaghiye pakusenda ibanda limo ilya chakwiyipa ichakupepesezya imbibi nukulipaka pamafulemu agha pamilyango iya Nyumba iya Chala, ninkuto zyosi folo izya chighemo, sona na pamafulemu agha pamilyingo iya lubinjilo ulwa mukasi.

²⁰ Mubombaye bunubu pisiku ilyaseveni ilya mwezi ukuti umuntu wesi yuyo akubomba imbibi umwakusita kumanya, pamo umwakusita lubatiko, po mubikaye ichakwiyipa icha kuswefesezya Inyumba iya Chala.

²¹ “ ‘Pisiku ilya 14 mumwezi uwakwanda mubanje nu Lusekelo ulwa Pasa, po mumasiku seveni mukwiza pakulya ichibama chicho chite ni chilungo.

²² Pisiku lilalila u mwene akwiza pakubika inkambaku pakuba chakwiyipa ichakupepesezya imbibi zyache sona nizya bantu bosi aba muchisu.

²³ Isiku ni siku ukwa masiku seveni agha lusekelo abikaye inkambaku seveni naba dubi seveni abasita ichilema nachimochimo pakuba chakwiyipa ichakocha kwa Mwene, sona u sabwe pakuba chakwiyipa ichakupepesezya imbibi.

²⁴ Abikaye pakuba chakwiyipa icha busu ubwakukwana ikilogalamu lyoka pankambaku yoka sona ikilogalamu lyoka padubi weka, poka namalita folo agha mafuta pa kilogalamu lyoka.

²⁵ Pisiku ilya 15 mumwezi uwaseveni, mumasiku seveni agha lusekelo, akwiza pakubika ichakwiyipa ichakupepesezya imbibi, ni chakwiyipa ichakocha, ni chakwiyipa icha busu sona ni chakwiyipa icha mafuta.