Ezekiyeli 44 - IBAYIBOLO 2024

Imbombo iya mulyango uwa kubufumilo bwizuba

¹ Po umuntu akanyosezya kumulyango uwakuzi kubuzilo ubuzelu, ghugho ghukennya kubufumilo bwizuba, sona ghukighaliliwa.

² U Mwene akambuzya akati, “Umulyango ughu ghubanje mwighalile. Ghutakighuliwanje, patakabepo nayumo umuntu uwakwinjililapo. Ghubanje mwighalile pachifukwa ichakuti u Mwene, u Chala uwa Izilayeli, weyuyo akwinjililapo.

³ U mwene weyuyo mwene akwikalamo nukulya ichakulya pamaso pa Mwene. Akwiza pakwinjilila nukufumila kuntanda ukwendela pamulyango ghulaghula.”

Indaghilo izya kwinjilila mu Nyumba iya Chala

⁴ Po umuntu yula akabuka nane kumulyango uwa kumitu kuntazi ukwa Nyumba iya Chala. Nkennya ubuchindamu ubwa Mwene bwizuye Munyumba yache, nukuwa umwakukupama.

⁵ U Mwene akambuzya akati, “Wee mwana uwa muntu, enelezya nkani nukuteghelezya ku zyosi zizyo nkukubuzya ukuyana ni ndaghilo izya Nyumba iya Mwene. Wenelezye nkani babo babaghiye bakwinjila Mubuzilo Ubuzelu na babo batabaghiye pakwinjilamo.

⁶ Ubabuzye abasambuke aba Izilayeli uti, ‘Izi zyo zizyo u Mwene Uwamaka Ghosi anena ukuti: Mwee ba Izilayeli leka pakubomba ivyamwiko!

⁷ Bayinyazya Inyumba yane pakubinjizya abayeni abasita ukusilimuliwa mumoyo Mubuzilo Ubuzelu, nukuyinyazya Inyumba yane bo mukumpa ivyakulya, amafuta ni banda, po mwalunangannya ulufingo lwane pakubomba ubunyazu.

⁸ Mutakuvisunga akiza ivintu vyane ivizelu, loli mwabasala abeyeni ukuti basungaye Ubuzilo bwane Ubuzelu.

⁹ Polelo u Mwene Uwamaka Ghosi akuti: Atakabepo umuyeni yuyo atasilimuliwe mumoyo nakumubili ukuti injilaye Mubuzilo bwane Ubuzelu, pamo umuyeni yuyo akwikala pakasi paba Izilayeli.

Aba Levi babefyamo mubuputi

¹⁰ “ ‘Aba Levi babo bakepako kukwane bo aba Izilayeli basobela, pachifukwa chakubakonka abachala abanji, babaghiye pakupokela ulufundo pachifukwa icha mbibi zyabo.

¹¹ Bakwiza pakuba babombi bane Mubuzilo bwane Ubuzelu, ukuti babanje balindilili abapamulyango uwa Nyumba iya Chala nukubomba mulamula. Baghoghe ichinyamana pakuba chakwiyipa ichakocha sona ni chakwiyipa icha bantu, bakwiza pakwimilila pamaso pabantu nukubabombela.

¹² Loli pachifukwa ichakuti bakababombela pamaso pavifwani vyabo nukubapela aba Izilayeli pakunanga, polelo nkulapa ukuti bakwiza pakufundiwa, pachifukwa icha mbibi zyabo u Mwene Uwamaka Ghosi anena.

¹³ Batakapalamilaye nukumbombela ngati baputi pamo pakupalamila kuvintu vyane ivizelu pamo ivyakwiyipa vyane ivizelu, loli bakwiza pakukoziwa isoni pachifukwa icha mwiko ghugho babomba.

¹⁴ Loli nkwiza pakubimika pakuba balindilili aba mu Nyumba iya Chala sona ni mbombo zyosi zizyo babaghiye pakubomba mulamula.

Abaputi

¹⁵ “ ‘Loli abaputi aba Levi, babo baluko ulwa Zadoki, sona na babo bakambombela umwakusubiliwa Mubuzilo bwane Ubuzelu, bo aba Izilayeli bepako kukwane, bapalamiliye kupipi pamaso papane ukuti bambombelaye, bimililaye pamaso papane pakubika ichakwiyipa ichamafuta nibanda, u Mwene Uwamaka Ghosi anena.

¹⁶ Banaba bene bo babo bakwiza pakwinjila Mubuzilo bwane Ubuzelu, nukupalamila papipi ni tebulo lyane ukuti bambombaye pamaso papane nukubomba imbombo yane.

¹⁷ “ ‘Bo bakwinjila pamulyango uwa lubinjilo ulwa mukasi, bavwalaye amenda amatonte, batakavwalaye inkazo izya meya bo bakumbombela mulubinjilo ulwa mukasi pamo mukasi mu Nyumba iya Chala.

¹⁸ Bavwalaye utupewa ututonte kumitu yabo sona ni nkazo izya mukasi mumisana yabo. Batakavwalaye chimo chicho chikubapelela amafuku.

¹⁹ Bo bakwepamo mulubinjilo ulwakuzi, kuko kuli abantu, bavulaye amenda ghagho babombelagha nukughaleka muvipinda ivizelu, nukuvwala amenda aghanji, umwakuti batakabapaghule abantu ni nkazo zyabo.

²⁰ “ ‘Batakamwanje isisi kumitu yabo pamo ukulileka ukuti libanje litali, loli badumulilaye bulo isisi lyabo.

²¹ Atakabepo nayumoyumo umuputi uwakung'wela uvinyo, bo akwinjila mulubinjilo ulwamukasi.

²² Batakasendaye abakolo abafwilwe pakuba bachi babo pamo abakolo abakusoka, loli basendaye abalindu babo batamumenyemo nalumo umwanavuli uwa luko ulwa Izilayeli pamo umufwilwe yuyo umulume akaba muputi.

²³ Babamanyisyanje abantu bane ukulekana ukwa vintu ivizelu ni vintu vivyo te vizelu nukubalanjizya pakulesannya pakasi pavinyazu ni viswepu.

²⁴ “ ‘Posi papo abantu babwindana abaputi babombaye imbombo iyabulongi ukuyana ni ndaghilo zyane. Basungililaye indaghilo zyane na malamulo ghane pamasiku ghosi aghalusekelo amapaghuliwa.

²⁵ “ ‘Umuputi atakinyazyanje pakupalamila papipi nu muvimba, loli nanti yuyo afuye we wise pamo we nyina, umwana umulumendo pamo umulindu, uwamwabo pamo umuyemba yuyo atasendiwe, po anginyazya mwene.

²⁶ Pisinda pache nanti iswefya, abaghiye pakulindilila amasiku seveni po akwiza pakuswepa.

²⁷ Pisiku lilyo akwinjila mulubinjilo ulwamukasi pakubomba imbombo Mubuzilo Ubuzelu, ibikilaye mwene ichakwiyipa ichakupepesezya imbibi, u Mwene Uwamaka Ghosi anena.

²⁸ “ ‘Abaputi batakwiza pakuba nichilingo. Po mutakabape ichintu nachimochimo muchisu icha Izilayeli. Ane nkwiza pakuba mpyana yabo.

²⁹ Bakwiza pakulya ivyakwiyipa ivya busu, nivyakwiyipa ivyakupepesezya imbibi sona ni chakwiyipa ichakupepesezya inongwa sona ni vintu vyosi vivyo aba Izilayeli bakwiyipa kwa Mwene vikwiza pakuba vyabo.

³⁰ Ivikomwa vyosi ivyiza ivyakwanda pakutona sona ni vyabupi ivipaghuliwa vikwiza pakuba vya baputi. Mubapanje ivyakulya ivyiza ivya busu umwakuti ulusayo lubanje panyumba zyinyu.

³¹ Abaputi batakalyanje nachimochimo, ichiyuni pamo ichinyamana, chicho chifuye chene pamo ichakulemiwa ni vinyamana ivya munkolongo.