Ezekiyeli 42 - IBAYIBOLO 2024

Inyumba zibili papipi ni Nyumba iya Chala

¹ Pisinda pache umuntu yula akabuka nane muchipinda icha mukasi, chicho chikennya kumitu, akansendela sona kutuvipinda tuto tukenannya nulubinjilo ulwa Nyumba iya Chala, sona ni nyumba iyakumitu.

² Inyumba yiyo yikennya kumitu ubutali yikaba amamita 50 mububaba yikaba amamita 25.

³ Yikenannya ni ntanda yiyo mububaba yikaba amamita 10, ubuzilo bunubu bukenannya nabubo bakalapo amabwe, bubo bukaba nichipinda icha kuzi. Inyumba zikaghelesannya patatu yoka pamwanya payamwabo.

⁴ Pantazi pavipinda vila mukaba akazila akamukasi kako mububaba kakaba amamita fayivi, mubutali kakaba amamita 50. Imilyango yache yikaba kumitu.

⁵ Ivipinda ivyapamwanya vikaba vifinye ukuchila ivipinda ivyapakasi sona navivyo vikabapo pasi pachifukwa ichakuti utuzila tukasenda ubuzilo ubukulu ukuchila ivipinda vila.

⁶ Ivipinda ivya chigaba ichabutatu vitakaba ni mpanda, napapo ulubinjilo ulwa kuzi lukaba ni mpanda. Ivipinda ivya pamwanya vikabapo vinandi ukuchila ivya pakasi nivya chigaba ichapakasi.

⁷ Kukaba ichibumba ichakuzi chicho chikalekana ni vipinda sona nulubinjilo, kuntazi ukwa vipinda kukonjeleziwako amamita 25.

⁸ Ubutali ubwa vipinda vivyo vikaba papipi nulubinjilo vikaba amamita 25, sona vivyo vikaba kupipi nu buzilo ubuzelu vikaba amamita 25.

⁹ Ivipinda ivyapasi vikaba numulyango kubufumilo bwizuba bo umuntu yumo akwinjila ukufuma palubinjilo.

¹⁰ Kuchigaba icha kuntende, mulubazu ulwa lubumba ulwakuzi ulwa Nyumba iya Chala, kuko kukaba ivipinda,

¹¹ kuntazi ukwa vipinda kukabako akazila. Tukayana bulo nutuvipinda utwa kulubazu ulwakumitu, tukaba amamita aghakuyana bulo mubutali na mububaba, akapangile aka milyango kakuyana bulo mukasi na kuzi, ni nyiyi izya kumitu

¹² mutuvipinda utwa kulubazu ulwakuntende kukaba imilyango kukazila akabwandilo kako kakennya kuchibumba ichakubufumilo bwizuba, mumo umuntu anginjililaghamo.

¹³ Po akambuzya akati, “Ivipinda ivyakumitu na kuntende vivyo vyenizye ulubinjilo ulwa Nyumba iya Chala vipinda ivya baputi, abaputi babo bakumubombela u Mwene bakwiza pakulya ivyakwiyipa ivizelu nkani. Palapala bakwiza pakubika ivyakwiyipa ivizelu nkani ivyakwiyipa ivya busu, ni vyakwiyipa ivya kupepesezya imbibi sona ni nongwa, pachifukwa ichakuti ubuzilo buzelu.

¹⁴ Nanti abaputi binjila Mubuzilo Ubuzelu bula, batabaghiye pakufumamo muchipinda chila nukwinjila muchipinda ichakuzi ukusita ukuti bavule amenda ghabo aghabuputi ghagho bakubombela, pakuti mazelu. Babaghiye pakuvwala amenda aghanji bo bachili ukubuka kupipi nu buzilo ubwa bantu.”

Ukupimiwa ukwa buzilo bosi ubwa Nyumba iya Chala

¹⁵ Bo amalizya pakupima vivyo vikaba mukasi mu Nyumba iya Chala, akabuka nane kumulyango uwa kubufumilo bwizuba nukupima ubuzilo umwakuzyungulila.

¹⁶ Akapima ulubazu ulwakubufumilo bwizuba nindisa iyakupimila, lukaba amamita 250.

¹⁷ Akapima nindisa iyakupimila ulubazu ulwa kumitu, lukaba amamita 250.

¹⁸ Akapima ulubazu ulwa muntende, lukaba amamita 250.

¹⁹ Po akapima kulubazu ulwa kubwinjililo bwizuba lukaba amamita 250.

²⁰ Umwakuti akapima inkuto zyosi folo zizyo zikazyunguliliwa nichibumba, amamita ghakaba 250 imbazu zyosi, ukulesannya Ubuzilo Ubuzelu ku bubo bunyazu.