Ezekiyeli 41 - IBAYIBOLO 2024

¹ Po umuntu yula akansendela mu Buzilo Ubuzelu Nkani, akapima izila iyakubukila mukasi yiyo mububaba yikaba amamita matatu.

² Umulyango ghukaba amamita fayivi mububaba, po ubukulu ubwa vibumba ivya mulubazu mumulyango vikaba amamita mabili nu hafu imbazu zyosi. Akapima sona Buzilo Ubuzelu Nkani bula ubutali bukaba amamita 20, mububaba bukaba amamita 10.

³ Po akinjila mu Buzilo Ubuzelu Nkani nukupima ivibumba vyosi ivya mbazu zibili, mububaba yikaba nimita lyoka, ubutali bukaba amamita matatu, ubukulu ubwa vibumba bukaba amamita matatu nu hafu.

⁴ Po akapima ubutali nu bubaba ubwa Buzilo Ubuzelu Nkani bubo bukaba namamita 10 umwakuyana bulo, akambuzya akati, “Ubu bo Buzilo Ubuzelu Nkani.”

Ivipinda vyapalamasannya ni Nyumba iya Chala

⁵ Po akapima ubukulu ubwa lubumba ulwa Nyumba iya Chala, lukaba amamita matatu. Ulubazu losi ulwa Nyumba iya Chala lukapalamasannya nivipinda vivyo vikaba amamita mabili.

⁶ Inyumba zikaghelesannya patatu yoka pamwanya payamwabo, Inyumba yosi yikaba nivipinda 30. Palubumba ulwa Nyumba iya Chala pakaba ivyakulema ivipinda vila umwakuti vitakeghamilaye ku Nyumba iya Chala.

⁷ Ivipinda ivya mulubazu ukuzyungulila Inyumba yosi iya Chala vikaba vikulu, tukonjelela pakuba tukulu ukwanda pachipinda ichinji, pachifukwa ichakonjelapo ukuzenga pakaba amakwelelo aghakukwelela pamwanya, ukufuma pachigaba ichapasi mupaka pachapamwanya ukwendela pachigaba ichapakasi.

⁸ Po nkennya Inyumba iya Chala yizengiwe pabuzilo ubwapamwanya, ulwalo ulwa vipinda ivya mulubazu mububaba vikaba amamita mabili nu hafu.

⁹ Ichibumba ichakuzi muvipinda ivya mulubazu mubukulu chikaba amamita mabili nu hafu. Pakasi pakaba akazila akakwinjilila muvipinda kubumalilo ubwa Nyumba iya Chala, ughunji ghukaba kulubazu ulwakuntende ulwa Nyumba iya Chala,

¹⁰ sona ivipinda ivya baputi vikaba amamita 10 umwakupalamasannya ni Nyumba iya Chala.

¹¹ Imilyango iya vipinda iya mulubazu yikighukilagha kubuzilo ubwa pantanda, umulyango ghoka ghukighukalagha kumitu, ughunji kuntende, po mububaba ubwa buzilo bula ubwa pantanda bukaba amamita mabili nu hafu ukuzyungulila kosi na kosi.

Ubuzengi kubwinjililo bwizuba

¹² Kukaba inyumba iyinji yiyo yikennya kulubinjilo ulwa Nyumba iya Chala kulubazu ulwa kubwinjililo bwizuba. Mubutali yikaba amamita 45. Mububaba yikaba amamita 35, ulubumba mubukulu lukaba amamita mabili nu hafu.

Ukupimiwa kosi ukwa Nyumba iya Chala

¹³ Po akapima Inyumba iya Chala mubutali yikaba amamita 50, sona ulubinjilo ulwa Nyumba iya Chala ni nyumba nivibumba vyope vikaba amamita 50.

¹⁴ Mububaba ubwa lubinjilo ulwa Nyumba iya Chala kubufumilo bwizuba, ukonjelezya na kuntazi ukwa Nyumba iya Chala, kope kukaba amamita 50.

¹⁵ Po akapima ubutali ubwa nyumba yiyo yikennya kulubinjilo kubwinjililo bwizuba, ku Nyumba iya Chala. Akapima sona ivipinda vyache kulubazu kosi na kosi, amamita ghakaba 50. Pamulyango uwa kwinjilila uwa kuzi nu wamukasi uwa Buzilo Ubuzelu, sona nu Buzilo Ubuzelu Nkani,

Mukasi mu Nyumba iya Chala

¹⁶ sona akachipinda aka pabwinjililo muchipinda icha Nyumba iya Chala Mubuzilo Ubuzelu nkani nakanyumba pabwinjililo vikamamatiziwa na matabwa, sona ukonjelezyapo nu buzilo bukakupikiliwa namatabwa. Pasi nulubumba, sona mupaka mumwanya mumabwindo, amabwindo ghakakupikiliwa. Vikamamatilana pamwanya namuntende mumabwindo.

¹⁷ Ukwanda kuzi mupaka mukasi mulubumba ulwa Nyumba iya Chala ukuzyungulila Ubuzilo Ubuzelu mukasi na kuzi sona na palubumba

¹⁸ pakalabiwa na bakelubi, bakasimbamo abakelubi namabale. Amabale pakasi pabakelubi sona ukelubi pakasi pamabale. Ukelubi wesi akaba nivyeni vibili,

¹⁹ icheni icha muntu chikennya ku mabale kulubazu loka sona ulubazu ulunji kukaba icheni icha nkalamu yiyo yikennya kulubazu ulunji ulwa mabale. Vikabiziwa nukupayikiwa umwakuzyungulila Inyumba yosi iya Chala.

²⁰ Ukwanda pasi ukufika pamulyango uwapamwanya, abakelubi na mabale Vikabiziwa nukupayikiwa kuzi ukwa lubumba ukwa buzilo ubuzelu.

²¹ Kuzi ukwa buzilo ubuzelu imilyango yache kosi nakosi yikayana bulo mubutali na mububaba, po kuntazi ukwa Buzilo Ubuzelu Nkani vikayana bulo.

Ichighemo icha matabwa

²² Pakaba ichighemo mumwanya chikaba imita lyoka nu hafu, mububaba imita lyoka, munkuto zyache. Pasi na mumbazu zyache vikaba vyamatabwa. Po umuntu akambuzya akati, “Ili lyo litebulo lilyo lili pamaso pa Mwene.”

Imilyango

²³ Inyumba iya Chala yila nu Buzilo Ubuzelu Nkani vikaba ni milyango mibili.

²⁴ Pamulyango ghosi pakaba ivigaba vibili ivyakulekana.

²⁵ Panyiyi zibili izya muchipinda ichakukomanilamo pakalabiwa abakelubi abakubiziwa na mabale ngati babo bakapayikiwa palubumba, kuzi kukaba amatabwa aghakuzighila pamulyango wakwinjilila muchipinda.

²⁶ Mulubazu ulwa chipinda mukaba utumabwindo utunandi sona na makwi agha mabale ghagho ghakabiziwa ulubazu loka. Mutuvipinda utwa mulubazu ulwa Nyumba iya Chala mope mukaba ivyakupayika.