Ezekiyeli 40 - IBAYIBOLO 2024

Ichisetuka icha Nyumba iya Chala iya muntazi 40.1—48.35 U Ezekiyeli asendiwa ukubuka ku Yelusalemu

¹ Pisiku iya 10 kubwandilo ubwa mwaka uwa 25 bo tuli mubuzya, mumwaka uwa 14 uwa kuwa ukwa kaya aka Yelusalemu, pisiku lilalila amaka agha Mwene ghakanyizila, po akansendela kulakula.

² Muvisetuka ivya Chala akansenda muchisu icha Izilayeli nukumbika pakanenela aka lighamba, kulubazu ulwa muntende kukaba ubuzengi bumo bubo bukabonekagha ngati kaya akakulu nkani.

³ Akansendela kulakula, sona nkennya umuntu yuyo akabonekagha ngati mukuba, akimilila pamulyango bo alemite ulukusa ulutonte, ni ndisa iyakupimila munyobe yache.

⁴ Umuntu yula akambuzya akati, “Wee mwana uwa muntu, ennya namaso ghako sona ivwa namakutu ghako, teghelezya kuvyosi vivyo nkukulanjizya, pakuti cho chifukwa wiziye kuno. Ubabuzye aba Izilayeli vyosi vivyo ukuvyennya.”

Inyumba iyakwinjilila mulubinjilo kubufumilo bwizuba

⁵ Po nkalwennya ulubumba luzyunguliye ulubinjilo ulwa Nyumba iya Chala. Ubutali ubwa ndisa yakupimila, yiyo yikaba munyobe izya muntu yula mubutali yikaba amamita matatu. Bo apima ulubumba mububaba lukaba amamita matatu sona mubutali lukaba amamita matatu.

⁶ Po akabuka kunyumba iyakwinjilila mulubinjilo lulo lukennya kubufumilo bwizuba. Akakwela pamakwelelo nukupima inyumba, ubwibizu bwache bukaba amamita matatu.

⁷ Muvipinda ivya balindilili mubutali vikaba amamita matatu, mope mububaba mukaba amamita matatu, bukabapo sona ubuzilo ubwakwendapo mukasi muvipinda ivya mulubazu bope bukaba amamita matatu. Kubumalilo ubwa kazila akakwendamo kukabako ichipinda icha mulyango uwa mukasi akakwennya ku balaza ilya Nyumba iya Chala kakaba amamita matatu.

⁸ Po akapima sona ichipinda pamulyango,

⁹ ubwibizu bwache bukaba amamita folo. Akachipinda aka pamulyango akakwenannya ni Nyumba iya Chala kakaba ni mita lyoka.

¹⁰ Mukasi mu mulyango uwakubufumilo bwizuba mukabamo ivipinda vitatu. Imbazu zyosi zikayana bulo, ivibumba vivyo vikaba pakasi vyope vikayana bulo.

¹¹ Po akapima mububaba ubwa pamulyango, bukaba amamita sikisi nu hafu, mubutali mukaba amamita fayivi.

¹² Kuntazi ku vipinda ivya balindilili kukaba ulubumba lulo mumwanya lukaba hafu mita. Ivipinda ivya mulubazu vila vikaba amamita matatu.

¹³ Akapima umulyango ukwanda pamwanya palubumba loka ulwa chipinda choka mupaka pamwanya umwakwenannya nulubumba ulwamwabo, ubutali bwache bukaba amamita 12 nu hafu.

¹⁴ Akapima ichipinda icha mulyango uwakubukila kulubinjilo, po akapima ichipinda chila mububaba bwache bukaba amamita 10.

¹⁵ Ukwanda pamulyango ukufika kubumalilo ubwa chipinda icha mukasi chikaba amamita 25.

¹⁶ Mukaba amabwindo mulubumba ulwa vipinda vyosi ivya mukasi sona na pakasi pavipinda. Kuzi kuvibumba vyache kukalabiwa namabale agha kubiziwa.

Ulubinjilo ulwa kuzi

¹⁷ Po akanyinjizya mulubinjilo ulwa kuzi. Palapala nkennya ivipinda vimo nu musebo ghugho ghukazengiwa na mabwe umwakuzyungulila ulubinjilo losi. Mukabamo ivipinda 30 mulubazu ulwa musebo ghula.

¹⁸ Umusebo ghukenda mulubazu ulwa milyango yila, umwakuyana nubutali ubwa milyango yila. Ghulaghula ghukaba musebo wamuntende.

¹⁹ Po akapima ubutali ukufuma mukasi pamulyango uwapasi mupaka kuzi ukwa chipinda icha mukasi, chikaba namamita 50 kubufumilo bwizuba nakumitu bulo.

Inyumba iyakwinjilila mulubinjilo ulwa kumitu

²⁰ Po akapima mubutali namububaba ubwa nyumba iyakwinjilila mulubinjilo yiyo yikennya kumitu, iyakufumila kulubinjilo ulwa kuzi.

²¹ Ivipinda ivya balindilili vikabapo vitatu kumbazu zyosi mukazila akakwendamo. Ivibumba vivyo vikaba pakasi sona nichipinda ichikulu nkani vyosi vikayana bulo ninyumba iyakwinjilila mulubinjilo ubwa kubufumilo bwizuba. Akazila kosi akakubukila kumulyango mubutali kakaba namamita 25, mububaba amamita ghakaba 12 nu hafu.

²² Umulyango uwakwinjilila, amabwindo sona namabale vikayana bulo ninyumba iyakubufumilo bwizuba. Inyumba yila yikaba na makwelelo seveni aghakukwelela kuko, po umulyango uwakwinjilila ghukaba kubumalilo umwakwenannya nulubinjilo.

²³ Pakaba umulyango mulubinjilo ulwa kuzi lulo lukenannya nulubinjilo ulwa kumitu, ngati mumo ghukabela uwa kubufumilo bwizuba. Akapima ukufuma kumulyango uwamwabo ukufika pamulyango ughunji, po pakaba amamita 50.

Inyumba iyakwinjilila mulubinjilo ulwakuntende

²⁴ Po akandongozezya kulubazu ulwakuntende sona nkennya inyumba yiyo yikennya kuntende. Akapima utuvipinda twache, tosi tukayana bulo ngati vipinda ivinji.

²⁵ Mukabamo amabwindo mulubumba ngati mumo ivibumba ivinji vikabela. Ubutali ubwa nyumba yiniyi bukaba amamita 25 sona mububaba mukaba amamita 12 nu hafu.

²⁶ Pakabapo amakwelelo seveni, aghakukwelela pamwanya sona umulyango uwakwinjilila ghukaba kubumalilo umwakwenannya nulubinjilo. Mulamula imbazu zyosi zibili izya vibumba mukalabiwamo amabale aghakubiziwa.

²⁷ Inyumba iyakubwinjililo ubwa lubinjilo mope mukaba inyumba yiyo yikennya kuntende, akapima ukufuma panyumba iyi, mupaka panyumba iyakuzi kulubazu ulwakuntende, pakaba amamita 50.

Ulubinjilo ulwa mukasi: Inyumba iyakuntende

²⁸ Po umuntu yula akansendela mulubinjilo ulwamukasi ukwendela kunyumba iyakuntende. Akapima inyumba yila, po yikayana bulo niyamwabo iyakuzi.

²⁹ Ivipinda vyache ivya balindilili ivya mulubazu, ninyumba iyakwinjilila mulubinjilo, sona nivibumba ivya mukasi vikayana bulo ninyumba iyinji yila. Mukaba sona amabwindo muvibumba sona na muvipinda vyache ukuzyungulila. Ubutali bwache bukaba amamita 25 sona mububaba mukaba amamita 12 nu hafu.

³⁰ Vikabapo ivipinda munyumba iyakwinjilila mulubinjilo ukuzyungulila. Mubutali mukaba amamita 50 sona mububaba mukaba amamita 12 nu hafu.

³¹ Umulyango uwakwinjilila ghukenannya nulubinjilo ulwa kuzi, sona amabale aghakubiziwa ghakalabiwa mulubumba nukugholoka bulo nakazila akakwendamo. Sona pakabapo amakwelelo eyiti.

Ulubinjilo ulwa mukasi: Inyumba iyakubufumilo bwizuba

³² Po umuntu yula akansendela mulubinjilo ulwamukasi kulubazu ulwa bufumilo bwizuba. Akapima inyumba yila, yope yikaba namamita ukuyana bulo niyamwabo.

³³ Ivipinda vyache ivya balindilili ivya mulubazu, ninyumba iyakwinjilila mulubinjilo, sona nivibumba ivya mukasi vikayana bulo ninyumba iyinji yila. Mukaba sona amabwindo muvibumba sona na muvipinda vyache ukuzyungulila. Ubutali bwache bukaba amamita 25 sona mububaba mukaba amamita 12 nu hafu.

³⁴ Ichipinda ichakwinjilila chikenannya nulubinjilo ulwakuzi, amabale aghakubiziwa ghakalabiwa kumbazu zyosi izya vibumba, ghakaba na makwelelo eyiti.

Ulubinjilo ulwa mukasi: Inyumba iyakumitu

³⁵ Po akansendela kunyumba iyakumitu nukuyipima. Yope yikaba namamita aghakuyana bulo niyamwabo yila.

³⁶ Ivipinda vyache ivya balindilili ivya mulubazu, poka nimpanda zizyo zikalema ivibumba nichipinda ichakwinjilila sona namabwindo umwakuzyungulila, mubutali vikaba amamita 25, mububaba vikaba amamita 12 nu hafu.

³⁷ Ichipinda ichakwinjilila chikenannya nulubinjilo ulwakuzi, amabale aghakubiziwa ghakalabiwa kumbazu zyosi izya vibumba, ghakaba na makwelelo eyiti.

Inyumba izya kuyanizizyamo ivyakwiyipa

³⁸ Mulubinjilo ulwakuzi kukabako ichipinda ichakonjelezyako chicho chikazengiwa kunyumba iyakwinjilila mukasi kulubazu ulwa kumitu, chicho chikighukilagha muchipinda ichakwinjilila umwakenannya nulubinjilo ulwa kuzi, po palapala bakasukilaghapo ivinyamana pakuba chakwiyipa ichakocha.

³⁹ Muchipinda chakwinjilila mukabamo amatebulo folo, amatebulo mabili kulubazu loka ulwa chipinda. Pamatebulo ghanagha bakaghoghelaghapo ivinyamana vivyo vikabikiwanga pakuba vyakwiyipa pamo pakuba vyakwiyipa ivyakocha pamo pakuba chakwiyipa ichakupepesezya imbibi pamo inongwa.

⁴⁰ Po kuzi ukwa kachipinda kukaba amatebulo folo aghakuyana bulo, amatebulo mabili ghakaba kulubazu loka ulwa inyumba iyakwinjilila mulubinjilo ulwa kumitu.

⁴¹ Mukaba amatebulo folo kulubazu loka ulwa nyumba yila sona ulubazu ulunji ghakaba folo, ghosi poka ghakabapo amatebulo eyiti, papo bakaghoghelaghapo ivinyamana ivya chakwiyipa.

⁴² Po pakabapo sona amatebulo folo agha mabwe aghakubiza aghakubikila ivyakwiyipa ivyakocha, mubutali ghakaba imita lyoka, mububaba ghakaba imita lyoka, mumwanya ghakaba amasentimita 70. Bakabikaghapo ivibombelo ivyakughoghela ivinyamana ivya chakwiyipa ichakocha nivyakwiyipa ivinji.

⁴³ Muchipinda mula mukabamo isikulo ukuzyungulizya ulubumba. Isikulo zila zikaba amasentimita seveni. Amatebulo ghakaba ghakubikapo inyama iyachakwiyipa.

⁴⁴ Po akansenda nukunyinjizya mulubinjilo ulwa mukasi mumo mukaba utuvipinda tubili, koka kulubazu ulwakwenannya ninyumba iyakwinjilila mulubinjilo ulwa kumitu, iyinji yikennya kuntende.

⁴⁵ Akambuzya akati, “Ichipinda chicho chenizye kuntende chabaputi babo bakubomba mu Nyumba iya Chala,

⁴⁶ ichipinda chicho chikennya kumitu chabaputi babo bakubomba pachighemo. Banaba bo baluko ulwa Zadoki, babo bene bakaba ba Levi babo bangapalamila kwa Mwene nukumubombela.”

Ulubinjilo ulwa mukasi ni Nyumba iya Chala

⁴⁷ Po akapima ulubinjilo lula, mubutali na mububaba lukaba amamita 50 umwakuyana bulo. Ichighemo chikabanga kuntazi mu Nyumba iya Chala.

⁴⁸ Akansenda muchipinda chakwinjilila mu Nyumba iya Chala, akapima umulyango ubwibizu bukaba amamita mabili nu hafu sona mububaba ghukaba amamita seveni, ivibumba ubukulu bwache vikaba imita lyoka nu hafu imbazu zyosi.

⁴⁹ Ubutali ubwa chipinda ichakwinjilila bukaba amamita 10, mububaba bukaba amamita sikisi. Pakabapo amakwelelo 10, sona zikabako impanda kumbazu zyosi.