Ezekiyeli 4 - IBAYIBOLO 2024

U Ezekiyeli akulanjizya ichifwani ichakuzyunguliliwa ukwa Yelusalemu

¹ Po u Chala akati, “Wee mwana uwa muntu, senda injelwa uyibike pantazi papako nukukajambulapo akaya akakulu nkani aka Yelusalemu.

² Po yannya injelwa pakuba ngati kaya akakulu nkani. Uzenge ulubumba abalwani bakukazighilila akaya, uzenge ivighemo ni chitembe, sona uzenge ni visakasa umwakukazyungulila akaya kosi na kosi.

³ Po senda ichela ichipapate nukuchibika pakasi papako nakaya akakulu nkani nukughalabukila kulakula. Kakwiza pakuzyunguliliwa, po akaya akakulu nkani kaboneke pakuba kakuzyunguliliwa. Ichi chikwiza pakuba chimanyilo kuba Izilayeli.

⁴ “Po lambalala kulubazu ulwa kumongo nukubika imbibi izya ba Izilayeli papako. Ubaghiye pakunyamula imbibi zyabo amasiku ghagho ukwakuyana na masiku ukwiza pakulambalala.

⁵ Nakupa amasiku aghakuyana amaka agha mbibi zyabo. Po amasiku 390 ukwiza pakunyamula imbibi izya ba Izilayeli.

⁶ “Nanti wamala bulo izi, ulambalale sona, pakabalilo aka ulambalale kulubazu lwako ulwa ndilo, ukwiza pakunyamula imbibi izya ba Yuda. Nakupa amasiku 40, isiku lyoka ilyakuyana nu mwaka ghoka.

⁷ Ennya icheni chako kukaya akakulu nkani aka Yelusalemu kako kazyunguliliwe, kwezya inyobe yako mumwanya, bo ukalaye po ulaghule nizya kunanganika ukwa Yelusalemu.

⁸ Nkwiza pakukupinya ninkusa umwakuti utakaghalabukile uku na uku mupaka umalizye amasiku ghako aghakuzyunguliliwa.

⁹ “Senda ingano na mapemba, amalima nu tubala, amalezi ni vilombe. Visunge musonta iyakusungilamo po uviyannye pakuba chibama chako. Ulyanje amasiku 390 bo ulambalaye kulubazu lwako.

¹⁰ Pima ichakulya chako chicho ukulya isiku ni siku amagilamu 230.

¹¹ Upime sona imbako zibili izya mizi aghakung'wela agha isiku ni siku.

¹² Ulyanje ichakulya chicho chiyaniziwe ngati chibama icha mapemba. Chiyannye pamaso pabantu, pakubombezya umoto uwa vinyazyu ivya bantu.”

¹³ Po u Mwene akati, “Pakubomba bunubu aba Izilayeli bakwiza pakulya ivyakulya vivyo Ululaghilo lwane lukukana pakasi pa inko kuko nkwiza pakubachimbizizyako.”

¹⁴ Po nkati, “Awe, Mwene Uwamaka Ghosi! Intinyazizyepo nalumolumo. Ukwanda kubunandi bwane mupaka ilelo intaliyepo ichinyamana ichakufwa chene pamo chicho ichinyamana chaghogha sona intaliyepo inyama inyazu.”

¹⁵ Po akati, “Vili akiza bulo, nkwiza pakukwitikizya pakupiya ivibama pasakwi, mubuzilo ubwa vinyazu ivya bantu.”

¹⁶ Po akambuzya akati, “Wee mwana uwa muntu, nkwiza pakubawisizya izala mu Yelusalemu. Bakwiza pakulya ichakulya, loli bakwiza pakulyanga nubogha. Bakwiza pakupima amizi aghakung'wela nukung'wela umwakupasya.

¹⁷ Pakuti amizi ni chakulya vikwiza pakubamalila. Bakwiza pakwenannyanga bulo, sona bakwiza pakumalila zila, po bakwiza pakufwa pachifukwa icha mbibi zyabo.”