Ezekiyeli 39 - IBAYIBOLO 2024

Ukupotwa ukwa Gogi

¹ U Mwene Uwamaka Ghosi akuti, “Wee mwana uwa muntu, laghula nukumususya u Gogi umubuzye uti, ‘U Mwene Uwamaka Ghosi akuti: Nkulwana nawe, wee Gogi u mwene usongo uwa muchisu icha Mesheki nu Tubali.

² Nkwiza pakukuzyunguzya nukukuwesela muntazi. Nkwiza pakukusenda ukufuma kubutali muvyisu ivya kumitu nukukutuma ukuti ulwane namaghamba agha Izilayeli.

³ Po nkwiza pakubukomela pasi ubwele bwako munyobe yako imongo nukutuwisya utulasilo munyobe yako indilo.

⁴ Ukwiza pakufwila pamaghamba agha Izilayeli, awe poka na basilikali bako bosi. Ukwiza pakuba chakulya icha luko losi ulwa viyuni ni vinyamana ivya munkolongo.

⁵ U Mwene Uwamaka Ghosi akuti: Ukwiza pakufwila munkolongo pachifukwa ichakuti nanena.

⁶ Nkwiza pakutuma umoto pachisu icha Magogi na pabantu babo bakwikala umwakufwasa mulubazu ulwa nyanja, po bakwiza pakumanya ukuti ane ne Mwene.

⁷ “ ‘Po itabwa lyane izelu likwiza pakumanyikwa pakasi pabantu bane aba Izilayeli. Ntakwiza pakwitikizya ukuti balinyazye itabwa lyane izelu, inko zikwiza pakumanya ukuti ane ne Mwene ne Muzelu mu Izilayeli.

⁸ U Mwene Uwamaka Ghosi akuti: Naloliloli isiku lilyo nkalinenagha likwiza pakukwanilisiwa.

⁹ “ ‘Po abantu babo bakwikala mutwaya utukulu utwa Izilayeli bakwiza pakufuma kuzi nukubombezya ivilwilo pakuba nkwi izya moto nukuvyocha, kokuti ingulu inandi ni nkulu, nu bwele nu tulasilo ni ntughu sona ni mpalala. Bakwiza pakuvibombezya vinivi pakuba nkwi amaka seveni.

¹⁰ Pakuti batakwiza pakubunganika inkwi ukufuma munkolongo pamo pakudumula mumusitu, pachifukwa ichakuti bakwiza pakubombezya ivilwilo pakuba nkwi. Sona bakwiza pakubafyula babo bakabafyulagha sona nukubazompola babo bakabazompolagha, u Mwene Uwamaka Ghosi anena.

Ukusiliwa ukwa Gogi

¹¹ “ ‘Pisiku lila nkwiza pakumupa u Gogi ubuzilo ubwa kusyiliwapo mu Izilayeli, mwikombe ilya bantu babo bakwenda ukubuka kubufumilo bwizuba ubwa Nyanja Imfwe. Yikwiza pakwighalila izila iya bendazila, pachifukwa ichakuti u Gogi na basilikali bako bosi bakwiza pakusyiliwa kulakula. Po bukwiza pakwitiziwa ukuti Ikombe ilya Hamoni Gogi.

¹² “ ‘Aba Izilayeli bakwiza pakubasyila amezi seveni, umwakuti bachiswefye ichisu.

¹³ Abantu bosi aba muchisu bakwiza pakubavwa pakubasyila, sona isiku lilyo nachindikiwa likwiza pakuba lisiku ilyachikumbusyo kukwabo, u Mwene Uwamaka Ghosi anena.

¹⁴ “ ‘Abantu bakwiza pakusimbiwa imbombo kabilikabili ukuti bachiswefye ichisu. Bamo bakwiza pakubuka muchisu chosi, ukonjelezyapo pabantu balabala, bamo bakwiza pakubasyila babo bakasyalako pachisu. “ ‘Pabumalilo ubwa mezi seveni bakwiza pakwanda pakulondelezya umwakuti ichisu chiswefiwe.

¹⁵ Bo bakwendakwenda muchisu, nanti umuntu yumo ennya ifupa ilya muntu, akubikapo ichimanyilo palubazu ulwa ifupa mupaka abakumba mapumpa balisyile mwikombe ilya Hamoni Gogi.

¹⁶ Kulakula kukwiza pakuba akaya kako kakwitiziwa ukuti Hamona sona bakwiza pakuchiswefya ichisu.’

¹⁷ “Wee mwana uwa muntu, u Mwene Uwamaka Ghosi akuti: Itizya uluko ulwa viyuni vyosi ni vinyamana vyosi ivya munkolongo, mwize nukubungana poka ukufuma kunkuto zyosi kulusekelo ulwa chakwiyipa ichikulu chicho nkubayanizizya pamaghamba agha Izilayeli. Palapala mukwiza pakulya inyama nukung'wela ibanda.

¹⁸ Mukwiza pakulya inyama iya bantu abamaka nukung'wela ibanda ilya bamwene aba muchisu ichapasi ngati boba dubi nu twana utwa ng'ozi ni mbuzi ni nkambaku sona ni vinyamana vyosi ivya kwina ukufuma ku Bashani.

¹⁹ Pavyakwiyipa vivyo nkubayanizizya, mukwiza pakulya amafuta mupaka mwikute nukung'wela ibanda mupaka mukolwe.

²⁰ Pitebulo lyane mukwiza pakulya nukwikuta inyama iya falasi niya bendezya falasi, iya bantu abamaka, sona na basilikali abaluko losi. U Mwene Uwamaka Ghosi anena.

Ukunyokelamo ukwa Izilayeli

²¹ “Po nkwiza pakulanjizya ubuchindamu bwane pakasi pa inko, sona inko zyosi zikwiza pakwennya ulufundo lulo nabapa sona namaka ghagho nalanjizya papabo.

²² Ukwanda palapala mupaka kuntazi kuba Izilayeli bakwiza pakumanya ukuti ane ne Mwene u Chala wabo.

²³ Inko zikwiza pakumanya ukuti abantu aba mu Izilayeli bakabuka kubuzya pachifukwa icha mbibi zyabo, pakuti batakaba basubiliwa kukwane. Nkabafisa icheni chane, nukubabika munyobe izya balwani babo, po bakafwila kubwite.

²⁴ Nkababombela izi ukuyana nubunyazu bwabo ni mbibi zyabo, sona nkabafisa icheni chane.

²⁵ “Polelo u Mwene Uwamaka Ghosi akuti: Nkwiza pakumunyosezya ubwiza u Yakobo sona nkwiza pakuba ni chililizi pabantu bosi aba mu Izilayeli, nkwiza pakuba nubuzuba nitabwa lyane izelu.

²⁶ Bakwiza pakuluvya isoni zyabo nukusita kusubiliwa kwabo kosi kuko bakandanjizya, bo bakwikala umwakufwasa muchisu chabo ukusita koghofesiwa nu muntu yumo.

²⁷ Bo nabanyosyako ku inko nukubabungannya muvyisu ivya balwani babo, nkwiza pakwilanjizya pakuba ne muzelu pakwendela mumwabo pamaso pa inko inyinji.

²⁸ Po bakwiza pakumanya ukuti ane ne Mwene u Chala wabo, napapo nkabatuma kubuzya pakasi pa inko, nkwiza pakubabungannya muchisu ichabo ni chabo, ntakwiza pakumuleka nayumo kwisinda.

²⁹ Ntakwiza pakubafisa sona icheni chane, pakuti nkwiza pakubapungulila Umuzimu wane aba Izilayeli,” U Mwene Uwamaka Ghosi anena.