Ezekiyeli 37 - IBAYIBOLO 2024

Ikombe ilya mafupa amumizu

¹ Amaka gha Mwene ghakaba papane, akanyamula nu Muzimu uwa Mwene nukumbika pakasi pikombe, lilyo likizula namafupa.

² Akanyendezya umwakuzyungulila mwikombe lila, po nkennya amafupa aminji nkani mwikombe, amafupa ghagho ghakumila nkani.

³ Akandalusya akati, “Wee mwana uwa muntu, nkimba amafupa agha ghangaba nubumi?” Nkamula nkati, “Wee Mwene Uwamaka Ghosi, wewe wemwene uzimenye.”

⁴ Po akambuzya akati, “Laghula kumafupa agha nukughabuzya ukuti, ‘Amwe mwe mafupa amumizu, ivwa amazyu agha Mwene!

⁵ U Mwene Uwamaka Ghosi akughabuzya amafupa ghanagha akuti: Nkwiza pakufutila umuyi wane mumwinyu, po mukwiza pakuba nubumi.

⁶ Nkwiza pakubika inkole ni nyama nukwighalila numubili, nkwiza pakubika umuyi mumwinyu, umwakuti mukwiza pakuba nubumi. Po mukwiza pakumanya ukuti ane ne Mwene.’ ”

⁷ Po nkalaghula ngati mumo nkalamuliliwa. Bo indi pakulaghula, pakaba ichongo, nukuneng'ena ukwamafupa, amafupa ghakaluminkana ifupa ni fupa.

⁸ Bo nkwennya, ghakaba ninkole po inyama yikizapo, umubili ghukaghighalila, loli mutakabamo umuyi mumwabo.

⁹ Po akambuzya akati, “Laghula kumuyi; laghula, wee mwana uwa muntu, sona unene uti, ‘U Mwene Uwamaka Ghosi akuti: Zagha wee muyi uwakufumila kunkuto zyosi folo ufutile pabakughoghiwa aba, umwakuti babe nubumi.’ ”

¹⁰ Po nkalaghula ukuyana namumo akandamulila, sona umuyi ghukabinjila; bakaba nubumi po bakimilila chikaba chilundilo ichikulu nkani.

¹¹ Po u Mwene akambuzya akati, “Wee mwana uwa muntu, amafupa ghosi agha ba Izilayeli. Bakuti, ‘Amafupa ghitu ghumiye sona nulusubilo lwitu lope lwamala; tuyanite bulo nababo bakafwa.’

¹² Polelo ulaghule nukubabuzya ukuti, ‘U Mwene Uwamaka Ghosi akuti: Ennya nkwiza pakwighula amapumpa ghinyu nukubefyamo, po nkwiza pakubanyosekezya kuchisu icha Izilayeli.

¹³ Po amwe, mwe bantu bane, mukwiza pakumanya ukuti, ane ne Mwene, nanti nighula amapumpa ghinyu nukubefyamo.

¹⁴ Nkwiza pakubika Umuzimu wane mumwinyu sona mukwiza pakuba bumi, nukubikazya muchisu ichinyu ni chinyu. Po mukwiza pakuzimanya ukuti ane ne Mwene nanena, sona nazibomba, u Mwene anena.’ ”

U Izilayeli nu Yuda bwaba bumwene boka

¹⁵ U Mwene akambuzya akati,

¹⁶ “Wee mwana uwa muntu, senda indisa nukusimbapo ukuti, ‘Yaba ya Yuda naba Izilayeli bakwangalilana nawe.’ Po usende sona indisa iyamwabo usimbepo uti, ‘Yaba ya Yosefu kokuti u Efulayimu, naba Izilayeli bakwangalilana nawe.’

¹⁷ Uzibike poka mu ndisa yoka ukuti zibe ndisa yoka munyobe yako.

¹⁸ “Nanti abantu binyu bakukulalusya bakuti, ‘Nkimba chinichi chikusanusya choni?’

¹⁹ ubamule uti, ‘U Mwene Uwamaka Ghosi akuti: Nkwiza pakusenda indisa iya Yosefu yiyo yili munyobe iya Efulayimu nuluko ulwa Izilayeli lulo bakwangalilana nawe nukuyimamatizya ku ndisa iya Yuda, ukuti yibe ndisa yoka, umwakuti babanje ndisa yoka munyobe yane.’

²⁰ Indisa zizyo wasimbapo uzileme ukuti abantu bosi bazyennye

²¹ po ubabuzye uti, ‘U Mwene Uwamaka Ghosi akuti: Nkwiza pakubefyapo aba Izilayeli pakasi pa inko kuko bakabuka. Nkwiza pakubabungannya pakufuma mu nkuto zyosi folo nukwiza nabo muchisu ichabo ni chabo.

²² Nkwiza pakubapela pakuba luko loka muchisu, pamaghamba agha Izilayeli. Pakwiza pakuba bulo u mwene weka mpela, zitakwiza pakuba inko zibili pamo ukugabinkana ukwa bumwene.

²³ Batakwiza pakwinyazya nivifwani vyabo sona ivintu ivyamwiko pamo ukunanga kwabo, pakuti nkwiza pakubapoka kububibi ubwa kunyokela mwisinda, nukubaswefya. Bakwiza pakuba bantu bane, nane nkwiza pakuba ne Chala wabo.

²⁴ “ ‘Umubombi wane u Devedi akwiza pakuba we mwene wabo, sona bosi bakwiza pakuba nu mudimi weka. Bakwiza pakukonka indaghilo zyane nukusungilila akiza ivimanyisyo vyane.

²⁵ Bakwiza pakwikala muchisu chicho nkamupa umubombi wane u Yakobo, ichisu chicho abanyenya binyu bakikalaghamo. Babo na bana babo na bizikulu babo bakwiza pakwikala bwila na bwila, sona umubombi wane u Devedi akwiza pakuba we mwene wabo bwila na bwila.

²⁶ Nkwiza pakufingana nabo ukuti bikalaye mumutende, lukwiza pakuba lufingo ulwa bwila na bwila. Nkwiza pakubikazikizya nukubabalizya nukubika Inyumba yane pakasi papabo bwila na bwila.

²⁷ Inyumba yane yikwiza pakuba pakasi papabo. Nkwiza pakuba ne Chala wabo sona abene bakwiza pakuba bantu bane.

²⁸ Po inko zikwiza pakumanya ukuti ane ne Mwene nkubapela aba Izilayeli pakuba bazelu, bo Inyumba yane yili pakasi papabo bwila na bwila.’ ”