Ezekiyeli 36 - IBAYIBOLO 2024

Ulusayo ulwa Chala pa Izilayeli

¹ U Mwene akuti, “Wee mwana uwa muntu, laghula kumaghamba agha Izilayeli uti, ‘Mwee maghamba agha Izilayeli ivwa izyu ilya Mwene.

² U Mwene Uwamaka Ghosi akuti: Pakuti umulwani akunena nizya awe akuti, “Eya! Ubuzilo bwitu ubwakale ubwa pamwanya pamaghamba bwaba bwitu.” ’

³ Polelo laghula ukuti, ‘U Mwene Uwamaka Ghosi akuti: Pakuti inko izinji zikabalema nukubafyula amaghamba agha Izilayeli, umwakuti mwaba mpyana iya inko zizyo zikasyalako, sona ichakusekiwa icha bantu babo bakabayebagha,

⁴ polelo, amwe mwe maghamba agha Izilayeli, ivwa amazyu agha Mwene Uwamaka Ghosi: U Mwene Uwamaka Ghosi akughabuzya amaghamba nu tumaghamba nu tusoko na makombe sona nutwaya utwa visami nutwaya utukulu utwa kufyuliwa nutwaya tuto tusamuliwe ninko zizyo zighazyunguliye.

⁵ U Mwene Uwamaka Ghosi akuti, “Nkunena nubukalale sona nu moyo wakabini ku inko zyosi, sona naba Edomu bosi, babo bakisendela bene ichisu chane numoyo uwa kuhoboka nkani sona nuwa lobezyo, bakanfyula ichisu chane ukuti chibe chabo, umwakuti bafyule apakudimapo ivitekwa.”

⁶ Polelo laghula ukuyana ni chisu icha Izilayeli nukunena kumaghamba na kutughamba, kutusoko na kumakombe ukuti: U Mwene Uwamaka Ghosi ati: Nkunena mubukali sona nu moyo wakabini pachifukwa ichakuti aba inko bakubangalila sona bakubasamula.

⁷ Polelo u Mwene Uwamaka Ghosi akuti: Nkulapa bo nkwezizye inyobe zyane mumwanya ukuti inko zizyo zibazyunguliye zyope zikwiza pakusamuliwa.

⁸ “ ‘Loli amwe, mwe maghamba agha Izilayeli mukwiza pakumela isamba nukupa ivikomwa ivya bantu bane aba Izilayeli, pakuti bali papipi pakubwela.

⁹ Ane mpalamasiwe nkani sona indi ni chililizi namwe, amaghunda ghinyu ghakwiza pakulimiwa nukubyaliwa,

¹⁰ nkwiza pakubabalizya aba Izilayeli pakasi papinyu. Mutwaya utukulu mukwiza pakwikala abantu, vyope ivisami vikwiza pakuzengiwa sona.

¹¹ Nkwiza pakubabalizya abantu bane ni vinyamana, sona bakwiza pakupapa abana abinji. Abantu babo bakwikala pakasi papinyu nkwiza pakubabalizya ngati mumo bakabela kale sona ivintu vikwiza pakubendelagha akiza ukuchila kale. Po mukwiza pakumanya ukuti ane ne Mwene.

¹² Nkwiza pakubapela abantu, abantu bane aba Izilayeli ukuti bende papinyu, amwe mwe maghamba agha Izilayeli. Bakwiza pakubasenda pakuba babo, sona mukwiza pakuba mpyana yabo, mutakwiza pakubafyula nalumolumo abana babo.

¹³ “ ‘U Mwene Uwamaka Ghosi akuti: Pachifukwa ichakuti abantu bakukubuzya ukuti, “Ichisu icha Izilayeli chikubalya abantu nukubafyula abana bache,”

¹⁴ polelo chitakwiza pakubalya sona abantu pamo pakubanangannya abana, u Mwene Uwamaka Ghosi anena.

¹⁵ Ntakwiza pakubapela ukuti mwivwanje intuko izya inko, sona mutakwiza pakusekiwa na bantu pamo pakuzipela inko zyinyu ukuti ziwe, u Mwene Uwamaka Ghosi anena.’ ”

Ubumi ubupya ubwa ba Izilayeli

¹⁶ U Mwene akambuzya akati,

¹⁷ “Wee mwana uwa muntu, bo abantu aba mu Izilayeli bakwikala muchisu chabo, bakachinyazya pachifukwa icha nkalo yabo sona ni mbombo zyabo. Imbombo zyabo pamaso papane zikaba ngati zya mukolo yuyo ali ni chakumwezi.

¹⁸ Po nkabapungulila ubukali bwane, pachifukwa ichakuti bakakupula ibanda muchisu sona bakachinyazya ichisu chila pachifukwa icha vifwani vyabo.

¹⁹ Nkabanyampannya pakasi pa inko, sona bakasata muvyisu vyosi iviyeni. Nkabalonga ukuyana ni nkalo zyabo sona ni mbombo zyabo.

²⁰ Sona kosi kuko bakabuka nukufika pakasi pa inko, bakalinyazya itabwa lyane izelu, pakuti zikaneniwa kukwabo ukuti, ‘Aba bantu aba Mwene, loli pope bulo bakachileka ichisu chache.’

²¹ Nkapalamasiwa pachifukwa icha litabwa lyane izelu, lilyo aba Izilayeli bakalinyazya pakasi pa inko kuko bakabuka.

²² “Polelo babuzye aba mu Izilayeli ukuti, ‘U Mwene Uwamaka Ghosi ati: Te bwighane bwinyu, mwee ba Izilayeli, nkwiza pakubomba ivintu vinivi, loli pachifukwa icha itabwa lyane izelu, lilyo mwalinyazya pakasi pa inko kuko mukabuka.

²³ Nkwiza pakulanjizya ubuzelu ubwa litabwa lyane ikulu nkani, lilyo likanyaziwa pakasi pa inko, litabwa lilyo mwalinyazya pakasi papabo. Po inko zikwiza pakumanya ukuti ane ne Mwene nanena. Ane ne Mwene Uwamaka Ghosi, nkwilanjizya ubuzelu bwane ukwendela mumwako pamaso papabo.

²⁴ “ ‘Po nkwiza pakubafumyamo mu inko; nkwiza pakubabungannya ukufuma muvyisu vyosi nukwiza namwe muchisu chinyu.

²⁵ Nkwiza pakubanyafila amizi amiza, po mukwiza pakuswepa, nkwiza pakubaswefya ubunyazu bosi ubwa vifwani vyinyu vyosi.

²⁶ Nkwiza pakubapa umoyo umupya nukubikamo mumwinyu umuzimu umupya, nukwefya umoyo umukafu nukubapa umoyo uwa kwivwila.

²⁷ Nkwiza pakubika Umuzimu wane mumwinyu nukubapela ukuti mwivwilaye indaghilo zyane sona mubanje maso pakughasungilila amalamulo ghane.

²⁸ Mukwiza pakwikala muchisu chicho nkabapa abanyenya binyu, mukwiza pakuba bantu bane sona ane nkwiza pakuba ne Chala winyu.

²⁹ Nkwiza pakubapoka kubunyazu bwinyu bosi. Nukubapa ingano inyiza sona nkwiza pakumazya izala papinyu.

³⁰ Nkwiza pakubalizya ivikomwa ivya mumakwi ni vikomwa ivya mumaghunda, umwakuti mutakoziwanje isoni pakasi pa inko chifukwa icha zala.

³¹ Po mukwiza pakukumbuka izila zyinyu imbibi nimbombo zyinyu imbibi, sona mukwiza pakuba nisoni pachifukwa icha mbibi zyinyu nivya bunyazu vivyo mukabomba

³² Nkulonda ukuti muzimanye ukuti intakubomba ichi pachifukwa chinyu, u Mwene Uwamaka Ghosi anena. Mukoziwanje isoni nukusamuliwa chifukwa icha mbombo zyinyu, amwe mweba Izilayeli!

³³ “ ‘U Mwene Uwamaka Ghosi akuti: Pisiku lilyo nkwiza pakubaswefya kumbibi zyinyu zyosi, nkwiza pakubikazya sona mutwaya twinyu, nukuzenga sona vivyo vyali visami.

³⁴ Ichisu chicho chikaba chisami bakwiza pakulimamo ukuti chitakabonekaye pakuba chisami ku bantu bosi babo bakwendamo.

³⁵ Bakwiza pakunena ukuti, “Ichi cho chisu chicho chikaba chisami ilelo chaba ngati mughunda uwa Edeni, utwaya utukulu nkani tuto tukaba visami, sona tuto abantu batakwikalamo, tuto tukananganika, ilelo twaba malinga sona abantu bakwikalamo.”

³⁶ Po inko zizyo zisyeteko umwakubazyungulila zikwiza pakumanya ukuti ane ne Mwene nazenga vivyo vikananganika nukubyalamo sona muchisu chicho chikaba chisami. U Mwene anena sona nkwiza pakuzibomba.’

³⁷ “U Mwene Uwamaka Ghosi akuti: Chicho nkwiza pakubamula sona aba Izilayeli bo bali pakulaba kukwane ukuti imbabombele chakuti, imbabalizye babe ngati mudimo uwa ng'ozi,

³⁸ ngati ng'ozi zizyo bakubuka pakubika pakuba chakwiyipa mu Yelusalemu palusekelo ulupaghuliwa. Utwaya utukulu nkani tuto tukaba visami tukwiza pakwizula nichilundilo icha bantu. Po bakwiza pakumanya ukuti ane ne Mwene.”