Ezekiyeli 35 - IBAYIBOLO 2024

Ubulaghuzi ubwakususannya nu Edomu

¹ U Mwene akambuzya akati,

² “Wee mwana uwa muntu, ennya icheni chako kwighamba ilya Seyili, ulaghule umwakulisusya ukuti,

³ ‘U Mwene Uwamaka Ghosi akuti: Nkukususya we lighamba ilya Seyili sona nkwiza pakulanjizya amaka ghane papako nukukupela pakuba we chisami.

⁴ Nkwiza pakutunangannya utwaya twako nukutupela pakuba visami. Po mukwiza pakumanya ukuti ane ne Mwene.

⁵ “ ‘Pachifukwa ichakuti ukalanjizya ulubengo paba Izilayeli ulusita kumala nukubaghoghela kubwite pakabalilo akantamyo zyabo, sona pakabalilo kako ulufundo lwabo lwafika pabumalilo,

⁶ polelo u Mwene Uwamaka Ghosi akulapa akuti: Naloliloli nkwiza pakukubika munyobe izya bantu babo bakukupula ibanda, sona likwiza pakubakonka. Pakuti utakakubenga ukukupula ibanda, po ubufwe bukwiza pakukukonka.

⁷ Nkwiza pakulipela ighamba ilya Seyili pakuba chisami, nkwiza pakubaghogha bosi babo bakwinjilamo na babo bakwepamo.

⁸ Nkwiza pakughizuzya amaghamba ghako nimivimba, bosi babo bakaghoghiwa kubwite bakwiza pakwizula patughamba twako, na mumakombe ghako sona na mutusoko twako tosi.

⁹ Nkwiza pakukupela awe pakuba chisami icha bwila na bwila. Mutwaya twako utukulu mutakwiza pakwikalamo abantu. Po mukwiza pakumanya ukuti ane ne Mwene.

¹⁰ “ ‘Pachifukwa ichakuti mwe bantu aba mu Seyili mwanena ukuti, “Inko zibili izi ni vyisu ivi vikwiza pakuba vyitu sona chikwiza pakuba mpyana yitu,” napapo ane ne Mwene nkaba palapala,

¹¹ polelo u Mwene Uwamaka Ghosi akulapa akuti: Naloliloli nkwiza pakubabombela ngati mumo mukababombela abantu bane pakubalanjizya ubukali bwinyu na kabini kinyu sona nulubengo lwinyu, nkwiza pakumanyikwa pakasi papabo bo nkubalonga amwe mwe bantu aba mu Seyili.

¹² Po mukwiza pakuzimanya ukuti ane ne Mwene nivwa umusamu winyu, ghugho mukaghasamulagha amaghamba agha Izilayeli. Mukati, “Ghaba visami sona ghapeghiwa kukwitu ukuti tughalye.”

¹³ Pakunena bunubo, mukituvya nkani umwakususannya nane sona mwantuka nivintu ivyinji nkani, amazyu ghosi ghanagha naghivwa.

¹⁴ U Mwene Uwamaka Ghosi akuti: Bo ichisu chosi ichapasi chikuhoboka, nkwiza pakukupela pakuba chisami.

¹⁵ Pachifukwa ichakuti mukahoboka bo ichilingo icha ba Izilayeli chaba chisami, umu momumo nkwiza pakubombela namwe, mukwiza pakuba chisami, wee lighamba ilya Seyili, sona ni chisu chosi icha Edomu. Po bakwiza pakumanya ukuti ane ne Mwene.’ ”