Ezekiyeli 34 - IBAYIBOLO 2024

Abadimi ababibi mu Izilayeli

¹ U Mwene akambuzya akati,

² “Wee mwana uwa muntu, laghula umwakubasusya abadimi aba mu Izilayeli, laghula nukubabuzya ukuti, ‘Izi zyo zizyo u Mwene Uwamaka Ghosi akambuzya akati: Chighune ku badimi aba mu Izilayeli babo bakwisungilila bene! Nkimba abadimi batakughusungilila umudimo?

³ Amwe mukung'wela ulukama, nukuvwala amenda agha meya sona nukughogha ing'ozi inyine, loli mutakughusungilila umudimo.

⁴ Mutakuzisungilila ing'ozi idedebazu pamo pakuzipozya zizyo zibinite pamo pakuzipinya zizyo zivulaye. Mutazinyosizye zizyo zyasobela pamo pakuzilonda zizyo zyapulumpa. Mwazilongozya umwabukali umwakusita kumanya.

⁵ Po zikanyampana pachifukwa ichakuti atakabapo nayumo uwakuzidima, sona bo zyanyampana zikaba chakulya icha vinyamana vyosi ivya munkolongo.

⁶ Ing'ozi zyane zikendakendagha mumaghamba ghosi na mutumaghamba tosi ututali. Zikanyampana pachisu chosi ichapasi, sona atakabapo nayumo umuntu uwakuzilonda.

⁷ “ ‘Polelo, amwe mwe badimi, ivwa amazyu agha Mwene.

⁸ U Mwene Uwamaka Ghosi akuti: Naloliloli nkulapa, pachifukwa ichakuti ing'ozi zyane zitakaba nu mudimi sona zikafyuliwa pakuba chakulya icha vinyamana ivya munkolongo, pachifukwa ichakuti abadimi bane batakazilondelezya ing'ozi zyane loli bakisungilila bene mubuzilo ubwakuzisungilila ing'ozi zyane,

⁹ polelo, amwe mwe badimi, ivwa amazyu agha Mwene.

¹⁰ U Mwene Uwamaka Ghosi akuti: Indi pabwite na badimi, nkubasusya abadimi pachifukwa icha ng'ozi zyane. Nkwiza pakubafyula ing'ozi zyane umwakuti abadimi batakwiza pakuzilyesya sona. Nkwiza pakuzipoka ing'ozi zyane kumilomo yabo, po zitakwiza pakuba chakulya chabo.

Umudimi umwiza

¹¹ “ ‘Pakuti u Mwene Uwamaka Ghosi akuti: Ane nemwene nkwiza pakuzilonda ing'ozi zyane nukuzisungilila.

¹² Ngati mumo umudimi akuzilondelezezya ing'ozi zizyo zyanyampana, momumo nane nkwiza pakubombela. Nkwiza pakuzipoka kubuzilo bosi bubo zinyampanikiyeko pisiku ilya mabingu nilya chisi.

¹³ Nkwiza pakuzyefya pa inko nukuzibungannya muvyisu iviyeni. Nkwiza pakuzinyosezya muchisu ichabo ni chabo. Nkwiza pakuzidima pighamba ilya Izilayeli papipi nu tusoko, na mubuzilo bosi ubwiza bubo abantu bakwikalako.

¹⁴ Nkwiza pakuzidima pabuzilo ubwiza ubwakudimilapo, sona na pamwanya pamaghamba agha Izilayeli bukwiza pakuba buzilo ubwiza ubwakudimilapo, zikwiza pakulambalala mubuzilo ubwiza ubwakudimilamo, sona kulakula zikwiza pakulya isote iteta nkani pamaghamba agha Izilayeli.

¹⁵ Ane nemwene nkwiza pakuzidima ing'ozi zyane sona zikwiza pakutuzya. U Mwene Uwamaka Ghosi anena.

¹⁶ Nkwiza pakuzilonda zizyo zisobelite nukuzinyosya zizyo zyapulumpa. Nkwiza pakuzipinya ivilonda zizyo zivulaye nukuzikazya zizyo zidedebaye, loli inyine ni zyamaka nkwiza pakuzinangannya. Nkwiza pakuzidima ing'ozi nubwanaloli.

¹⁷ “ ‘U Mwene Uwamaka Ghosi akuti: Loli amwe mwe ng'ozi zyane nene nkwiza pakuyilonga ing'ozi yokayoka, sona pakasi pa dubi ni mbuzi.

¹⁸ Nkimba chitakuhobosya ukuti mulyanje isote iteta? Nkimba namwe bulo mukubunkanyankila ubuzilo bosi ubwakudimapo ni nyayo zyinyu? Nkimba mutakuhoboka na mizi amiza aghakung'wela? Fwandi mungaghavundulannya amizi ni vinama vyinyu?

¹⁹ Nkimba ing'ozi zyane zibaghiye pakulya vivyo mwakanyannya ni vinama nukung'wela amizi ghagho mwaghavundulannya ni vinama vyinyu?

²⁰ “ ‘Polelo u Mwene Uwamaka Ghosi akubabuzya akati: Ennya ane ne mwene nkwiza pakuzilonga ing'ozi izyamaka nizyakughanda.

²¹ Ing'ozi idedebazu mukuzisyempya nukuzisunkilizizya kubutali, po mukuzilasa ni mpembe nukuzinyampanizizya kubutali,

²² nkwiza pakughupoka umudimo wane, sona ghutakwiza pakufyuliwa. Nkwiza pakuyilonga ing'ozi yokayoka.

²³ Nkwiza pakuzipa umudimi weka, umubombi wane u Devedi, sona akwiza pakuzisungilila nukuba mudimi wabo.

²⁴ Ane ne Mwene nkwiza pakuba ne Chala wabo, sona umubombi wane u Devedi akwiza pakuba we mwene pakasi papabo. Ane ne Mwene nanena.

²⁵ “ ‘Nkwiza pakufingana nabo ukuti bikalaye mumutende nukuvichimbizyamo ivinyamana muchisu ukuti ing'ozi zyane zyikalaye munkolongo nukughona bulo mumusitu umwakufwasa.

²⁶ Nkwiza pakubasaya abantu bane poka nu buzilo bubo buzyunguliye akaghamba kane. Nkwiza pakutuma ivula pakabalilo kache, po yikwiza pakuba vula iya lusayo.

²⁷ Amakwi agha munkolongo ghakwiza pakwela ivikomwa, sona amaghunda ghakwiza pakupa ivikomwa, bo nabasatula abantu bane bakwiza pakwikalagha umwakufwasa muchisu chabo. Po bakwiza pakumanya ukuti ane ne Mwene, sona nukubapoka munyobe izya babo bakababika mubuzya.

²⁸ Inko zitakwiza pakubafyula ivintu vyabo, sona ivinyamana ivya muzi vitakwiza pakubaghogha nukubalya. Bakwiza pakwikalagha umwakufwasa, sona atalipo nayumoyumo umuntu uwakuboghofya.

²⁹ Nkwiza pakubapa amaghunda amiza umwakuti ghapanje ivyakulya ivyinji, po batakwiza pakuba nizala sona muchisu chila, pamo ukusekiwa ninko.

³⁰ Po bakwiza pakuzimanya ukuti ane ne Mwene u Chala wabo, indi poka nabo sona naba Izilayeli bantu bane, u Mwene Uwamaka Ghosi anena.

³¹ Amwe mwe ng'ozi zyane, ing'ozi zizyo nkuzilyesya, sona ane ne Chala winyu, u Mwene Uwamaka Ghosi anena.’ ”