Ezekiyeli 33 - IBAYIBOLO 2024

U Chala akumusala u Ezekiyeli pakuba mulindilili

¹ U Mwene akambuzya akati,

² “Wee mwana uwa muntu, babuzye abantu bako ukuti, ‘Nanti nkwiza nu bwite muchisu, po abantu aba muchisu chila basala u muntu weka pakasi papabo nukumupela pakuba mulindilili wabo,

³ sona nanti umulindilili yula akwennya ubwite bukwiza muchisu, akulizya ipati pakubasoka abantu,

⁴ po nanti yumo akwivwa ukulila ukwa ipati loli atakwivwila isoki akwiza pakufwila kubwite, inongwa iyamfwa yache yikwiza pakuba papache.

⁵ Pakuti akivwa ukulila ukwa ipati loli atakivwila isoki, inongwa iyamfwa yache yikwiza pakuba papache. Nanti akivwilagha isoki, ngali akipoka mwene.

⁶ Nanti umulindilili ennya ubwite bukwiza sona atakulizya ipati pakubasoka abantu, po umulwani akwiza nukumughogha umuntu yumo, napapo afwile mumbibi zyache, ane nkwiza pakumulonga umulindilili yula pachifukwa icha imfwa iya muntu yula.’

⁷ “Wee mwana uwa muntu, nakupela awe pakuba we mulindilili uwaluko ulwa Izilayeli. Po ivwa amazyu ghagho nkukubuzya, ukuti ubasoke mubuzilo bwane.

⁸ Nanti nkumubuzya umuntu umubibi ukuti, ‘We muntu umubibi naloli ukwiza pakufwa,’ po waleka pakumusoka umubibi yula ukuti anyokeko kububibi bwache, umubibi yula akwiza pakufwila mumbibi zyache, po ukwiza pakuba ninongwa pachifukwa icha bufwe bwache.

⁹ Loli nanti ukumusoka umuntu umubibi sona atakuzileka izila zyache imbibi, akwiza pakufwa pachifukwa icha mbibi zyache, loli awe ukwiza pakwipoka wemwene.

Ubugholosu ubwa Mwene

¹⁰ “Wee mwana uwa muntu, ubakumbuzye aba Izilayeli amazyu ghabo aghakuti, ‘Twang'wamilwa ni mbibi zyitu sona nu bubibi, po vikutughandizya. Nkimba tungaba bulibuli nubumi?’

¹¹ Ubabuzye ukuti, ‘U Mwene Uwamaka Ghosi ati: Naloliloli nkulapa, intakuhoboka nimfwa iya muntu umubibi, loli nkuhoboka nanti akuzileka imbibi nukuba nubumi. Mwee ba Izilayeli nyokako nukuzileka izila zyinyu imbibi! Nkimba mukufwilachi?’

¹² “Polelo, we mwana uwa muntu, ubabuzye abantu aba kukwinyu ukuti, ‘Ubugholosu ubwa muntu umugholosu butakwiza pakumupoka nanti abomba imbibi, sona ububibi ubwa muntu umubibi butakwiza pakumupela ukuti awe, nanti akubuleka. Nanti umuntu umugholosu ananga, atakwiza pakuba nubumi pachifukwa icha bugholosu bwache ubwakwanda.’

¹³ Nanti namubuzya umuntu umugholosu ukuti, ‘Naloliloli ukwiza pakuba nubumi,’ loli akusubila ubugholosu bwache nukubomba ububibi, butalipo sona ubugholosu bubo abomba bukwiza pakukumbukiliwa, akwiza pakufwa pachifukwa icha bubibi bubo abomba.

¹⁴ Nanti nkumusoka umuntu umubibi ukuti, ‘Naloliloli ukwiza pakufwa,’ loli akuzileka imbibi nukubomba ubwanaloli nu bugholosu,

¹⁵ nanti anyosya vivyo akakopa, navivyo akiba, nukuzikonka indaghilo zizyo zikupa ubumi, sona atakubomba ububibi, naloliloli akwiza pakuba nubumi, atakwiza pakufwa.

¹⁶ Ntakwiza pakuyikumbukapo nayimo imbibi yiyo akabomba. Pakuti abomba ubwanaloli nu bugholosu, naloliloli akwiza pakuba nubumi.

¹⁷ “Loli pope bulo abantu bako bakuti, ‘Izila iya Mwene te yabwanaloli.’ Loli izila yabo yo yite yabwanaloli.

¹⁸ Nanti umuntu umugholosu akubuleka ubugholosu bwache nukubomba imbibi, akwiza pakufwila mu mbibi.

¹⁹ Loli nanti umuntu umubibi akubuleka ububibi bwache nukubomba ubwanaloli nu bugholosu, akwiza pakuba nubumi pachifukwa icha kubomba bunubu.

²⁰ Mwee ba Izilayeli, pope bulo mukuti, ‘Izila iya Mwene yite yabwanaloli.’ Loli nkwiza pakumulonga umuntu wesi ukuyana nakabombele kache.”

Ipangwi ilya kuwa ukwa Yelusalemu

²¹ Pisiku ilyafayivi, mumwezi uwa 10, mumwaka uwa 12 bo bakubuka kubuzya, umuntu yumo yuyo akachimbila ku Yelusalemu akiza nukumbuzya ukuti, “Akaya akakulu nkani kawiye!”

²² Pachamabwila bo umuntu yula atizite, amaka agha Mwene ghakanyizila, pandabindabi bo umuntu yula atizite, u Mwene akighula umulomo wane, sona intakaba bulo myee.

Imbibi izya bantu

²³ Po u Mwene akambuzya akati,

²⁴ “Wee mwana uwa muntu, abantu babo bakwikala muvisami ivya muchisu icha Izilayeli bakuti, ‘U Abulahamu akaba bulo mwene loli pope bulo u Chala akamupa ichisu chosi, aswe twe binji, naloliloli ichisu ichi chipeghiwe pakuba chitu ni chitu.’

²⁵ “Polelo ubabuzye ukuti, ‘U Mwene Uwamaka Ghosi ati: Mukulya inyama yiyo yili ni banda sona mukwiputa ku vifwani nukubaghogha abantu. Nkimba mukwinong'ona ukuti ichisu chikwiza pakuba chinyu?

²⁶ Amwe mukusubila ubwite, mukubomba ivyamwiko, sona umuntu wesi akumunyazya umuchi uwa mupalamani wache. Nkimba ichisu chingaba chinyu ni chinyu?’

²⁷ “Ubabuzye ukuti, ‘U Mwene Uwamaka Ghosi ati: Naloliloli nkulapa nkuti, abantu babo bakwikala muvisami bakwiza pakufwila kubwite sona bope babo bali mumaghunda nkwiza pakuvipa ivinyamana ivya munkolongo ukuti vibalye, bene babo bali mumalinga na mumpako bo bakwiza pakufwa ni chiwaya.

²⁸ Nkwiza pakuchipela ichisu pakuba chisami sona namaka ghagho bakwituvya nagho ghakwiza pakumala, amaghamba agha Izilayeli ghope ghakwiza pakuba visami umwakuti atalipo nayumoyumo umuntu yuyo akwiza pakudumusannyamo.

²⁹ Po bakwiza pakumanya ukuti ane ne Mwene, nanti nachipela ichisu pakuba chisami pachifukwa icha vintu ivyamwiko vivyo babomba.’ ”

Abantu batakuteghelezya amazyu agha Mwene

³⁰ U Mwene akati, “Loli awe, we mwana uwa muntu, abantu abakukwinyu bakabungana nukwanda pakuyeba bo bali muntanda na mumilyango iya nyumba, bakunenezannya benebene ukuti, ‘Zagha mwivwe amazyu ghagho ghafuma kwa Mwene.’

³¹ Abantu bane bakwiza kukwako ngati mumo bakubombelagha bwila, nukwikala pantazi papako pakuteghelezya amazyu ghako, loli batakughabombezya imbombo. Namalomo ghabo bakunena amazyu agha lughano, loli abene bakulonda ko kukaba bulo.

³² Po awe, kukwabo uli ngati muntu yuyo akwimba inyimbo izya lughano na mazyu amiza sona akulizya akiza ni chakwimbila, pakuti bakwivwa amazyu ghako loli batakughabombezya imbombo.

³³ “Bo vyosi vinivi vyakwanilisiwa sona nanti naloliloli vyabombiwa vivyo ukababuzyanga, po bakwiza pakuzyaghannya ukuti umulaghuzi ame panapa.”