Ezekiyeli 32 - IBAYIBOLO 2024

Umwene uwamu Ijiputi akufwanikiziwa ni ngwina

¹ Pisiku ilya kwanda, mumwezi uwa 12, mumwaka uwa 12 bo bakubuka kubuzya u Mwene akambuzya akati,

² “Wee mwana uwa muntu, umwimbile u mwene u Falabo uwa muchisu icha Ijiputi ulwimbo ulwa nkuta ulwakuti, ‘Uli ngati nkalamu pakasi pa inko, uli ngati ngwina munyanja yiyo yikwisumba mutusoko twako, nukughavundulannya amizi ni nyayo zyako sona nukuzinyazya isoko.

³ “ ‘U Mwene Uwamaka Ghosi akuti: Nkwiza pakusumbila ichilepa chane papako, ni chilundilo ichikulu icha inko, sona bakwiza pakukuwesela mulubazu ulwa nyanja.

⁴ Nkwiza pakukusumbila pachisu, nukukutagha pasi, iviyuni vyosi vikwiza pakukuzong'ompola, sona ivinyamana ivya muchisu, vikwiza pakwikuta inyama yako.

⁵ Nkwiza pakuyinyampannya inyama yako pighamba, nukwizuzya amakombe nu muvimba wako.

⁶ Nkwiza pakuchinyezya ichisu ni banda lyako, mupaka nukufika mumaghamba, sona utusoko tukwiza pakwizula ni nyama yako.

⁷ Bo nakuzimizya, nkwiza pakwighalila kumwanya nukuzifisya intondwa, Nkwiza pakulivwinka izuba ni bingu, sona u mwezi ghutakwiza pakulama.

⁸ Nkwiza pakuzizimya inkozyo zyosi izya kumwanya, nukubika ichisi muchisu chako, u Mwene Uwamaka Ghosi anena.

⁹ Nkwiza pakughayivya amoyo agha bantu abinji, bo nkwiza nukunanganika pakasi pa inko, sona na pakasi pa vyisu vivyo utavimenye.

¹⁰ Nkwiza pakuziswighisya inko inyinji, po abamwene babo bakwiza pakutetema pachifukwa icha wewe, bo nkuzyunguzya u panga wane pantazi papako. Pisiku ilya kuwa kwako, umuntu wesi akwiza pakutetema, pakabalilo kosi aka bumi bwache.

¹¹ “ ‘U Mwene Uwamaka Ghosi akuti: Ubwite ubwa mwene uwa muchisu icha Babiloni bukwiza papako.

¹² Ichilundilo chako icha bantu chikwiza pakughoghiwa, nupanga uwa basilikali abakoghofya nkani, ukuzichila inko izinji. Abene bakwiza pakukumala ukwituvya ukwa ba Ijiputi, po akabukatila kache kosi aka basilikali kakwiza pakunanganika.

¹³ Mulubazu ulwa mizi aminji, nkwiza pakuzinangannya ing'ombe zyache zyosi, sona lutalipo ulwayo nalumolumo ulwa muntu, pamo ulwayo ulwa ng'ombe lulo lukwiza pakuvundula amizi.

¹⁴ Nkwiza pakughaswefya amizi ghache, sona utusoko twache tukwiza pakwendagha ngati mafuta, u Mwene Uwamaka Ghosi anena.

¹⁵ Bo nachipela ichisu icha Ijiputi pakuba chisami nukuvizimizya vyosi vivyo vili mulamula nukubaghogha bosi babo bakwikala mulamula, po bakwiza pakumanya ukuti ane ne Mwene.’

¹⁶ “Ulu lo lwimbo ulwa nkuta lulo bakwiza pakuchililila ichisu icha Ijiputi poka ni chilundilo chache. Leka inko zyosi zimulilaye. U Mwene Uwamaka Ghosi anena.”

Ichisu icha bantu abafwe

¹⁷ Pisiku ilya 15, mumwezi uwakwanda, mumwaka uwa 12 bo bakubuka kubuzya u Mwene akambuzya akati,

¹⁸ “Wee mwana uwa muntu, chililile ichilundilo icha Ijiputi nukubatuma mwipumpa poka ninko izyamaka na babo bakubuka kwipumpa.

¹⁹ Ubalalusye uti, ‘Nkimba we wakuboneka akiza nkani ukubachila abanji? Bukagha bulo pasi nukulambalala pakasi pababo batasilimuliwe.’

²⁰ Bakwiza pakuwila pakasi pababo bakafwila kubwite, upanga ayaniziwe pakubaghogha bosi.

²¹ Mukasi mumapumpa abalongozi aba basilikali abamaka bakwiza pakumubuzya u Ijiputi poka na babo akwivwana nabo biza kuno sona bakulambalala poka nababo batasilimuliwe, abantu babo bakafwila kubwite.

²² “Ichisu icha Asiliya chili kulakula poka na basilikali bache bosi, chizyunguliliwe namapumpa agha bantu babo bakaghoghiwa sona na bosi babo bakafwila kubwite.

²³ Amapumpa agha ba Asiliya mibizu muchisu icha bantu abafwe, abasilikali bache bazyunguliye amapumpa ghabo. Bosi babo bakoghofyanga muchisu icha bantu abumi, bafuye bakaghoghiwa kubwite.

²⁴ “Ichisu icha Elamu chili kulakula, chizyunguliliwe na mapumpa agha bantu bache babo bakafwila kubwite. Abantu bosi babo bakoghofyanga muchisu icha bantu abumi, bakikila kuchisu icha bantu abafwe bo batasilimuliwe. Isoni zikabalemela poka na babo bakinjila mwipumpa.

²⁵ Ichisu icha Elamu chisyiliwe pakasi pa babo bakaghoghiwa, poka ni chilundilo chache chosi umwakuzyungulila amapumpa. Abantu bosi babo batakasilimuliwa bakafwila kubwite. Pachifukwa ichakuti bakaboghofyanga muchisu icha bantu abumi, isoni zikabalemela poka na babo bakinjila mwipumpa, basyiliwe pakasi pa babo bakaghoghiwa.

²⁶ “Ichisu icha Mesheki ni cha Tubali vili kulakula, poka ni chilundilo chabo chosi umwakuzyungulila amapumpa ghabo. Abantu bosi batakasilimuliwa, bakafwila kubwite pachifukwa ichakuti bakoghofyanga abantu aba muchisu icha bantu abumi.

²⁷ Batasyiliwe poka na bantu babo batasilimuliwe, abasilikali babo bawiye, babo bakinjila mwipumpa poka ni vilwilo vyabo ivya bwite, abapanga babo bakabikiwa kumitu yabo. Ulufundo lwabo ulwa mbibi zyabo luli pa mafupa ghabo, pachifukwa ichakuti abantu abamaka bala bakaboghofyanga abantu aba muchisu icha bantu abumi.

²⁸ “Wee Falabo, nawe bulo ukwiza pakufwa nukusyiliwa pakasi pabantu babo batasilimuliwe, poka na babo bakafwila kubwite.

²⁹ “Ichisu icha Edomu chili kulakula, abamwene bache na makambala ghache ghosi, napapo bakaba bamaka, basyiliwe poka na bantu babo bakafwila kubwite. Basyiliwe poka na babo batasilimuliwe, sona na bantu babo bakwinjila mwipumpa.

³⁰ “Amakambala ghosi agha kumitu na bantu aba mu Sidoni bosi bali kulakula, bakikila poka na bantu babo bakaghoghiwa bo isoni zibalemite, napapo bakaba bakoghofya nkani pachifukwa icha maka ghabo. Basyiliwe poka na babo batasilimuliwe, babo bakafwila kubwite, isoni zikabalemela poka na babo bakinjila mwipumpa.

³¹ “U Falabo na basilikali bache bosi bakwiza pakubennya sona akwiza pakusangalusiwa ni chilundilo chache chicho chikafwila kubwite, u Mwene Uwamaka Ghosi anena

³² Napapo nkamupela pakuboghofya abantu muchisu icha bantu abumi u Falabo poka ni chilundilo chache, akwiza pakusyiliwa poka na bantu babo batasilimuliwe sona bantu babo bakafwila kubwite.” U Mwene Uwamaka Ghosi anena.