Ezekiyeli 31 - IBAYIBOLO 2024

U Ijiputi akufwanikiziwa nikwi ilya mwale

¹ Pisiku ilyakwanda, mumwezi wabutatu, mumwaka uwa 11 bo bakubuka kubuzya u Mwene akambuzya akati,

² “Wee mwana uwa muntu, mulalusye u Falabo u mwene uwa muchisu icha Ijiputi na kabukatila aka basilikali bache ukuti, ‘Nkimba wewenu yuyo mungayana nawe mubuchindamu bwako?

³ Nkwiza pakumufwanikizya u Asiliya nikwi ilya mwale, ilya mu Lebanoni lilyo lili nisamba izya kuboneka akiza, zizyo zikupa akazundila mumusitu. Isamba intali nkani zizyo zikufika kumwanya.

⁴ Likakulila muchisu icha mizi, imbwibwi inyibizu zikalipela pakuba litali, utusoko twache tukendagha kusi umwakulizyungulila, sona tukatuma amizi kumakwi ghosi agha mumusitu.

⁵ Loli ikwi lila likakula mupaka pamwanya ukughachila amakwi aghanji, isamba zyache zikaba ntali, pachifukwa ichakuti likaba na mizi aminji.

⁶ Iviyuni vyosi ivya mumwanya vikaluka ivivumbo mulamula musamba zyache, ivinyamana vyosi ivya mumisitu vikapapila utwana muntende musamba, inko inkulu nkani zikikalagha mukazundila kache.

⁷ Likaba likwi ilyakuboneka akiza nkani ilya samba intali, ni samba zyache izyakuvwinka akiza nkani pakuti amagululuzi ghache ghakinjila nkani pasi pamizi aminji.

⁸ Litakabapo nalimolimo ikwi ilya mwale mumughunda uwa Chala, lilyo likayana nikwi lila, pamo ukuvwinka ukwa samba izya payini, pamo amakwi aghanji agha kuyana nikwi lila. Litakabamo nalimolimo ikwi mumughunda uwa Chala, lilyo akabonekele akiza likayana nalyo.

⁹ Nkalipela ilyakuboneka akiza nkani, nisamba inyinji nkani, po amakwi ghosi mu Edeni mumughunda uwa Chala ghakanyonywanga pakuba ngati lyo lilyo.

¹⁰ “ ‘Polelo u Mwene Uwamaka Ghosi akuti: Pachifukwa ichakuti ikwi lila likakula nukufika kumwanya, sona likituvyanga pachifukwa icha butali bwache,

¹¹ nkalibika munyobe izya mulongozi uwa inko ukuti alibombele ukuyana nu bubibi bwache,

¹² sona inko injeni izyakoghofya nkani, zyo zizyo zikwiza pakulidumula, po bakwiza pakulileka. Isamba zyache zikwiza pakuwila pamaghamba na mumakombe mosi, sona isamba zyache zyosi inkulu zikwiza pakupyokela musoko izya chisu. Inko zyosi zikepamo mukazundila kache nukubuka.

¹³ Iviyuni vyosi vikikala pikwi ilya kuwa lila, sona ivinyamana vyosi ivya muchisu vikaba mukasi musamba zyache.

¹⁴ Polelo ghatalipo amakwi aghanji ghagho matali napapo ghangamela pamizi, sona litalipo ikwi lilyo lingakula nukufika kumwanya, ghatalipo ghagho ghali mulubazu ulwa mizi ghangaba matali bunubu ukufika kumwanya. Pakuti amakwi ghosi ghakufwa ngati mumo abantu bosi bakufwila, nukwinjila muchisu icha bantu abafwe.

¹⁵ “ ‘U Mwene Uwamaka Ghosi akuti: Pisiku lilyo likinjilagha mwipumpa, nkazilamula imbwibwi inyibizu pakulila ubufwe bwache. Nkatukamusya u tusoko twache na mizi aminji. Inkolongo iya Lebanoni nkwiza pakuyivwinka ni chisi, sona amakwi ghosi ghakwiza pakufoka.

¹⁶ Inko zyosi zikatetema pachifukwa ichakwivwa ichongo icha kuwa kwache, bo nalyinjizya mwipumpa poka na bantu babo bakabukagha kwipumpa. Po amakwi ghosi agha mumughunda uwa Edeni, amiza ukughachila agha muchisu icha Lebanoni, sona na makwi ghosi ghagho ghakaba mulubazu ulwa mizi, ghakasangalusiwa bo ikwi ili lyawa.

¹⁷ Inko zyosi zizyo zikikalagha mukazundila kache pachifukwa icha kwivwana kwabo pakasi pa inko, zikinjila poka mwipumpa nababo bakafwila kubwite.

¹⁸ “ ‘Nkimba wewenu yuyo akuyana nawe ubuchindamu nubukulu pakasi pamakwi agha mu Edeni? Nawe bulo ukwiza pakwisiwa poka na makwi agha mumughunda uwa Edeni pakubuka kusi kuchisu icha bafwe, ukwiza pakughona pakasi pabantu babo batasilimuliwe poka nababo bakafwila kubwite. “ ‘Yunuyu we Falabo poka na basilikali bache, u Mwene Uwamaka Ghosi anena.’ ”