Ezekiyeli 30 - IBAYIBOLO 2024

U Mwene akumufunda u Ijiputi

¹ U Mwene akambuzya akati,

² “Wee mwana uwa muntu, laghula ukuti, ‘Izi zyo zizyo u Mwene Uwamaka Ghosi anena ati: Lilagha ukuti, “Mwee isiku lila lyafika!”

³ Pakuti isiku lili papipi, isiku ilya Mwene lili papipi, isiku ilya mabingu, akabalilo akakunanganika ukwa inko.

⁴ Ubwite bukwiza pakuchizila ichisu icha Ijiputi, sona aba muchisu icha Etiyopiya bakwiza pakwivwa ububavu. Abantu abinji bakwiza pakufwa muchisu icha Ijiputi, ubukabi bwache bosi bukwiza pakusendiwa, sona ulwalo lukwiza pakumongoliwa.

⁵ Po ivyisu ivi: U Etiyopiya nu Libiya nu Lidiya sona ni chisu chosi icha Alabiya poka na bantu bane babo bakwivwana nabo, bakwiza pakufwila poka kubwite.

⁶ “ ‘U Mwene akuti: Babo bakuchavwa ichisu icha Ijiputi bakwiza pakughoghiwa, po amaka ghagho bakwituvya nagho ghakwiza pakumala. Ukwanda ku Migidoli mupaka ku Aswani, bakwiza pakufwila kubwite, u Mwene Uwamaka Ghosi anena.

⁷ U Ijiputi akwiza pakuba chisami pakasi pavyisu ivisami, sona utwaya twache utukulu nkani, tukwiza pakuba visami pakasi pa twaya utukulu nkani.

⁸ Po bakwiza pakuzimanya ukuti ane ne Mwene, bo napemba umoto mukaya aka Ijiputi, sona nukubaghogha babo bakumwavwa.

⁹ “ ‘Pisiku lilalila intumi zikwiza pakwenda lubilolubilo mubwato ukufuma kukwane nukubuka pakuboghofya aba muchisu icha Etiyopiya babo batamenye nachimo. Po bakwiza pakunyila nkani pisiku lilyo u Ijiputi akwiza pakunanganika, naloli isiku lila likwiza.

¹⁰ “ ‘U Mwene Uwamaka Ghosi akuti: Nkwiza pakumazya ubukabi ubwa chisu icha Ijiputi, na maka agha Nebukadineza u mwene uwa chisu icha Babiloni.

¹¹ Umwene poka na basilikali bache, luko lwakoghofya nkani pakasi pa inko, bakwiza pakutumiwa pakuchinangannya ichisu. Bakwiza pakulwa ubwite muchisu icha Ijiputi, po muchisu icha Ijiputi mukwiza pakwizula nimivimba.

¹² Nkwiza pakukamusya utusoko utwa Nayilo, nukuchibika ichisu munyobe izya bantu ababibi, namaka aghabayeni nkwiza pakuchipela pakuba chisami, poka ni vintu vyosi vivyo vili mulamula. U Mwene anena.

¹³ “ ‘U Mwene Uwamaka Ghosi akuti: Nkwiza pakuvinangannya ivifwani, nukumazya abachala abavifwani aba mu Memfisi. Mutakwiza pakubamo sona u mwene muchisu icha Ijiputi, sona nkwiza pakubikamo ubogha muchisu chosi.

¹⁴ Nkwiza pakuchinangannya ichigaba icha Patilosi, nukupemba umoto mukaya akakulu nkani aka Zowani, sona nukubafunda abantu aba mu Tebesi.

¹⁵ Nkwiza pakupungulila ubukali bwane pabantu aba mu Pelusiyumi, kako lilinga ilya chisu icha Ijiputi, sona nkwiza pakubanangannya abasilikali aba mukaya aka Tebesi.

¹⁶ Nkwiza pakupemba umoto muchisu icha Ijiputi, aba mu Pelusiyumi bakwiza pakuba mububavu ubukulu. Akaya aka Tebesi kakwiza pakupankuliwa, abantu aba mu Memfisi bakwiza pakuba nubogha.

¹⁷ Abalumendo aba mu Heliyopolisi nu Bubasitisi, bakwiza pakufwila kubwite, po abakolo bakwiza pakubuka kubuzya.

¹⁸ Likwiza pakuba lisiku ilya chisi mukaya aka Tapanesi, bo namazya amaka agha Ijiputi, amaka ghache ghagho akwituvya nagho ghakwiza pakumala, akwiza pakuvwinkiwa na mabingu, sona utwaya twache tosi tukwiza pakubuka kubuzya.

¹⁹ Po nkwiza pakuwisizya ulufundo lwane pa Ijiputi, sona bakwiza pakumanya ukuti ane ne Mwene.’ ”

U mwene uwa Ijiputi ate namaka

²⁰ Pisiku ilyaseveni, mumwezi uwakwanda, mumwaka uwa 11 bo bakubuka kubuzya u Mwene akambuzya akati,

²¹ “Wee mwana uwa muntu, napyola inyobe iya Falabo u mwene uwa muchisu icha Ijiputi. Po intayipinyitepo ukuti yipole pamo ukuti yibe namaka aghakulemela upanga.

²² Polelo u Mwene Uwamaka Ghosi akuti: Ennya indi pakulwana nu Falabo u mwene uwa Ijiputi. Nkwiza pakuzipyola inyobe zyache zyosi zibili zila, inyobe yache yiyo yipyokite na yiyo yitapyokite, nkwiza pakumuwisizya pasi u panga ukufuma munyobe zyache.

²³ Nkwiza pakubachimbizya aba Ijiputi pakasi pa inko nukubanyampanizizya muvyisu vyosi.

²⁴ Nkwiza pakuzikazya inyobe izya mwene uwa muchisu icha Babiloni nukubika u panga munyobe zyache, loli nkwiza pakupyola inyobe izya Falabo sona akwiza pakukoloma pamaso papache ngati muntu yuyo avulaziwe nkani.

²⁵ Nkwiza pakuzikazya inyobe izya mwene uwamu Babiloni, loli inyobe izya Falabo zitakwiza pakuba namaka. Po bakwiza pakumanya ukuti ane ne Mwene, bo nabika u panga munyobe izya mwene uwa muchisu icha Babiloni nukulwa naba muchisu icha Ijiputi.

²⁶ Nkwiza pakubachimbizya aba Ijiputi pakasi pa inko nukubanyampannya muvyisu vyosi. Po bakwiza pakumanya ukuti ane ne Mwene.”