Ezekiyeli 3 - IBAYIBOLO 2024

¹ Po u Mwene akambuzya akati, “Wee mwana uwa muntu, lyanga chicho nkukupa, lyanga ibuku, po ubuke pakubabuzya aba Izilayeli.”

² Po nkighula umulomo wane, akampa ibuku lila ukuti indye.

³ Akambuzya akati, “Wee mwana uwa muntu, lyanga ibuku lilyo nkukupa po wikute.” Nkalya, likanona ngati buchi.

⁴ Akambuzya akati, “Wee mwana uwa muntu, buka kuba Izilayeli nukubabuzya amazyu ghane.

⁵ Intakukutuma kuba luko babo bakunena ineno inkafu injeni, loli nakutuma kuba Izilayeli.

⁶ Intakukutuma kuba luko babo bakunena ineno inkafu injeni, babo utangaghivwa amazyu ghabo. Naloli nanti nkakutumagha ku bantu banaba, ngali bakakuteghelezya.

⁷ Loli aba Izilayeli batakulonda pakukuteghelezya, pachifukwa ichakuti batakulonda pakunteghelezya. Pakuti bosi bamadinko sona ba moyo amakafu.

⁸ Nkwiza pakukupela uwa moyo umukafu sona nu mujivu pakulwana nabo.

⁹ Nkwiza pakukupela pakuba nu moyo umukafu nkani ngati libwe ilya dayimondi. Utakabanyilaye pamo ukoghopa ivyeni vyabo, napapo basambuke.”

¹⁰ Po akambuzya akati, “Wee mwana uwa muntu, teghelezya nkani amazyu ghosi nukughasunga mumoyo, ghagho nkukubuzya.

¹¹ Polelo, buka ku bantu abakukwinyu babo bali mubuzya ubabuzye uti, ‘U Mwene Uwamaka Ghosi akuti,’ Manyi bakwivwa pamo batakwivwa.”

¹² Po Umuzimu akankwezya pamwanya, kwisinda kwane nkivwa ichongo ichikulu nkani ngati kasenyenta akakulu nkani likunena ukuti, “Leka ubuchindamu ubwa Mwene bupaliwanje mumo akwikalamo!”

¹³ Ichongo chicho nkachivwa icha vipapande ivya bumi vivyo vikapalamasannyanga sona ni chongo icha vingelengele chicho chikivwika chikaba ngati kasenyenta.

¹⁴ Umuzimu akanyamulila mumwanya nukubuka nane, po umoyo wane ghukababa sona nkakalala, pakuti u Mwene akampa amaka.

¹⁵ Nkafika ku bazya babo bakikalagha mu Teli Abibi kupipi nu lusoko ulwa Kebali. Palapala, po papo bakikalagha, nkikala pakasi papabo amasiku seveni bo nkuswighaswigha bulo.

U Mwene akumusala Ezekiyeli pakuba mulindilili

¹⁶ Pabumalilo ubwa masiku seveni u Mwene akambuzya akati,

¹⁷ “Wee mwana uwa muntu, nakupela awe pakuba we mulindilili uwaluko ulwa Izilayeli. Po ivwa amazyu ghagho nkukubuzya, ukuti ubasoke mubuzilo bwane.

¹⁸ Nanti nkumubuzya umuntu umubibi ukuti, ‘Naloli ukwiza pakufwa,’ po waleka pakumusoka pamo ukumubuzya ukuti aleke izila zyache imbibi umwakuti abupoke ubumi bwache, umubibi yula akwiza pakufwila mumbibi zyache, po ukwiza pakuba ninongwa pachifukwa icha bufwe bwache.

¹⁹ Loli nanti ukumusoka umuntu umubibi sona atakubuleka ububibi bwache pamo muzila zyache imbibi, akwiza pakufwa pachifukwa icha mbibi zyache, loli awe ukwiza pakwipoka wemwene.

²⁰ “Sona nanti umugholosu akubuleka ubugholosu bwache nukubomba ububibi, nkwiza pakubika ichizinka pantazi papache, po akwiza pakufwa. Pachifukwa ichakuti utakamusoka akwiza pakufwa pachifukwa icha mbibi zyache. Imbombo ingolosu zizyo akabomba zitakwiza pakukumbukiwa, po awe ukwiza pakuba ninongwa pachifukwa icha bufwe bwache.

²¹ Loli nanti ukumusoka umuntu umugholosu ukuti atakabombaye imbibi, po atakubomba imbibi, naloli akwiza pakuba nubumi, pachifukwa ichakuti akivwa isoki, sona ukwiza pakwipoka wemwene.”

²² Po amaka agha Mwene ghakanyizila nukumbuzya ukuti, “Nyamuka, buka kwikombe, po kulakula nkwiza pakunena nawe.”

²³ Po nkanyamuka nukubuka kwikombe. Ubuchindamu ubwa Mwene bukaba kulakula ngati buchindamu bubo nkennya palusoko ulwa Kebali, sona nkawa umwakukupama.

²⁴ Po Umuzimu akanyinjila nukunyimika umwakugholoka. Akambuzya akati, “Buka, wiyighalile munyumba yako.

²⁵ Po wee mwana uwa muntu ukwiza pakupinyiwa ninkusa, ukwiza pakupinyiwa umwakuti uleke pakwepapo pakasi pabantu.

²⁶ Nkwiza pakululematizya ululimi lwako kumwanya ku mulomo, umwakuti ubanje we chinunu sona utakabachemelaye, napapo basambuke.

²⁷ Loli nanti nkunena nawe nkwiza pakukwighula umulomo wako, po ukwiza pakubabuzya ukuti, ‘U Mwene Uwamaka Ghosi akuti.’ Yuyo akulonda pakuteghelezya, muleke ateghelezye, sona wesi yuyo akukana, muleke. Pakuti basambuke.”