Ezekiyeli 29 - IBAYIBOLO 2024

Ubulaghuzi ubwakususannya nu Ijiputi

¹ Pisiku ilya 12, mumwezi uwa 10 mumwaka uwa 10 bo bakubuka kubuzya, u Mwene akambuzya akati,

² “Wee mwana uwa muntu, ennya icheni chako kwa mwene u Falabo uwa chisu icha Ijiputi sona laghula umwakumususya ni chisu chosi icha Ijiputi.

³ Umubuzye ukuti, ‘U Mwene Uwamaka Ghosi akuti: Nkukususya awe we Falabo, u mwene uwamu Ijiputi, awe we nyivwila inkulu, yiyo yikughona pakasi patusoko. Ukuti, “Ulusoko ulwa Nayilo lwane, nkipangila ne mwene.”

⁴ Loli nkwiza pakubika indobani munjegho zyako, nukuzipela iswi pakumamatila mutupapa twako. Nkwiza pakukwefyamo mukasi mutusoko twako, poka niswi zizyo zimamatiye mutupapa twako.

⁵ Nkwiza pakukuleka munkolongo, awe poka niswi zyosi izya mutusoko twako. Ukwiza pakuwila pabuzelu bulo, patakwiza pakubapo nayumo umuntu uwa kukuseba, sona utakwiza pakusyiliwa. Nkwiza pakukubika pakuba chakulya icha vinyamana ni viyuni.

⁶ Po abantu bosi babo bakwikala mu Ijiputi bakwiza pakumanya ukuti ane ne Mwene. “ ‘Pachifukwa ichakuti awe Ijiputi ukaba ngati ndisa iya lutete kubanyumba iya Izilayeli,

⁷ bo bakukulema ninyobe zyabo ukapyoka nukubalasa ivipunko vyabo. Bo bakweghamila ukapyoka sona inyuma zyabo zikaneng'ena.

⁸ “ ‘Polelo u Mwene Uwamaka Ghosi akuti: Nkwiza nu bwite nukubaghogha abantu bako ni vinyamana vyabo.

⁹ Ichisu icha Ijiputi chikwiza pakuba chisami. Po bakwiza pakumanya ukuti ane ne Mwene. “ ‘Pachifukwa ichakuti ukati, “Ulusoko ulwa Nayilo lwane, nene nkalupela.”

¹⁰ Polelo nkukususya awe poka nu tusoko twako, sona nkwiza pakuchipela ichisu icha Ijiputi pakuba chisami mumo abantu batakwiza pakuzengamo ukwanda ku Migidoli mupaka ku Aswani, mupaka ukufika kumpaka iya Etiyopiya.

¹¹ Nayumo umuntu pamo ichinyamana chicho chikwiza pakwendemo sona atalipo nayumo yuyo akwiza pakwikalamo amaka 40.

¹² Nkwiza pakuchipela ichisu icha Ijiputi pakuba chisami ukuvichila ivisami ivya vyisu ivinji, sona utwaya twache utukulu nkani tukwiza pakuba visami amaka 40. Nkwiza pakubanyampanizizya aba Ijiputi pakasi pa inko nukubachimbizizya muvyisu ivinji.

¹³ “ ‘Pope bulo u Mwene Uwamaka Ghosi akuti: Pabumalilo ubwa maka 40 nkwiza pakubabungannya aba Ijiputi ukwandila mu inko mumo bakanyampanila.

¹⁴ Nkwiza pakubefyamo mubuzya nukubanyosekezya ubwiza bwabo muchisu icha Patilosi kuntende ukwa chisu icha Ijiputi, ichisu icha banyenya babo. Ubumwene bwabo butakwiza pakuchindikiwa nalumo.

¹⁵ Bukwiza pakuba bumwene ubwakwisiwa sona butakwiza pakwikwezya bwene pamwanya pa inko izinji. Nkwiza pakubupela pakuba budedebazu nkani umwakuti butakwiza pakulaghilapo sona inko.

¹⁶ Aba Izilayeli batakwiza pakubasubila sona aba Ijiputi ukuti babavwe loli bakwiza pakuba chikumbusyo pachifukwa icha mbibi zyabo. Po aba Izilayeli bakwiza pakumanya ukuti ane ne Mwene Uwamaka Ghosi.’ ”

U mwene u Nebukadineza akumupota u Ijiputi

¹⁷ Pisiku ilya kwanda, mumwezi uwakwanda mumwaka uwa 27 bo bakubuka kubuzya, u Mwene akambuzya akati,

¹⁸ “Wee mwana uwa muntu, u Nebukadineza u mwene uwa muchisu icha Babiloni akwiza na basilikali ku kaya akakulu nkani aka Tile, umutu uwa musilikali wesi ghukaba ni chipala sona ichipunko chosi chikasyotoka. Loli pope bulo umwene na basilikali bache batakapokelapo umuvwalo ukufuma ku Tile, pachifukwa icha mbombo yiyo bakabomba.

¹⁹ Polelo u Mwene Uwamaka Ghosi akuti: Nkwiza pakuchibika ichisu icha Ijiputi munyobe izya Nebukadineza u mwene uwamu Babiloni, sona akwiza pakusenda ubukabi bwache nukubuka nabo. Akwiza pakuchifyula ichisu pakuba malipilo agha basilikali bache.

²⁰ Namupa u mwene u Nebukadineza poka na basilikali bache ichisu icha Ijiputi, pachifukwa icha imbombo yiyo bakambombela, u Mwene Uwamaka Ghosi anena.

²¹ Pakabalilo kalakala nkwiza pakuyikwezya impembe paba Izilayeli, po nkwiza pakwighula umulomo wako ukuti unene pakasi papabo. Po bakwiza pakumanya ukuti ane ne Mwene.”