Ezekiyeli 28 - IBAYIBOLO 2024

Ubulaghuzi ubwakususannya nu mwene uwamu Tile

¹ U Mwene akambuzya akati,

² “Wee mwana uwa muntu, mubuzye umulaghili uwa kaya akakulu nkani aka Tile ukuti, ‘U Mwene Uwamaka Ghosi akuti: Pachifukwa icha moyo wako uwakwikwezya wati, “Ane ne chala, nkwikala pachitengo icha chala pakasi panyanja.” Loli we muntu bulo, ute we chala, napapo ukwinong'ona ukuti, we wamahala ngati we chala.

³ Nkimba uli na mahala ukumuchila u Daniyeli? Nkimba katalipo nakamokamo kako kakubusyefu kukwako?

⁴ Amahala ghako nu bumanyi bwako, vyakupela pakuba we mukabi, sona wabungannya u golide nu siliva, munyumba izya kusungilamo.

⁵ Pachifukwa icha bumanyi bwako pakughulizannya, wabalizya ubukabi bwako, sona pachifukwa icha bukabi bwako wikwezya nkani.

⁶ “ ‘Polelo u Mwene Uwamaka Ghosi akuti: Pachifukwa ichakuti ukwinong'ona ukuti we wamahala, ngati we chala,

⁷ nkwiza na bayeni pakulwana nawe, inko izya koghofya nkani. Bakwiza pakuwesa abapanga babo, pakulwana nukuboneka akiza kwako ukwa mahala, nukubunangannya ubuchindamu bwako ubwakulama.

⁸ Bakwiza pakukwisizya mwipumpa, sona ukwiza pakufwa imfwa imbibi nkani pakasi panyanja.

⁹ Nkimba ukwiza pakunena pamaso pababo bakukughogha ukuti, “Ane ne chala?” Awe we muntu bulo, tewe chala, bo uli munyobe izya babo bakukughogha.

¹⁰ Ukwiza pakufwa ngati muntu yuyo atasilimuliwe, munyobe izya bayeni. U Mwene Uwamaka Ghosi anena.’ ”

Ukuwa ukwa mwene uwamu Tile

¹¹ U Mwene akambuzya akati,

¹² “Wee mwana uwa muntu, mwimbile u mwene uwa mukaya akakulu nkani aka Tile ulwimbo ulwa nkuto ukuti, ‘U Mwene Uwamaka Ghosi ati: Ukaba we chimanyilo icha bwiza ubwakufikapo, nu wamahala aminji sona nu wakuboneka akiza.

¹³ Ukikalagha mu Edeni mumughunda uwa Chala, ichakuvwala chako chosi chikayaniziwa nibwe ilya mutengo, ilya lubi nilya topazi nilya emeladi nilya kilisolite nilya onikisi nilya yasipala nilya safile nilya tukoyizi sona nilya belili. Ivyakubikamo amabwe ghanagha vikaba vya golide. Pisiku lilyo ukapeliwanga ivintu vinivi vikayaniziwa.

¹⁴ Ukapakiwa pakuba we kelubi umulindilili, pakuti nkamwimika. Ukaba pighamba izelu ilya Chala, ukendagha pakasi pamabwe aghamoto.

¹⁵ Utakaba ni chilema nachimochimo mukendele kako kosi ukwanda pisiku lilyo ukapeliwanga, ukufika pakabalilo kako imbibi yikaghiwanga mumwako.

¹⁶ Pachifukwa icha bwinji ubwa ivyakughulizya vyako, ukizula ni vyongo sona ukananga. Po nkakusumbila pasi pighamba ilya Chala, pakuba ngati chintu ichinyazu, po nkakwefyapo, we kelubi umulindilili, pakasi pamabwe aghamoto.

¹⁷ Ukwikwezya pachifukwa icha kuboneka akiza kwako, ukaghanangannya amahala ghako pachifukwa icha buchindamu bwako. Po nkakusumbila pasi, ukuti ubanje chimanyilo pamaso pa bamwene.

¹⁸ Pachifukwa icha imbibi zyako inyinji nkani, pakubomba ubughulizi bwako muzila zizyo zitabaghiye, wabunyazya ubuzilo bwako ubuzelu, po nkatuma umoto pakasi papako, ghugho ghukakulungulizya, nukukwandula pakuba litoyi, bo umuntu wesi akukwennya.

¹⁹ Inko zyosi zizyo zikakumanya zikukuswigha, ukwiza pakumala akabibi, sona utakwiza pakubako.’ ”

Ubulaghuzi ubwabakususya aba Sidoni

²⁰ U Mwene akambuzya akati,

²¹ “Wee mwana uwa muntu, ennya icheni chako kukaya akakulu nkani aka Sidoni, po ulaghule umwakukasusya

²² uti, ‘U Mwene Uwamaka Ghosi akuti: Wee Sidoni, nkukususya, nkwiza pakukulanjizya ubuchindamu bwane mumwako. Ukwiza pakumanya ukuti ane ne Mwene, bo ikukufunda, sona bo nkwilanjizya ubuzelu bwane mumwako.

²³ Nkwiza pakukutumila ichiwaya ichakoghofya, nukulyendezya ibanda mumisebo yako. Abakughoghiwa bakwiza pakufwila mumwako, nu bwite bubo bukulwana nawe kosi na kosi. Po ukwiza pakumanya ukuti ane ne Mwene.

²⁴ “ ‘Aba Izilayeli batakwiza pakulasiwa na bantolovu sona namivwa pakasi pabapalamani babo ababibi. Po bakwiza pakumanya ukuti ane ne Mwene Uwamaka Ghosi.

²⁵ “ ‘U Mwene Uwamaka Ghosi akuti: Bo nababungannya aba Izilayeli ukufuma mu inko kuko bakanyampanila, nkwiza pakwilanjizya nemwene pakuba muzelu pakasi papabo, bo inko zikwennya. Po bakwiza pakwikala muchisu ichabo ni chabo, chicho nkamupa umubombi wane u Yakobo.

²⁶ Bakwiza pakwikala mulamula umwakufwasa nukuzenga inyumba zyabo nukubyala amampesya, bo nkubafunda abapalamani babo, babo bakabayivyanga. Po bakwiza pakumanya ukuti ane ne Mwene u Chala wabo.’ ”