Ezekiyeli 27 - IBAYIBOLO 2024

Ulwimbo ulwa kubalilila aba Tile

¹ U Mwene akambuzya akati,

² “Wee mwana uwa muntu, imba ulwimbo ulwa nkuta ulwa abantu aba mu Tile.

³ Ubabuzye abantu aba mukaya akakulu nkani aka Tile babo bakwikala piloboko ilya nyanja, babo bakughulizannya na bantu aba muvyisu ivyinji mulubazu ulwa nyanja uti, ‘U Mwene Uwamaka Ghosi ati: Wee Tile ukuti, “Nkuboneka akiza nkani.”

⁴ Impaka zyako zili pakasi panyanja, abazengi bako bakakuyannya umwakufikapo.

⁵ Bakayannya amatabwa ghako ghosi, agha payini kwighamba ilya Senili, bakasenda ikwi ilya mwale mu Lebanoni pakukuyanizizya ikwi itali pakubombezya ukwenda panyanja.

⁶ Bakabiza inkafi izya kuvighila izya makwi, agha mupandapanda agha muchisu icha Bashani, bakapangila akatalati na matabwa agha mulombwa mu Sayipulasi, bakabikapo amino agha zovu.

⁷ Umwenda umutonte, uwakulabiwa uwamu Ijiputi, ghukaba mwenda wako uwakulema impepo, sona ghukaba ngati ndembela, inchesamile nuwa bulu, ukufuma pakasungo aka Elisha.

⁸ Abantu aba mu Sidoni naba Alivadi, bo babo bakavighagha ubwato bwako. Wee Tile, abafundi bako bo babo bakendezyanga ubwato.

⁹ Abakuyannya amabwato aba mu Gebala, bakaba pakasi papinyu. Bakayannyanga amabwato, ukufuma kosi na kosi. Amabwato ghosi agha panyanja, nabendezya amabwato babo, bakiza nu katundu, ukuti baghulizannye nawe ukatundu.

¹⁰ “ ‘Abantu aba mu Peleziya nu Lidiya nu Puti, bakakubombela ngati basilikali bako. Bakapayika ingulu zyabo, ni visote pa vibumba vyako, pakukwizila nu buchindamu.

¹¹ Abantu aba mu Alivadi, naba mu Heleke, bakaba balindilili abamalinga ghako imbazu zyosi, abantu aba mu Gamadi bakaba balindilili abavitembe vyako. Bakapayika ingulu zyabo pavibumba vyako, bakakupa ukuboneka akiza umwakufikapo.

¹² “ ‘Ichisu icha Talishishi chikaghulizannyanga nawe, pachifukwa icha bukabi bwako ubwakulekanalekana. Bakaghulizannyanga nu siliva ni chela nu mutovu sona nu waya.

¹³ “ ‘Ichisu icha Gilisi nicha Tubali nicha Mesheki vikaghulizannyanga nawe. Vikaghulizannyanga abazya ni vibombelo ivya mukuba nu katundu wabo.

¹⁴ “ ‘Abantu aba mu Beti Togalima bakaghulizannyanga ifalasi izyambombo, ifalasi izya bwite ni mpunda nu katundu wako.

¹⁵ “ ‘Abantu aba muchisu icha Lodesi bakaghulizannyanga nawe, sona ivyisu ivyinji ivya mulubazu ulwa nyanja vikaba munalo wako. Bakaghulizannyanga amino agha zovu nikwi ilya eboni.

¹⁶ “ ‘Ichisu icha Siliya chikaghulizannyanga nawe pachifukwa icha bwinji ubwa katundu wako. Chikaghulizannyanga nawe amabwe aghamutengo agha emeladi na menda amachesamile na menda aghakulabiwa na menda amatonte na mabwe amakafu nkani aghamutengo.

¹⁷ “ ‘Ichisu icha Yuda nicha Izilayeli vikaghulizannyanga nawe. Vikaghulizannyanga ingano iyakufuma ku Miniti ingano nu buchi na mafuta agha misyunguti sona na mafuta aghakununkila.

¹⁸ “ ‘Akaya akakulu nkani aka Damasika kakaba munalo uwa vyakughulizya ivyinji pachifukwa ichakuti kakaba nu bukabi ubwakulekanalekana. Bakaghulizyanga uvinyo uwa ku Heliboni na meya agha ku Zahali,

¹⁹ sona nu vinyo uwa ku Uzali, yuyo bakaghulizannyanga ni vyela nu kasiya sona na muba.

²⁰ “ ‘Abantu aba ku Dedani bakaghulagha amenda aghakwikalila pafalasi.

²¹ “ ‘Aba mu Alabiya sona na bamwene bosi aba mu Kedali bakaghulizannyanga nabo utwana utwa ng'ozi naba dubi sona ni mbuzi.

²² “ ‘Abaghulizi aba mu Sheba naba mu Lama bakaghulizannyanga nawe. Bakaghulizannyanga utwakunonezya inyanyi, na mabwe aghamutengo, sona nu golide.

²³ “ ‘Ichisu icha Halani nicha Kane nicha Edeni sona na baghulizi aba mu Sheba nicha Asiliya sona nicha Kilimadi vikaghulizannyanga nawe.

²⁴ Abantu aba bakaghulizannyanga nawe inkazo izyakuboneka akiza, amenda agha bulu, aghakulabiwa nu bulili ubulabannye sona ninkusa izya kupotiwa akiza.

²⁵ Amabwato agha ku Talishishi, ghakanyamulilagha ukatundu wako kosi kuko bakamulondagha. Ukaba ngati bwato bubo bwizuye nu katundu umung'wamu pakasi panyanja.

²⁶ Abakwendezya bakabuka nawe pakasi panyanja. Loli impepo iyakubufumilo bwizuba, yikakudwibizya pakasi panyanja.

²⁷ Ubukabi bwako, nukatundu wako, nivintu vivyo bakughulizya, sona na bakwendezya, na balongozi ababwato, na bapalamatabwa, na baghulizi, sona na basilikali bako bosi, babo bakaba pakasi papinyu, bakwiza pakudwiba pakasi panyanja, pisiku ilya kuzepuka ukwa bwato bwinyu.

²⁸ Ichisu icha mulubazu ulwa nyanja, chikwiza pakutetema pakwivwa ukulila, ukwa bantu bako babo bakwendezya amabwato ghako.

²⁹ Bosi babo bakulema inkafi, bakwiza pakwika mumabwato ghabo. Babo bakendezyanga amabwato, sona na babo bakwenda panyanja, bakwiza pakwima pisila.

³⁰ Bakwiza pakukulila nkani, sona nukufwifwitila, bakwiza pakwinyafila ulufumbi pamitu yabo, nukughalaghata mwitoyi, pachifukwa icha chitima.

³¹ Bakwiza pakumwa isisi zyabo, pachifukwa icha wewe, nukuvwala amasaka, pachifukwa icha chitima. Bakwiza pakukulila nu moyo uwa bubavu, sona ubufwe ubwa kubaba nkani.

³² Bo bakulila nukufwifwitila, bakwiza pakwimba ulwimbo ulwakuti, “Nkimba kakabapo akaya kamo, kako kakufwanikiziwa nu Tile, kako kazyunguliwe ni nyanja?”

³³ Bo ivintu ivya kughulizya vyako vili munyanja posi na posi, ukazyikutizya inko inyinji, ni vyuma vyako ivyinji, sona nubukabi bwako ubwakulekanalekana, ukabapela abamwene aba muchisu ichapasi pakuba bakabi.

³⁴ Ilelo wapankuka na mayigha agha munyanja, nu bwibizu ubwa mizi. Ukatundu wako poka na bambombo bako, bosi mwadwibila poka nabo.

³⁵ Bosi babo bakwikala mulubazu ulwa nyanja bakukuswigha. Abamwene babo bakutetema nkani, ivyeni vyabo vili nubogha.

³⁶ Abaghulizi babo bali pakasi pa inko, bakukobezya. Wafika pabumalilo ubwakoghofya, sona utakwiza pakubako.’ ”