Ezekiyeli 26 - IBAYIBOLO 2024

Ubulaghuzi ubwakubasusya aba Tile

¹ Mumwaka uwa 11, pisiku ilya mwezi uwakwanda, u Mwene akambuzya akati,

² “Wee mwana uwa muntu, pachifukwa ichakuti abantu aba mu Tile bakababuzya nizya Yelusalemu ukuti, ‘Ennya! Ulwiyi ulwa inko lwapyoka, sona lwighuka ukuti twinjilemo, pachifukwa ichakuti akaya aka Yelusalemu kipela pakuba chisami, nkwiza pakuba ne mukabi,’

³ polelo u Mwene Uwamaka Ghosi akuti: Nkukususya we Tile sona nkwiza pakuzipela inko pakulwana nawe, ngati mumo inyanja yikuvundulila amayigha.

⁴ Bakwiza pakuvimongolannya ivibumba ivya Tile nukuwisizya pasi ivitembe vyache, nkwiza pakwefyapo itope lyosi nukukupela pakuba we lyalabwe.

⁵ Likwiza pakuba lyalabwe lilyo abaloba iswi bakwiza pakwanikapo ivilepa vyabo, u Mwene Uwamaka Ghosi anena. Akaya kakwiza pakuba kakufyuliwa ninko,

⁶ sona na bantu babo bazengite mulamula bakwiza pakufwila kubwite. Po bakwiza pakumanya ukuti ane ne Mwene.

⁷ “Pakuti u Mwene Uwamaka Ghosi akuti: Nkwiza nu mwene u Nebukadineza uwamu Babiloni yuyo we mwene uwa bamwene, yuyo akwiza pakufumila kumitu pakulwa naba Tile, ali ni ngolo na bantu babo bakwelite pafalasi, ni chibukatila ichikulu icha basilikali.

⁸ Abantu abamutwaya utwa kwisila bakwiza pakughoghiwa kubwite. Akwiza pakuzenga ichitembe pakulwana nawe, nukuzenga ivyakukwelapo pakulwa nawe sona ni ngulu zyache bo akwipoka.

⁹ Bakwiza pakumongolonnya ivibumba vyinyu nivilwilo ivya bwite nukuwisizya pasi ivitembe vyinyu.

¹⁰ Ifalasi zyache zikwiza pakuba nyinji nkani, umwakuti u lufumbi ulwa falasi zyache lukwiza pakubavwinka. Ivibumba vyako vikwiza pakuneng'ena pachifukwa icha chongo icha falasi zyache, ni vingelengele ivya ngolo zyache, bo u mwene akwinjila mukaya akakulu nkani, ngati mumo abantu bakwinjilila mukaya kako bapankula umulyango.

¹¹ Inyayo izya falasi zyache zikwiza pakukanyankila imisebo yako. Akwiza pakubaghogha abantu bako nupanga, sona impanda zyako izyamaka zikwiza pakuwa pasi.

¹² Bakwiza pakubufyula ubukabi bwako sona na vivyo mukughulizya, nukumongolannya ivibumba vyako nukuzinangannya inyumba zyinyu inyiza, bakwiza pakughasumba amabwe na matabwa ni tope munyanja.

¹³ Nkwiza pakumazya ichongo icha nyimbo zyako, sona nukulila ukwa vinanda kutakwiza pakwivwika sona.

¹⁴ Nkwiza pakukupela pakuba we lyalabwe lilyo patalipo nakamokamo, sona ukwiza pakuba we wakwanikilapo ivilepa. Utakwiza pakuzengapo sona, pakuti ane ne Mwene nanena, u Mwene Uwamaka Ghosi anena.

¹⁵ “U Mwene Uwamaka Ghosi akubabuzya aba Tile akuti: Nkimba ivyisu ivya mulubazu ulwa nyanja vitakwiza pakuneng'ena nukuwa kwako, bo abantu babo bavulaye bakukoloma sona ukughoghiwa kukubombiwa pakasi papinyu?

¹⁶ Po abamwene babo bali mulubazu ulwa nyanja bakwiza pakuleka pakulaghila nukubika palubazu inkazo zyabo sona bakwiza pakuvula amenda ghabo aghakulabiwa. Bakwiza pakuba nubogha, bakwiza pakwikala pasi nukutetema akabalilo kosi, bo bakukuswigha.

¹⁷ Po bakwiza pakwimba ulwimbo ulwa nkuta ulwakuti, Wee kaya akakulu nkani wananganika bunubu, awe ukalaghila panyanja! Ukaba wamaka panyanja, awe poka na bantu bako, ukaboghofya abantu bosi babo bakikala mulamula.

¹⁸ Ilelo ivyisu ivya mulubazu ulwa nyanja vikutetema pakuwa kwako, utusungo utwa munyanja tukunyila nukuwa kwako.

¹⁹ “U Mwene Uwamaka Ghosi akuti: Nkwiza pakukupela awe pakuba chisami, ngati kaya akakulu nkani kako nayumo umuntu akwiza pakuzengamo sona nkwiza pakukuvwinka nu bwibizu ubwa mizi agha nyanja,

²⁰ po nkwiza pakukusumba pasi poka na babo bakubuka kwipumpa, abantu abakale. Nkwiza pakukwikazya kusi kuchisu, mubuzilo ubwakale nkani, poka na bantu babo bakubuka kubuzilo ubwabafwe, mutakwiza pakunyokela sona nayumo uwakwikala mukasi mumwako, pamo pakusenda ubuzilo bwako muchisu icha abantu abumi.

²¹ Nkwiza pakukumala akabibi nkani, utakwiza pakubako sona. Abantu bakwiza pakukulonda loli batakwiza pakukwagha.” U Mwene Uwamaka Ghosi anena.