Ezekiyeli 25 - IBAYIBOLO 2024

Ubulaghuzi ubwakubasusya aba Amoni

¹ U Mwene akambuzya akati,

² “Wee mwana uwa muntu, ennya icheni chako kuba Amoni ubalaghulile umwakubasusya.

³ Babuzye aba Amoni ukuti, ‘Ivwa amazyu agha Mwene Uwamaka Ghosi pachifukwa ichakuti mukati: “Eya!” bo mwennya ukuti ubuzilo bwane ubuzelu bwanyaziwa, ichisu icha Izilayeli chikananganika, po abantu aba mu Yuda bakubuka kubuzya,

⁴ polelo nkwiza pakukubika munyobe izya bantu abakubufumilo bwizuba ukuti babanje mpyana yinyu. Bakwiza pakuzenga ivisakasa vyabo pakasi papinyu, bakwiza pakulya ivikomwa vyinyu nukung'wela ulukama lwinyu.

⁵ Nkwiza pakukapela akaya aka Laba pakuba buzilo ubwakudimilapo ingamila sona ichisu icha ba Amoni pakuba chibagha icha ng'ozi. Po mukwiza pakumanya ukuti ane ne Mwene.

⁶ Pakuti u Mwene Uwamaka Ghosi akuti, “Pachifukwa ichakuti mwakoma inkufi zyinyu nukunyela umwalusekelo na moyo aghakuchisamula ichisu icha Izilayeli,

⁷ polelo nkwiza pakugholosezya inyobe yane papinyu nukubabika pakuba chakufyuliwa icha inko. Nkwiza pakubanangannya nukubazimizya mwebosi muchisu ichapasi. Nkwiza pakubanangannya, po mukwiza pakumanya ukuti ane ne Mwene.” ’

Ubulaghuzi ubwakubasusya aba Mowabu

⁸ “Po u Mwene Uwamaka Ghosi akuti, ‘Pachifukwa ichakuti aba Mowabu bakuti, “Abaluko ulwa Yuda bakuyana bulo ni vyisu ivya inko zyosi izinji,”

⁹ polelo nkwiza pakubwitikizya ubwite mutwaya tuto tubazyunguliye, babo bali kumpaka iya chisu icha Mowabu poka nutwaya utu: Beti Yeshimoti, Baala Meyoni nu Kiliyatayimu, bubo buchindamu ubwa chisu chila.

¹⁰ Nkwiza pakuchibika ichisu icha Mowabu poka naba Amoni munyobe izya bantu abakubufumilo bwizuba, ukuti chibanje chabo, umwakuti aba Amoni batakwiza pakukumbukiwa pakasi pa inko,

¹¹ nkwiza pakubafunda aba Mowabu. Po bakwiza pakumanya ukuti ane ne Mwene.’

Ubulaghuzi ubwakubasusya aba Edomu

¹² “U Mwene Uwamaka Ghosi akuti, ‘Abantu aba mu Edomu bali ninongwa pachifukwa icha ku batanizya abamunyumba iya Yuda,

¹³ polelo u Mwene Uwamaka Ghosi akuti: Nkwiza pakugholosezya inyobe yane paba Edomu nukubaghogha abantu ni vinyamana. Nkwiza pakuchipela pakuba chisami ukwandila mukaya aka Temani mupaka mukaya aka Dedani abantu bakwiza pakufwila kubwite.

¹⁴ Nkwiza pakubatanizya aba Edomu namaka agha bantu bane aba Izilayeli, bakwiza pakubomba nabo ukuyana namumo bubeleye ubukali bwane sona nukukalala kwane, bakwiza pakumanya ukutanizya kwane, u Mwene Uwamaka Ghosi anena.’

Ubulaghuzi ubwakubasusya aba Filisiti

¹⁵ “Po u Mwene Uwamaka Ghosi akuti, ‘Aba Filisiti bakatanizya, sona bakatanizya na moyo amabibi pakwitikizya pakumunangannya u Yuda nulubengo lwabo lulo lutakumala,

¹⁶ polelo u Mwene Uwamaka Ghosi akuti: Indi papipi pakugholosezya inyobe yane paba Filisiti sona nkwiza pakubazimizya aba Keleti nukubanangannya bosi babo bakwikala mulubazu ulwa nyanja.

¹⁷ Nkwiza pakubatanizya nkani nukubafunda nubukali bwane. Po bakwiza pakumanya ukuti ane ne Mwene, bo nkubatanizya.’ ”