Ezekiyeli 24 - IBAYIBOLO 2024

Ichili icha sonta yiyo yili pamoto

¹ Mumwaka uwa nayini, mumwezi uwa 10 pisiku ilya 10, u Mwene akambuzya akati,

² “Wee mwana uwa muntu, simba itabwa ilya isiku ilya ilelo, isiku ilya musanya ghuno pachifukwa ichakuti u mwene uwamu Babiloni akwiza pakukazyungulila nu bwite akaya aka Yelusalemu mwisiku linili.

³ Ubabuzye abantu babo basambukiye, ubabuzye ichili chane uti u Mwene Uwamaka Ghosi akuti, ‘Ikazya isonta pamoto, nukupungulilamo amizi.

⁴ Mubikemo ivipuza ivya nyama, yiyo nyiza iya kuchinama niya muchipunko. Mubikemo amafupa amiza,

⁵ usendepo ing'ozi yoka, pakasi pa ng'ozi inyiza, ubikeko inkwi kuntende, po uyileke inyama, yipyanje poka na mafupa.

⁶ “ ‘U Mwene Uwamaka Ghosi akuti: Chighune kukaya akakulu nkani, kako kakukupula ibanda, kali ngati sonta yiyo yili nuluzima, lulo lutakuziwe! Usendemo ichipuza ni chipuza, sona utakasalaye.

⁷ “ ‘Pakuti ibanda lilyo akakupula lili pakasi papache. Akalikupulila pilyalabwe, atakalikupulila pitope, papo ulufumbi lungalifukila.

⁸ Ukuti libunyamusye ubukali bwane nukubatanizya, nkabika ibanda lyache pilyabwe, umwakuti litakafukiliwe.

⁹ “ ‘Polelo u Mwene Uwamaka Ghosi akuti: Chighune kukaya akakulu nkani, kako kakukupula ibanda! Nane nkwiza pakubunganika inkwi inyinji.

¹⁰ Po bunganika inkwi inyinji, nukupemba umoto. Upiye akiza inyama, nukongannya nutwakunonnya inyanyi, sona amafupa ghochiwe.

¹¹ Po piya isonta pamazimwa, yiyo yite nacho chimo, mupaka yipye nkani, ukuti ichela chache chichesame, umwakuti ivinyazu vyosi, vivyo vilimo visunguluke, sona uluzima lwache losi lumale.

¹² Napapo ungayezya pakulusuka, uluzima lwache lukafu nkani pakwepa, loli umoto wene ghungalwefya.

¹³ “ ‘Po ilelo ivinyonywa vyako ko kwinyazya kwako. Pachifukwa ichakuti nayezya nkani pakukuswefya loli utaswepite kubunyazu bwako, mupaka ubukali bwane bukuwile.

¹⁴ “ ‘Ane ne Mwene nanena. Akabalilo kanfikila akakuti imbombele imbombo, sona ntakwiza pakunyokela kwisinda pamo pakukupelela ichisa pamo pakukuhobokela. Ukwiza pakulongiwa ukuyana ni nkalo yako sona ni mbombo zyako, u Mwene Uwamaka Ghosi anena.’ ”

Ubufwe ubwa muchi uwa Ezekiyeli

¹⁵ U Mwene akambuzya akati,

¹⁶ “Wee mwana uwa muntu, ennya umwalubilolubilo indi papipi pakwefyako ichintu chicho amaso ghako ghakuhoboka nacho. Loli utakabanje ni chitima pamo ukulila pamo pakukupula amasozi.

¹⁷ Koloma umwachimyemye, utakamulile umufwe. Vwala ichisote chako ni nkwato zyako kunyayo, utakavwinke icheni chako pamo pakulya ichakulya icha bantu babo bali pachililo.”

¹⁸ Po nkanena na bantu pandabindabi, pa chamabwila umuchi wane akafwa. Ilya ndabi yache nkabomba ngati mumo nkalamuliliwa.

¹⁹ Po abantu bakandalusya bakati, “Tubuzye, nkimba ivintu vinivi vikung'anamula ichoni kukwitu? Nkimba choni chicho ukubomba bunubu?”

²⁰ Po nkababuzya nkati, “U Mwene akambuzya akati,

²¹ ‘Babuzye aba Izilayeli ukuti u Mwene Uwamaka Ghosi ati: Indi papipi pakubunyazya ubuzilo bwane ubuzelu bubo mukwituvikizyapo, ukuhoboka ukwa maso ghinyu, na chicho mukubikilapo umoyo. Po abana binyu abalumendo na balindu babo mukabaleka kwisinda mu Yelusalemu bakwiza pakufwila kubwite.

²² Sona ukwiza pakubomba ngati mumo nabombela. Utakwiza pakuvwinka icheni chako pamo pakulya ichakulya icha bantu babo bali pachililo.

²³ Ukwiza pakuvwala ivisote kumutu ni nkwato kunyayo zyako. Utakwiza pakulilapo, loli ukwiza pakughanda pachifukwa icha mbibi zyako bo umuntu wesi ali pakukoloma pakasi papinyu.

²⁴ U Ezekiyeli akwiza pakuba chimanyilo chinyu, mukwiza pakubomba ngati mumo abombeye. Bo zinizi zyabombiwa, po mukwiza pakumanya ukuti ane ne Mwene Uwamaka Ghosi.’

²⁵ “Po wee mwana uwa muntu, pisiku lilyo nkwiza pakufyula ilinga lyabo, ulusekelo lwabo nu buchindamu bwabo, ivyakuhobosya mumaso ghabo, na vivyo babikitepo umoyo wabo, sona na bana babo abalumendo na balindu.

²⁶ Pisiku lilalila umuntu weka yuyo akapona kubwite akwiza pakukupangila ipangwi ili.

²⁷ Pakabalilo kalakala umulomo wako ghukwiza pakwighuka. Ukwiza pakunena nawe sona utakwiza pakuba bulo myee. Po ukwiza pakuba chimanyilo kukwabo, sona bakwiza pakuzimanya ukuti ane ne Mwene.”