Ezekiyeli 23 - IBAYIBOLO 2024

Imbibi izya bana abalindu babili

¹ U Mwene akambuzya akati,

² “Wee mwana uwa muntu, kukabako abalindu babili babo unyina akaba weka.

³ Bakabombagha ubwamalaya muchisu icha Ijiputi, ukufuma kubulindu bwabo. Kulakula abantu bakalemagha amabele ghabo nukwinyazya.

⁴ Usongo akaba we Ohola, umuzuna wache akaba we Oholiba. Bakaba bane nukupapa abana abalumendo na balindu. Ohola akaba we Samaliya, u Oholiba akaba we Yelusalemu.

⁵ “Ohola akabombagha ubwamalaya bo achili wane, po akibika nkani umoyo wache pavighane vyache aba Asiliya,

⁶ babo bakavwala amenda agha bulu, abalaghili na basongo ababwite bosi bakaba balumendo abakuboneka akiza nkani babo bakakwela pafalasi.

⁷ Akabomba ubwamalaya na bantu abamanyikwe aba mu Asiliya, sona akinyazya mwene pakwiputa ivifwani ivya vighane vyache.

⁸ Atakabuleka ubwamalaya bwache bubo akanda pakubomba mu Ijiputi, ukwandila pakabalilo aka bulindu bwache, abanavuli bakaghonana nawe nukulema amabele ghache aghakubulindu, po ichinyonywa chabo chosi chikamalilagha papache.

⁹ “Polelo nkamubika munyobe izya baghaniwa bache, aba Asiliya babo akabikilako umoyo wache.

¹⁰ Bakamuvula amenda ghache, bakabalema abana bache abalumendo na balindu nukumughogha nupanga. Kosi na kosi abakolo bakanenagha nizya lufundo lulo lukamuwila.

¹¹ “Umuzuna wache Oholiba akazyennya zinizi, loli akaba we malaya ukumuchila umukulu wache.

¹² Wepe bulo akabanyonywa nkani aba Asiliya, abalaghili aba chigaba abasongo aba basilikali, babo bakavwala ivya bwite, bakakwela pafalasi, bosi bakaba abalumendo abakuboneka akiza nkani.

¹³ Nkennya ukuti wepe bulo inyazizye mwene, bosi babili bakendagha izila yoka.

¹⁴ “Loli akendelela nubwamalaya bwache. Akennyanga ivituzituzi ivya banavuli palubumba, ni vifwani ivya ba Babiloni vivyo bakavilabannya ni banyi ichesamu,

¹⁵ bakapinya abalamba mumisana yabo bo bavwalite ivisote kumitu yabo, po bosi bakaboneka ngati bo basongo aba basilikali sona ngati boba Babiloni.

¹⁶ Bo abennya bulo akabanyonywa nukubatumila intumi kuchisu icha Babiloni.

¹⁷ Po aba Babiloni bakiza ukuti balowe nawe, bakamunyonywa nukumunyazya. Bo anyaziwa akamukana.

¹⁸ Akabombagha pabuzelu ubwamalaya bwache, abantu bosi bakamumanya ukuti we malaya. Cho chifukwa nkamupa inkonto, ngati mumo nkabombela nu mukulu wache.

¹⁹ Pope bulo akendelela pakubomba ubwamalaya, akazikumbuka imbombo zyache izya kubulindu, pakabalilo kako akabombagha izya bwamalaya muchisu icha Ijiputi.

²⁰ Akavinyonywa ivighane vyache, vivyo amatulu ghabo ghakaba ngati gha falasi sona babo ubwanavuli bwabo bukaba ngati ubwa mpunda.

²¹ Po akabusamba ubwamalaya bwako ubwa kubulindu, bo aba Ijiputi bakukulema amabele pachifuba chache.

Ubulongi ubwa Chala pa muzuna

²² “Polelo, we Oholiba, u Mwene Uwamaka Ghosi akuti: Nkwiza pakuvivundumuzya ivighane vyako vivyo pisinda pache ukavibenga, ukuti vilwane nawe, nkwiza pakwiza nabo ukufuma kumbazu zyosi,

²³ aba Babiloni naba Kaladeya bosi na bantu aba mu Pekodi naba mu Showa naba mu Kowa poka naba Asiliya bosi nabalumendo abakuboneka akiza, abalaghili bosi abasongo aba basilikali na basilikali bosi babo bakukwela pafalasi.

²⁴ Po bakwiza pakwiza ni vilwilo ni ngolo izya bwite ni ngolo izya katundu ni chiludilo icha bantu ukufumila kumbazu zyosi, bo balemite ingulu inkulu ni nandi ni visote. Nkwiza pakukubika munyobe zyabo ukuti bakufunde, po bakwiza pakukufunda ukuyana ni ndaghilo zyabo.

²⁵ Nkwiza pakubika ubukali bwane ubwa kabini papinyu, mubukalale bwabo bakwiza pakumalana nawe. Bakwiza pakukudumula impuno yako na makutu ghako, sona na babo basyetemo bakwiza pakufwila kubwite. Bakwiza pakubasenda abana bako abalumendo na balindu, babo basyetemo mumwako umoto ghukwiza pabalungulizya.

²⁶ Bakwiza pakuvula amenda ghako ni vyakwibonesekezya akiza.

²⁷ Po nkwiza pakuyimala inyota yako iya bwamalaya bwako, bubo ukanda muchisu icha Ijiputi. Umwakuti uleke pakuvisamba ivintu vivyo ukabombagha mu Ijiputi pamo pakukumbuka sona vivyo ukabomba.

²⁸ “Pakuti u Mwene Uwamaka Ghosi akuti: Indi papipi pakukubika munyobe izya babo pisinda pache ukababenga, sona abantu babo ukabakalalila pachifukwa ichabunyazu bwabo.

²⁹ Bakwiza pakukubombela ivipalapala nukukufyula vyosi vivyo ukiyula. Bakwiza pakukuleka nkule, po umubili uwa bwamalaya bwako bakwiza pakughuleka bo utavwete nachimochimo.

³⁰ Ichinyonywa chako nu bwamalaya bwako vyo vyakwizila nivintu vinivi, pakuti wabomba ubwamalaya ninko izinji nukwinyazya ni vifwani vyabo.

³¹ Wakonka akendele aka mukulu wako, nkwiza pakubika ulubako ulwa ntamyo zyache munyobe zyako.

³² “U Mwene Uwamaka Ghosi akuti: Ukwiza pakung'wela ulubako ulwa mukulu wako, ulubako ulukulu sona nu lwibizu, umuntu wesi akwiza pakubaseka nukubobezya, pakuti ulubako ulu lwizuye nintamyo inyinji.

³³ Ukwiza pakukolwa, sona umoyo wako ghukwiza pakwizula ni chitima, ulubako ulwa kunyila sona ulwa kunanganika, lo lubako ulwa mukulu wako u Samaliya.

³⁴ Ukwiza pakulung'wela nukulumala, ukwiza pakulufwantannya nukughanangannya amabele ghako. U Mwene Uwamaka Ghosi anena.

³⁵ “U Mwene Uwamaka Ghosi akuti: Pakuti wanduvya nukumbika kwisinda kwako, ubaghiye pakufundiwa pachifukwa icha chinyonywa chako nubwamalaya.”

Ubulongi ubwa Chala pa balindu bosi babili

³⁶ U Mwene akambuzya akati, “Wee mwana uwa muntu, nkimba ukwiza pakumulonga u Ohola nu Oholiba? Po ubasusye imbombo zyabo izya mwiko.

³⁷ Pakuti babomba ubwamalaya sona bakupula ibanda. Babomba ubwamalaya ni vifwani vyabo, babika abana babo pakuba vyakwiyipa ivyakocha ku vifwani vyabo.

³⁸ Bambombela sona chinichi, pakubunyazya ubuzilo bwane ubuzelu na Masiku ghane Aghakutuzya.

³⁹ Pisiku lilalila bakabika abana babo pakuba vyakwiyipa kuvifwani vyabo, bakinjila mubuzilo bwane ubuzelu nukubunyazya. Izi zyo zizyo bakabomba munyumba yane.

⁴⁰ “Bakatuma ni ntumi bulo pakubitizya abantu abakubutali, bo bafika, ukogha pachifukwa icha babo, nukwilabannya amaso ghako pakuvwala utwakwibonesekezya akiza.

⁴¹ Ukikala pachitengo ichiza, ni tebulo lilyo likaba pamaso papabo, papo ukabika ivyakununkila na mafuta ghane.

⁴² Nkivwa ichongo icha chilundilo icha bantu babo batakupasya bakufuma munkolongo sona bakabavwika abakolo utubangili munyobe ni mpumpu izya kuboneka akiza pamitu yinyu.

⁴³ “Po nkanena nemwene nkati, ‘Umukolo yula amala nubwamalaya, po ilelo leka bamubombezye ngati we malaya, pakuti momumo abeleye.’

⁴⁴ Bakaghona nu mukolo yula ngati mumo abanavuli bakughonela na bamalaya, po bakabaghona Ohola nu Oholiba.

⁴⁵ Loli abantu abagholosu bakwiza pakubalonga abakolo bala pakubafunda nu bwamalaya ninongwa iya kukupula ibanda, pachifukwa ichakuti abakolo banaba bo bamalaya sona ibanda lili munyobe zyabo.

⁴⁶ “U Mwene Uwamaka Ghosi akuti: Chitizye ichilundilo icha bantu ukuti chibasusye pakuboghofya nukubafyula ukatundu.

⁴⁷ Ichilundilo chikwiza pakubasumba na mabwe nukubaghogha na bapanga, bakwiza pakubaghogha abana babo abalumendo na balindu nukocha inyumba zyabo.

⁴⁸ “Po nkwiza pakumazya ivinyonywa vyabo muchisu, umwakuti abakolo bosi bamanyilepo zimo, ukuti abakolo bosi batakabombaye ubwamalaya ngati mumo abakolo babili bala bakabombelagha.

⁴⁹ Nkwiza pakubafunda pachifukwa icha mbibi iyakwiputa ivifwani. Po abantu bosi bakwiza pakuzimanya ukuti ane ne Mwene Uwamaka Ghosi.”