Ezekiyeli 22 - IBAYIBOLO 2024

Imbibi izya Yelusalemu

¹ U Mwene akambuzya akati,

² “Wee mwana uwa muntu, nkimba ukwiza pakumulonga u Yelusalemu? Nkimba ukwiza pakukalonga akaya kako kakupula ibanda? Po ubabuzye imbombo zyabo zyosi izya mwiko

³ ukuti, ‘U Mwene Uwamaka Ghosi akuti: Chighune kukaya akakulu nkani kako kakukupula ibanda pakasi papache nukwinyazya kene pakwipangila ivifwani.

⁴ Awe we kaya akakulu nkani wananga nkani pachifukwa icha kukupula ibanda sona winyazya pachifukwa icha vifwani vivyo wapanga. Wefyako amasiku ghako, sona amaka agha bumi bwako ghamala. Polelo nkwiza pakukupela pakuba chamusamu pakasi pa inko sona nichakusekiwa ku vyisu vyosi.

⁵ Abantu babo bali papipi na bantu babo bali kubutali bakwiza pakukobezya, awe we wankalo imbibi nuwalombwa.

⁶ “ ‘Ennya abamwene aba ba Izilayeli bali pakasi papinyu bakukupula ibanda pakubombezya ubulaghili bwabo.

⁷ Pakasi papako abantu babasamula abapapi babo nukubayivya abayeni na balanda sona na bafwilwe.

⁸ Mwavisamula ivintu vyane ivizelu nukughanyazya Amasiku ghane Aghakutuzya.

⁹ Pali abantu abinji pakasi papinyu babo bakunena ububibi abamwabo ukuti bakupule ibanda sona babo bakubika ivyakwiyipa pabuzilo ubwapamwanya nukubomba ivyamwiko na bakolo.

¹⁰ Pakasi papinyu balipo abantu bamo babo bakughona na bachi aba ba wise, sona nukwinyazya na bakolo babo bali ni chakumwezi.

¹¹ Bamo bakubomba ivyamwiko na bachi aba bapalamani babo, balipo sona abamwabo babo bakubomba ivyankozyasoni na balasagha babo, abanji sona na bayemba babo, umwana umulindu uwa wise.

¹² Pakasi papinyu abantu bakupokela amabeko ukuti bakupule ibanda, bakupokela ichuma ichakonjelezya pamwanya kubapalamani binyu, loli mwanduvya ane. U Mwene Uwamaka Ghosi anena.

¹³ “ ‘Naloli mukukalala kwane nkwiza pakukoma inkufi zyane, pachifukwa ichakukabilapo izya pamwanya umwakusita ukusubiliwa kwako sona na pachifukwa icha kukupula ibanda pakasi papinyu.

¹⁴ Nkimba mukwiza pakuba mwe bajivu pamo bamaka bo nabafunda? Ane ne Mwene nanena, sona nkwiza pakuzibomba.

¹⁵ Nkwiza pakubachimbizya pakasi pa inko nukubanyampanizizya muvyisu iviyeni, po nkwiza pakubumalizya ububibi bubo buli mumwinyu.

¹⁶ Nanti mwinyazya pantazi pa inko zyosi, po mukwiza pakuzimanya ukuti ane ne Mwene.’ ”

Umuvuno uwa Chala uwakuswefekezya

¹⁷ U Mwene akambuzya akati,

¹⁸ “Wee mwana uwa muntu, aba Izilayeli bate ni mbombo nayimoyimo kukwane, baba ngati mukuba nu mutovu, ni chela nu waya vivyo vyasyala mu muvuno. Vinivi vyaba bulo vinyazu ivya siliva.

¹⁹ Polelo u Mwene Uwamaka Ghosi akuti, ‘Pachifukwa ichakuti mwebosi mute ni mbombo nayimoyimo nkwiza pakubabungannya mu Yelusalemu.

²⁰ Ngati mumo abantu bakubunganizizya u siliva nu mukuba, ni chela nu mutovu sona nu waya pakuvyocha mu muvuno ukuti visunguluke momumo nkwiza pakubombela namwe mubukalale bwane na mubukali bwane mukaya akakulu nkani nukubasunguluzya.

²¹ Nkwiza pakubabungannya nukubaputila ubukali bwane ubwakoghofya sona mukwiza pakusungunukila mulamula.

²² Ngati mumo u siliva akusungunukila mu muvuno, po namwe bulo mukwiza pakusungunukila mulamula, sona mukwiza pakumanya ukuti ane ne Mwene napungulila ubukali bwane papinyu.’ ”

Imbibi izya balongozi aba Izilayeli

²³ U Mwene akambuzya akati,

²⁴ “Wee mwana uwa muntu, uchibuzye ichisu ukuti, ‘We chisu chicho chitaswefiwe ivula yitatimiyepo pamo ukusalasatilapo mwisiku ilya bukali bwane.’

²⁵ Abamwene babo bali ngati nkalamu zizyo zikubuluma zikukavulannya ichinyamana. Bakubaghogha abantu, bakusenda ivyuma vyabo ni vintu vyabo ivya mutengo, nukubapela abafwilwe pakuba binji mukaya kache.

²⁶ A baputi bache bakuzinangannya indaghilo nukuvinyazya ivintu vyane ivizelu. Batakulesannya ivintu ivizelu nivintu bulo, bakubamanyisya abantu ukuti patalipo ukulekana nakumo pakasi pa chicho chinyazu na chicho chiswefiwe, po batakughachindika Amasiku ghane Aghakutuzya, umwakuti nane bulo ntakuchindikiwa pakasi papabo.

²⁷ Amakambala ghache ghali ngati bo bakambwe babo bali pakukavula inyama, bakukupula ibanda nukughogha abantu ukuti bakabilemo vimo umwabuzimbuli.

²⁸ Abalaghuzi bache bakufisa ububibi bwabo ngati bantu babo bakuyisingula inyumba nibanya, muvisetuka vyabo bakunena ubumyasi bakuti, u Mwene Uwamaka Ghosi anena, napapo atanenitepo.

²⁹ Abantu aba muchisu bakubayivya abantu abapina, bakubafyula abapotwe nukubayivya abayeni sona batakubabombela mubwanaloli.

³⁰ “Po nkamulonda umuntu pakasi papabo yuyo angazenga sona ulubumba nukwimilila pamaso papane papo pakamongoka, umwakuti ngali intakachinangannya ichisu, loli intakamwaghapo nayumoyumo.

³¹ Po nkwiza pakupungulila ubukali bwane papabo nukubanangannya nubukali bwane ubwakoghofya, nkwiza pakubatanizya pachifukwa icha zizyo babomba.” U Mwene Uwamaka Ghosi anena.