Ezekiyeli 21 - IBAYIBOLO 2024

Upanga uwa Mwene

¹ U Mwene akambuzya akati,

² “Wee mwana uwa muntu, ennya icheni chako ku Yelusalemu nukulumbilila umwakususannya nu buzilo ubwakulekalekana ubwakwiputilapo. Laghula umwakususannya ni chisu icha Izilayeli,

³ sona uchibuzye ukuti, ‘U Mwene akuti: Ane nkulwana namwe. Nkwiza pakuwesa upanga munyambi yache nukubaghogha mwebosi abagholosu na babibi.

⁴ Pachifukwa ichakuti nkwiza pakubaghogha mwebosi abagholosu na babibi, sona nkwiza pakuwesa upanga munyambi yache nukubaghogha abantu bosi aba kuntende naba kumitu.

⁵ Po abantu bosi bakwiza pakumanya ukuti ane ne Mwene nawesa upanga munyambi yache, atakwiza pakunyokelamo sona.’

⁶ “Polelo wee mwana uwa muntu, koloma! Koloma nkani ni chitima sona nu moyo uwa bubavu pamaso papabo.

⁷ Nanti bakukulalusya ukuti, ‘Nkimba choni chicho ukukoloma?’ ukwiza pakwamula ukuti, ‘Pachifukwa icha lipangwi lilyo likwiza. Umoyo uwa muntu wesi ghukwiza pakusunguluka sona inyobe yikwiza pakumala amaka, umuzimu wesi akwiza pakuzilika sona ichimpevu chosi chikwiza pakudedebala amaka ghakwiza pakumala.’ Chikwiza! Naloli chikwiza pakubombiwa.” U Mwene Uwamaka Ghosi anena.

⁸ U Mwene akambuzya akati,

⁹ “Wee mwana uwa muntu, laghula ukuti, ‘U Mwene akuti: U panga, u panga apyasiwe sona akunyezimila,

¹⁰ apyasiwe pakughoghela abantu, akunyezimila ngati kamesya! “ ‘Nkimba tungahoboka ni ndisa iya mwene iya mwana wane u Yuda? Pakuti abantu bane balisamula isoki lyane lyosi sona nulufundo.

¹¹ U panga apyasiwe ukuti akunyezimila, ukuti alemiwanje akiza ni nyobe, apyasiwe sona akunyezimila, ukuti bamubike munyobe izya mughoghi.

¹² Wee mwana uwa muntu, lilagha nukukolomoka, upanga akulwana na bantu bane, sona na bamwene aba mu Izilayeli. Bakwiza pakughoghiwa bosi, poka na bantu bane. Polelo wikome pachifuba, pachifukwa icha chitima.

¹³ “ ‘Nkubayela abantu bane, nanti bakana pakupinduka, vyosi vinivi vikwiza pakubawila.’ U Mwene Uwamaka Ghosi anena.

¹⁴ Polelo, wee mwana uwa muntu, laghula nukukoma inkufi. Leka upanga wako akome kabili, pamo katatu. Wepanga uwakughoghela abantu, naloli wepanga uwakunangannya, yuyo abazyunguliye imbazu zyosi.

¹⁵ Umwakuti amoyo ghasunguluke, sona abinji bakwiza pakufwila palapala. Nabika upanga uwakughoghela, pamilyango yabo yosi. Mwee! Apangiwe ukuti anyezimilaye ngati kamesya, sona apyasiwe ukuti abanje wakughoghela abantu.

¹⁶ Wee panga, ghogha kundilo na kumongo, kosi kuko isonga yako yaghalabukila.

¹⁷ Nane bulo nkwiza pakukoma inkufi, sona ubukali bwane bukwiza pakutozoka, ane ne Mwene nanena.”

U panga uwa mwene uwamu Babiloni

¹⁸ U Mwene akambuzya akati,

¹⁹ “Wee mwana uwa muntu, lanjizya imisebo mibili yiyo u mwene uwamu Babiloni angendamo nupanga wache, yosi mibili yibaghiye pakwanda muchisu choka. Bika ichimanyilo papo imisebo mibili yilekanite iyakubukila mukaya akakulu nkani.

²⁰ Lanjizya mumo upanga akwiza pakwenda ukubuka ku Laba uwa ba Amoni sona uyunji mukaya akakulu nkani aka Yelusalemu kako kazyunguliliwe na malinga muchisu icha Yuda.

²¹ Pakuti u mwene uwamu Babiloni akwiza pakwimilila pamisebo mibili yiyo yilekanite, ukuti alabe amahala ku bachala abanji. Akwiza pakubomba amayele numusinda, nukubuzikizya kuvifwani vyache, sona akwiza pakwennya amatima agha vinyamana agha vyakwiyipa.

²² Munyobe yache indilo muli ichimanyilo chicho chisimbiwe ukuti, ‘Yelusalemu,’ kuko u mwene akwiza pakulamula nizya kughogha abantu nukulizya ipati ilya bwite, bo ali pakuyannya ivya kupankulila imilyango, sona bo akuyannya amasabi amakulu nukuzenga amalinga.

²³ Loli ku bantu aba mu Yelusalemu zikwiza pakuboneka ngati bulaghuzi bwabumyasi, pachifukwa icha chilapo chicho bakalapa nu mwene yula, loli akwiza pakubakumbusya ukunanga kwabo kosi ukuti babuke mubuzya.

²⁴ “Polelo u Mwene Uwamaka Ghosi akubabuzya abantu aba mu Yelusalemu akuti, ‘Pachifukwa ichakuti mwankumbusya ukunanga kwinyu, nukuvumbula ukusambuka kwinyu sona nukuvumbula imbibi zyinyu zyosi zyizyo mukubomba, pachifukwa ichakuti mwabomba zinizi, mukwiza pakusendiwa pakubuka mubuzya.

²⁵ “ ‘Nawe bulo we mwene uwa Izilayeli, we mubibi sona we munyazu isiku lyakukwanila, kope akabalilo aka lufundo kakufikila.

²⁶ Po u Mwene Uwamaka Ghosi akuti: Vula ichisote kumutu wako sona efya impumpu yako. Zitakwiza pakuba ngati mumo zikabela pakwanda. Abakwisiwa bakwiza pakukweziwa sona abakukweziwa bakwiza pakwisiwa.

²⁷ Chisami! Chisami! Nkwiza pakukapela akaya akakulu nkani pakuba chisami. Loli chitakwiza pakunyokelamo sona mupaka umwenecho ize, umwene weyuyo nkwiza pakumupa ichisu chinichi.’

Upanga naba Amoni

²⁸ “Wee mwana uwa muntu, laghula nukunena ukuti, ‘Izi zyo zizyo u Mwene Uwamaka Ghosi akunena ukuyana nizya ba Amoni sona nintuko zyabo ubabuzye amazyu aghakuti: Upanga, upanga, awesiwa ukuti aghoghe abantu, akumesya ukuti anangannye sona akunyezimila ngati kamesya!

²⁹ Ivisetuka vyinyu vyabumyasi, ukulaghula kwinyu kwabumyasi. Isingo zinyu zikwiza pakudumuliwa, sona mukwiza pakughoghiwa nupanga, pachifukwa chakuti mwe babibi. Isiku lyinyu lyabafikila, akabalilo aka kufundiwa kwinyu, kafika pabwenecho.

³⁰ “ ‘Unyosezye u panga munyambi yache. Mubuzilo bubo ukapeliwamo, muchisu chicho ukapapiliwamo, momumo nkwiza pakubalongelamo.

³¹ Nkwiza pakupungulila ubukali bwane papako, nukufutila ukukalala kwane papako, nkwiza pakukubika munyobe izya bantu abakali, babo bamenye pakunangannya.

³² Ukwiza pakuba nkwi izya moto, ibanda lyako likwiza pakukupukila muchisu chako, atalipo nayumo yuyo akwiza pakukumbukapo sona, pakuti ane ne Mwene nanena.’ ”