Ezekiyeli 20 - IBAYIBOLO 2024

Ukusambuka ukwa ba Izilayeli

¹ Mumwaka uwaseveni, mumwezi uwafayivi pisiku ilya 10, abasongo bamo aba mu Izilayeli bakiza pakubuzikizya kukwane ukuyana nizya Mwene, sona bakikala pamaso papane.

² Po u Mwene akambuzya akati,

³ “Wee mwana uwa muntu, babuzye abasongo aba ba Izilayeli ukuti, ‘U Mwene Uwamaka Ghosi akuti: Nkimba mwiza pakumbuzikizya? Naloli nkulapa ukuti: Ntakwiza pakubitikizya ukuti mumbuzikizyanje, u Mwene Uwamaka Ghosi anena.’

⁴ “Wee mwana uwa muntu, nkimba ukwiza pakubalonga? Po ubabuzye abasongo nivya mwiko vivyo abanyenya babo bakabomba,

⁵ ubabuzye abasongo ukuti, ‘U Mwene Uwamaka Ghosi akuti: Nkamusala u Izilayeli nukumulayizya u Yakobo ilayizyo, nkilanjizya kukwabo muchisu icha Ijiputi nkati, “Ane ne Mwene Uwamaka Ghosi u Chala winyu.”

⁶ Pisiku lilalila nkalapa kukwabo ukuti nkwiza pakubefyamo muchisu icha Ijiputi nukubabika muchisu chicho nabalondela, ichisu ichamboto, ichisu ichiza nkani pavyisu vyosi.

⁷ Po nkababuzya ukuti, “Umuntu wesi efyemo ivifwani vivyo akuvyiputa, sona mutakinyazyanje ni vifwani ivya muchisu icha Ijiputi. Ane ne Mwene u Chala winyu.”

⁸ “ ‘Loli bakansambukila ane sona batakanteghelezya, batakavyefyamo ivifwani vivyo bakuvyiputa, pamo pakuvileka ivifwani ivya mu Ijiputi po nkati: Nkwiza pakubapungulila ubukali bwane nukukalala kwane bo bali muchisu icha Ijiputi.

⁹ Nkabomba bunubu pachifukwa ichakulivighilila itabwa lyane ukuti litakanyaziwanje pamaso pa inko zizyo aba Izilayeli bakikalagha pakasi papabo, zizyo zikanyennya bo nkubefya aba Izilayeli muchisu icha Ijiputi.

¹⁰ Polelo nkabefyamo muchisu icha Ijiputi nukubalongozezya munkolongo.

¹¹ Nkabapa indaghilo zyane nukubalanjizya amalamulo ghane, ghagho umuntu nanti aghivwila akubanga nubumi.

¹² Nkabapa sona Isiku Ilyakutuzya pakuba chimanyilo pakasi papitu, ukuti bamanye ukuti ane ne Mwene nkabapela pakuba bazelu.

¹³ “ ‘Loli pope bulo abantu aba mu Izilayeli bakansambukila munkolongo. Batakazikonka indaghilo zyane loli bakaghakana amalamulo ghane napapo umuntu yuyo akughivwila akubanga nubumi. Bakaghanyazya Amasiku ghane Aghakutuzya. Po nkinong'onagha pakubapungulila ubukali bwane nukubanangannya munkolongo.

¹⁴ Loli intakabomba ichi pachifukwa ichakubuvighilila ubuchindamu ubwa itabwa lyane ukuti litakanyaziwanje pamaso pa inko bo nkuzyefyamo mu Ijiputi.

¹⁵ Po nkalapa ichilapo munkolongo ukuti ntakwiza pakubinjizya muchisu chicho nkabapa, ichisu icha mboto, ichisu ichiza pavyisu vyosi,

¹⁶ pachifukwa ichakuti baghakana amalamulo ghane sona batazikonka indaghilo zyane nukughanyazya Amasiku ghane Aghakutuzya. Pakuti bakuvyiputa ivifwani vyabo.

¹⁷ Loli nkabapelela ichisa sona intakabanangannya pamo pakubamala munkolongo mula.

¹⁸ Nkababuzya abana babo munkolongo ukuti, “Mutakazikonkaye indaghilo izya banyenya binyu pamo ukusunga amalamulo ghabo pamo pakwinyazya mwebene ni vifwani vyabo.

¹⁹ Ane ne Mwene u Chala winyu, muzikonkaye indaghilo zyane sona mubikayepo umoyo pakughasungilila amalamulo ghane.

²⁰ Mughachindikaye Amasiku aghane Aghakutuzya pakuba mazelu, ukuti ghabe chimanyilo pakasi papitu. Po mukwiza pakumanya ukuti ane ne Mwene u Chala winyu.”

²¹ “ ‘Loli abana babo bakansambukila, batakazikonka indaghilo zyane, sona batakabikilako umoyo pakukonka amalamulo ghane, ghagho nanti umuntu akughakonka akuba nubumi. Bakaghanyazya Amasiku ghane Aghakutuzya. Po nkwiza pakupungulila ubukali bwane papabo nukubakalalila munkolongo.

²² Loli nkilema, pachifukwa ichakubuvighilila ubuchindamu ubwa itabwa lyane ukuti litakanyaziwanje pamaso pa inko zizyo zikennya, bo nkubefyamo aba Izilayeli mu Ijiputi.

²³ Po nkalapa sona ichilapo munkolongo ukuti nkwiza pakubachimbizizya pakasi pa inko nukubanyampanikizya ku vyisu ivya kubutali,

²⁴ pachifukwa ichakuti batakaghakonka amalamulo ghane loli bakazikana indaghilo zyane nukughanyazya Amasiku ghane Aghakutuzya, po bakavyiputagha ivifwani ivya banyenya babo.

²⁵ Ukonjelezyapo nkabapa indaghilo zizyo zitakaba nyiza na malamulo ghagho ghatangabapa ubumi.

²⁶ Nkabaleka ukuti babe banyazu ni vyabupi vyabo pakubika abana babo abakatote pakuba chakwiyipa ichakocha ukuti babe chintu ichakoghofya sona bamanye ukuti ane ne Mwene.’

²⁷ “Polelo, wee mwana uwa muntu, babuzye abantu aba mu Izilayeli ukuti, ‘U Mwene Uwamaka Ghosi akuti: Abanyenya binyu bakansamula pakuleka pakuba basubiliwa.

²⁸ Bo nabinjizya muchisu chicho nkafingana nabo pakubapa sona bo bennya akaghamba pamo ikwi ilyakulemba amani, palapala bakabika ivyakwiyipa vyabo sona ni vyabupi vivyo vikankalalizya, nukubika ichakwiyipa icha utwakununkila poka ni chakwiyipa icha vinyo.

²⁹ Po nkabalalusya nkati: Nkimba ubuzilo ubwapamwanya ubu, bubo mukubukapo itabwa lyache lyolyoni?’ Cho chifukwa bukwitiziwa Bama mupaka nilelo bulo.

³⁰ “Polelo, ubabuzye aba Izilayeli ukuti, ‘U Mwene Uwamaka Ghosi akuti: Nkimba muchili mukwendelela pakubomba vivyo abanyenya binyu bakabomba pakwinyazya ni vifwani?

³¹ Nanti mukubika ivyabupi vyinyu, sona mukubika abana binyu pakuba vyakwiyipa ivya kocha mukwinyazya mwebene ni vifwani vyinyu mupaka nilelo bulo. Mwee ba Izilayeli, nkimba ningabitikizya bulibuli pakumbuzikizya? Naloli nkulapa ukuti mutakwiza pakundalusya ane, u Mwene Uwamaka Ghosi anena, ntakwiza pakubitikizya pakumbuzikizya.

³² Mukuti, “Tukulonda pakuba ngati inko, ngati bantu aba muchisu chosi, babo bakwiputa amakwi na mabwe.” Loli zinizi zitakwiza pakubombiwa.

U Chala akufunda sona akuhobokela

³³ “ ‘U Mwene Uwamaka Ghosi akuti: Naloli nkulapa nkuti nkwiza pakubalaghila ninyobe iyamaka nukuyigholosya inyobe yane bo nkalaye.

³⁴ Nkwiza pakubefyamo mu inko nukubabungannya ukufuma muvyisu vivyo mukanyampanilako pakulanjizya amaka ghane nubukali bwane.

³⁵ Nkwiza pakubinjizya munkolongo izya inko, mulamula nkwiza pakubalonga pamaso na pamaso.

³⁶ Ngati mumo nkabalongela abanyenya binyu munkolongo muchisu icha Ijiputi, momumo nkwiza pakubalongela namwe bulo,’ u Mwene Uwamaka Ghosi anena.

³⁷ “Nkwiza pakubabelenga amwe bo mukudumusannya pantazi papane wekaweka nukubinjizya mulufingo.

³⁸ Nkwiza pakubefyapo pakasi papinyu abantu babo bakansambukila nukunangila. Napapo nkwiza pakubefyamo muchisu chicho bakikalaghamo, loli pope bulo batakwiza pakwinjilamo muchisu icha Izilayeli. Po mukwiza pakumanya ukuti ane ne Mwene.

³⁹ “Loli amwe mwe ba Izilayeli, u Mwene Uwamaka Ghosi akuti, ‘Buka pakwiputa ivifwani vyinyu, loli pisinda pache mukwiza pakunteghelezya mutakwiza pakulinyazya itabwa lyane izelu ni vyabupi vyinyu ni vifwani vyinyu.’

⁴⁰ U Mwene Uwamaka Ghosi akuti, ‘Pakuti pighamba lyane izelu, ighamba itali ilya muchisu icha Izilayeli, popapo aba Izilayeli bosi bakunyiputila ane muchisu chila, palapala nkwiza pakupokela ivyakwiyipa vyinyu sona ni vyabupi vyinyu ivyiza poka ni vyakwiyipa vyosi ivizelu.

⁴¹ Nkwiza pakubapokela amwe ngati vyakwiyipa ivyakununkila, bo nkubefyamo mu inko nukubabungannya ukufuma kuvyisu ivya kubutali kuko mukanyampanilako, po nkwiza pakubulanjizya ubuzelu bwane pakasi papinyu pamaso pa inko.

⁴² Po mukwiza pakumanya ukuti ane ne Mwene, bo nkubinjizya muchisu icha Izilayeli, ichisu chicho nkalapa pakubapa abanyenya binyu.

⁴³ Po mulamula mukwiza pakukumbuka inkalo yinyu ni mbombo zyinyu zyosi zizyo mwinyazya nazyo sona mukwiza pakwibenga mwebene pavintu ivibibi vyosi vivyo mwabomba.

⁴⁴ Mukwiza pakumanya ukuti ane ne Mwene, nanti nababombela ichi pakulichindika itabwa lyane, ntakwiza pakubabombela ukuyana ni zila zyinyu imbibi sona ni.’ ” U Mwene Uwamaka Ghosi anena.

Umoto pavyisu ivya kuntende

⁴⁵ U Mwene akambuzya akati,

⁴⁶ “Wee mwana uwa muntu, ennya kuntende lumbilila umwakuchisusya ichisu ichakuntende nukulaghula ukuyana nu musitu uwa kuntende.

⁴⁷ Ghubuzye umusitu uwa kuntende ukuti, ‘Ivwa amazyu agha Mwene. U Mwene Uwamaka Ghosi akuti: Indi papipi pakukocha numoto, sona ghukwiza pakughalungulizya amakwi ghosi amabisi na mumizu. Indimi izya moto ghula zitakwiza pakuzimiwa, umuntu wesi ukwanda kumitu mupaka kuntende akwiza pakubabuka.

⁴⁸ Umuntu wesi akwiza pakwennya ukuti ane ne Mwene napemba umoto sona ghutakwiza pakuzimiwapo.’ ”

⁴⁹ Po nkati, “Wee Mwene Uwamaka Ghosi! Bakunena nizya ane bakuti, ‘Nkimba umuntu yunuyu atakunena ivyili?’ ”