Ezekiyeli 2 - IBAYIBOLO 2024

¹ “Wee mwana uwa muntu, imilila inene nawe.”

² Bo ali pakunena, Umuzimu akinjila mumwane nukunyamusya, sona nkamwivwa akunena nane.

³ Akati, “Wee Mwana uwa muntu, nkukutuma kuba Izilayeli, uluko ulwakusambuka lulo lunsambukiye. Abene poka nabanyenya babo bansambukiye mupaka nilelo bulo.

⁴ Abantu babo nkukutumako bamadinko sona ba moyo amakafu. Ubabuzye uti, ‘Izi zyo zyizyo u Mwene Uwamaka Ghosi anena.’

⁵ Lumo bangivwa pamo batangivwa, pachifukwa ichakuti basambuke, bakwiza pakumanya ukuti umulaghuzi ame pakasi papabo.

⁶ Sona nawe we mwana uwa muntu utakabanyilaye, utakanyilaye, napapo abantolovu namivwa vikuzyunguliye sona ukwikala pakasi pabankonya. Utakanyilaye zizyo bakunena pamo bakukoghofya, napapo abamunyumba iyakusambuka.

⁷ Ubabuzye amazyu ghane, manyi bakwivwa pamo batakwivwa, pakuti basambuke.

⁸ Loli we mwana uwa muntu, teghelezya zizyo nkukubuzya. Utakasambukaye ngati nyumba yila iyakusambuka. Ighula umulomo wako nukulya vivyo nkukupa.”

⁹ Po nkatalankannya nukwennya inyobe yigholoseziwe bulo kukwane, mumo mukaba ibuku,

¹⁰ lilyo akalizungulula pamaso papane. Imbazu zyosi zibili zikasimbiwa amazyu agha nkuto, nagha kufwifwitila sona nagha nguno.