Ezekiyeli 19 - IBAYIBOLO 2024

Ulwimbo ulwa chitima

¹ U Mwene akambuzya akati, “Imba ulwimbo ulwa pamfwa, ulwakubalilila abamwene aba mu Izilayeli

² nukuti, ‘Unyoko akaba nkalamu inkolo ijinvu, akalambalala pakasi papabo, nubakulela abana bache.

³ Akakuzya umwana weka pakasi pabana bosi, yuyo akaba wamaka nkani. Yikamanyila pakulema ichinyamana, nukulya abantu.

⁴ Inko zikivwa nizya nkalamu yila, po bakayitegha nukuwila muchiliba chabo. Bakayiwesa nidobani, pakubuka nayo kuchisu icha Ijiputi.

⁵ “ ‘Bo unyina ennya ukuti ichakubomba nachimo, ulusubilo lwache lukamala, yikamusenda umwana wache uyunji nukumupela pakuba nkalamu iyamaka.

⁶ Yikenda pakasi pa nkalamu izyamwabo, yikaba nkalamu iyamaka. Yikamanyila pakulema ichinyamana, nukulya abantu.

⁷ Yikamongolannya amalinga ghabo, nukutunangannya utwaya twabo utukulu. Ichisu na bosi babo bakaba mulamula, bakatetema pachifukwa ichakubuluma ukwa nkalamu.

⁸ Inko zikabatika pakuyighogha, abantu bakiza ukufuma kosi na kosi, nukuyitegha ni chilepa, po yikawila muchiliba chabo.

⁹ Bakayiwesa ni ndobani, nukuyisunga muchibagha, po bakabuka nayo kwa mwene uwa ku Babiloni. Bakayibika mujele, po ukubuluma kwache kutakwiza pakwivwika sona, pamaghamba agha Izilayeli.

¹⁰ “ ‘Unyoko akaba ngati mampesya, mumughunda wako uwa mampesya, ghagho ghakabyaliwa papipi na mizi. Ghakelagha ivikomwa sona ghakaba nisamba inyinji, pachifukwa icha bwinji ubwa mizi.

¹¹ Isamba zyache zikaba zyamaka, pakuba ndisa iya mwene. Zikaba pamwanya nkani pasamba zyosi, zizyo zikannyembetelelana. Zikabonekela pamwanya nkani poka, nutusamba twache utwinji.

¹² Loli ghakanyunkuliwa umwakukalala, nukusumbiwa pasi. Impepo iyakubufumilo bwizuba yikaghapela ukuti ghume. Ivikomwa vyache vikabulutuliwa, isamba zyache izyamaka zikafoka, sona umoto ghukocha zyosi.

¹³ Po ilelo libyaliwe munkolongo, muchisu ichumizu chicho chili ninyota

¹⁴ Umoto ghukaka musamba zyache inkulu, ghukocha isamba zyache ni vikomwa. Katasyete akasamba nakamokamo akamaka, pakuba ndisa iya mwene.’ Iyi yo nkuta, sona yibombeziwanje pakuba nkuta.”