Ezekiyeli 18 - IBAYIBOLO 2024

Umuntu yuyo akubomba imbibi akwiza pakufwa

¹ U Mwene akambuzya akati,

² “Nkimba mukung'anamula choni nanti mukupyanizya ichili muchisu icha Izilayeli ukuti, ‘Abanyenya bakalyanga amampesya aghakubaba, sona amino aghabana ghakawa ubwazi’?

³ “Ane ne Mwene Uwamaka Ghosi naloli nkulapa nkuti, ‘Mutakandizyanje sona pakunenela ichili chinichi muchisu icha Izilayeli.

⁴ Naloli abantu bosi bane, uwise nu mwana bulo, bosi babili bane. Umuntu wesi yuyo akubomba imbibi akwiza pakufwa.

⁵ “ ‘Buli nanti pali umuntu umugholosu, yuyo akubomba ingolosu nu bwanaloli:

⁶ Atakubukapo pabuzilo ubwapamwanya pakulya ivyakulya, vivyo vyabikiwa kuvifwani, pamo pakwiputa ivifwani ivya muchisu icha Izilayeli. Atakumunyazya umuchi uwa mupalamani wache, pamo pakumumanya umukolo yuyo ali nichakumwezi.

⁷ Atakumuyivyapo nayumoyumo, loli akunyosya vivyo akasenda pankongole. Atakwiba loli akubapa ichakulya babo bali nizala, sona akubapa ivyakuvwala babo bali nkule.

⁸ Atakubakopezya abantu indalama ukuti akabilepo izyapamwanya, pamo ukuti ababikilayepo izinji. Umuntu uyu akukana pakubomba imbibi, yuyo akubalongannya abantu mubwanaloli.

⁹ Akuzikonka indaghilo zyane, nukusungilila akiza amalamulo ghane. Umuntu yunuyu mugholosu, sona akwiza pakuba nubumi, u Mwene Uwamaka Ghosi anena.

¹⁰ “ ‘Buli nanti umuntu yunuyu ali nu mwana ivyondongo, sona mughoghi pamo akubomba ivintu ivyinji ngati vinivi

¹¹ napapo umwene abombitepo vivyo u wise atabombitepo nalumolumo ivintu ivi: Akulya ivyakulya vivyo vibikiwe kuvifwani pamwanya pighamba. Akumunyazya umuchi uwa mupalamani wache.

¹² Akubayivya abapina na bapotwe. Akwiba sona atakunyosya vivyo akakopa. Akwiputa ivifwani. Akubomba ivintu ivyamwiko.

¹³ Akukopezya abantu indalama ukuti akabilepo izyapamwanya inyinji nkani. Nkimba umuntu yunuyu akwiza pakuba nubumi? Awe! Pachifukwa ichakuti abomba ivintu ivyamwiko, naloli akwiza pakufwa, lo lufundo lulo lumubaghiye.

¹⁴ “ ‘Buli nanti umuntu uyu ali nu mwana yuyo akwennya imbibi zyosi zizyo uwise akuzibomba, loli u mwana atakuvibomba ivintu vinivi:

¹⁵ Atakulya ivyakulya vivyo vibikiwe ku vifwani pamwanya pighamba, pamo pakuvyiputa ivifwani ivya ba Izilayeli. Atakumunyazya umuchi uwa mupalamani wache.

¹⁶ Atakumuyivyapo nayumoyumo: Pamo akulonda ichikole ukuti akope inkongole. Atakwiba loli akubapa ichakulya chache babo bali nizala, nukubapa amenda babo bali nkule.

¹⁷ Akwilema pakubomba imbibi, sona atakukopezya abantu indalama ukuti akabilepo izyapamwanya. Akughasunga amalamulo ghane ni ndaghilo zyane. Atakwiza pakufwa pachifukwa icha mbibi iya wise, loli akwiza pakuba mumi.

¹⁸ Loli u wise akwiza pakufwa pachifukwa ichakuti akasendelapo ulusako pabantu abanji, ngati pakubayivya abakamu bache nukubibila abawamwabo sona nukubomba chicho chikaba chibibi pakasi pabantu bache.

¹⁹ “ ‘Pope bulo mukulalusya mukuti, “Nkimba choni chicho u mwana atangafundiwa pachifukwa icha mbibi iya wise?” Pakuti u mwana abomba chicho chigholosu sona chanaloli, akazikonka akiza nkani indaghilo, naloli akwiza pakuba mumi.

²⁰ Umuntu yuyo akubomba imbibi akwiza pakufwa. U mwana atakwiza pakufundiwa pachifukwa icha mbibi izya wise, pamo u wise atakwiza pakufundiwa pachifukwa icha mbibi izya mwana. Umuntu umugholosu akwiza pakupokela ichabupi umwakuyana nu bugholosu bwache, wepe umuntu umubibi akwiza pakupokela ichabupi umwakuyana nu bubibi bwache.

²¹ “ ‘Loli nanti umuntu umubibi akuleka pakubomba imbibi zyache zyosi nukusungilila indaghilo zyane nukubomba ubwanaloli nu bugholosu, naloliloli akwiza pakuba nubumi, atakwiza pakufwa.

²² Ntakwiza pakukumbukapo ukunanga kwache kuko akabomba. Pachifukwa icha vintu ivigholosu vivyo akabomba, akwiza pakuba nubumi.

²³ U Mwene Uwamaka Ghosi akuti: Nkimba nkuhoboka nimfwa iya muntu umubibi? Nkimba intangahoboka nanti azileka imbombo zyache imbibi nukuba mumi?

²⁴ “ ‘Loli nanti umuntu umugholosu akuleka pakubomba ubugholosu nukubomba imbibi sona akubomba ivintu ivyamwiko vilavila vivyo umuntu umubibi akubomba, nkimba akwiza pakuba nubumi? Butalipo ubugholosu nabumobumo bubo akabomba bukwiza pakukumbukiliwapo. Pachifukwa icha kusita kusubiliwa sona na pachifukwa icha mbibi zizyo abomba akwiza pakufwa.

²⁵ “ ‘Loli amwe mukuti, “Izila iya Mwene te yabwanaloli.” Mwee ba Izilayeli ivwa kuno: Nkimba izila yane yite yabwanaloli? Nkimba zite zila zyinyu zizyo zite zya bwanaloli?

²⁶ Nanti umuntu umugholosu akubuleka ubugholosu bwache nukubomba imbibi, akwiza pakufwila mu mbibi, pachifukwa icha mbibi zizyo abomba.

²⁷ Loli nanti umuntu umubibi yula akubuleka ububibi bwache bubo abomba nukubomba ubwanaloli nu bugholosu, akwiza pakubupoka ubumi bwache.

²⁸ Pachifukwa ichakuti akwinong'onela ukunanga kosi kuko abomba nukukuleka, naloli akwiza pakuba mumi, atakwiza pakufwa.

²⁹ Loli aba Izilayeli bakuti, “Izila iya Mwene yite yabwanaloli.” Mwee ba Izilayeli, nkimba izila yane yite yabwanaloli? Nkimba zite zila zyinyu zizyo zite zya bwanaloli?

³⁰ “ ‘Polelo u Mwene Uwamaka Ghosi akuti: Nkwiza pakubalonga mwe ba Izilayeli, umuntu wesi ukuyana nimbombo zyache. Pinduka! Kuleke ukunanga kwinyu kosi, ukuti imbibi zyinyu zitakabamale.

³¹ Efyamo ukunanga kosi kuko mwabomba, nukusenda umoyo umupya nu muzimu umupya. Mwee ba Izilayeli, nkimba choni chicho mu kufwa?

³² Intakuhoboka nimfwa iya muntu yumo, polelo Pinduka ukuti mubanje bumi, u Mwene Uwamaka Ghosi anena.’ ”