Ezekiyeli 17 - IBAYIBOLO 2024

Ichili icha mazwanga nikwi ilya mampesya

¹ U Mwene akambuzya akati,

² “Wee mwana uwa muntu, babuzye ichili aba Izilayeli.

³ Ubabuzye ukuti, ‘U Mwene Uwamaka Ghosi akuti: Izwanga ikulu nkani lilyo lili ni vipapande ivya maka na meya amatali aghakuboneka akiza, likabuluka ukubuka kuchisu icha Lebanoni. Likanyamula akasamba aka likwi ilya mwale,

⁴ likasendapo akasamba akapamwanya nkani nukubuka nako mukaya akakulu nkani aka baghulizi, mumo likakabyala akasamba kala.

⁵ Likasenda imbeyu zimo izya muchisu chako nukuzibyala mwitope ilya muvundo mulubazu ulwa lusoko. Likabyala ngati likwi ilya mungwina papipi na mizi aminji.

⁶ Po kakamela nukwanduka pakuba likwi ilya mampesya, kakaba ni samba zizyo zikamela muntende umwakwennya kwi zwanga lila, amagululuzi ghache ghope ghakakula pasi. Po kakanduka pakuba likwi ilya mampesya lilyo likaba ni samba na mani aminji.

⁷ “ ‘Loli kukabako sona izwanga ilinji ikulu nkani likaba nivipapande ivikulu nameya aminji. Ikwi ilya mampesya lila amagululuzi ghache ghakakula mupaka kwi zwanga po likamela isamba zyache papo likabyaliwa nukutenga isamba zyache, ukuti izwanga likupulilayepo amizi.

⁸ Likabyaliwa mwitope ilyiza papipi na mizi aminji umwakuti lingaba nisamba nukwela ivikomwa sona nukuba likwi ilya mampesya ilya kuchindikiwa.’

⁹ “Ubabuzye ukuti, ‘U Mwene Uwamaka Ghosi akuti: Nkimba ikwi ili likwiza pakukula akiza? Nkimba ikwi litakwiza pakunyunkuliwa nukubulutuliwa ivikomwa vyache? Umwakuti amani ghache ghumile, ghakwiza pakumila. Ichakumela chosi ichipya chikwiza pakufoka. Chitakulonda amaka aminji pamo pakunyunkuliwa ninko inyinji.

¹⁰ Napapo linganyunkuliwa nukubyaliwa pabunji, nkimba likwiza pakukula akiza? Nkimba litakwiza pakumila zila, bo impepo iyakubufumilo bwizuba yaputilapo pabuzilo bubo likakulilapo?’ ”

Ukulingannya ukwa chili

¹¹ Po u Mwene akambuzya akati,

¹² “Balalusye abantu aba kusambuka ukuti, ‘Nkimba mutachimenye iching'anamulo icha vintu ivi?’ Ubabuzye ukuti, ‘U mwene uwa chisu icha Babiloni akabuka ku Yelusalemu, nukumusenda u mwene wache poka na makambala ghache nukubuka nabo kuchisu icha Babiloni.

¹³ Po akasendapo weka uwa munyumba iya bumwene nukufingana nawe, nukumulapizya ichilapo. Akabafumyamo abalongozi aba muchisu icha Yuda,

¹⁴ umwakuti ubumwene bula bubanje bwakwisiwa, ubusita kukweziwa sona, nanti bukusunga ulufingo lwache bungapona.

¹⁵ Loli u mwene uwa chisu icha Yuda akamusambukila nukutuma intumi kuchisu icha Ijiputi pakusenda ifalasi ni chilundilo icha babwite. Nkimba vingamwendela akiza? Nkimba abaghiye pakupona umuntu yuyo akubomba zinizi? Nkimba anganangannya ulufingo nukupona?

¹⁶ “ ‘Ane ne Mwene Uwamaka Ghosi nkulapa naloli nkuti u mwene uwamu Yuda, akwiza pakufwila muchisu icha Babiloni, muchisu icha mwene yuyo akamubika pachitengo icha bumwene, yuyo akakana ichilapo chache nukulunangannya ulufingo.

¹⁷ U Falabo poka ni viludilo vyache ivya babwite vitakwiza pakumwavwa u mwene uwamu Yuda pabwite, bo u mwene uwamu Babiloni akazyunguliye akaya aka Yelusalemu, umwakuti abaghoghe abantu abinji nkani.

¹⁸ U mwene uwa Yuda akakana ichilapo nukulunangannya ulufingo, lulo akafinga. Pachifukwa ichakuti apotwa pakukwanilisya zizyo akafinga, pope bulo abomba vyosi vinivi, atakwiza pakupona.

¹⁹ “ ‘Polelo u Mwene Uwamaka Ghosi akuti, Nkulapa naloli nkuti: Pachifukwa icha chilapo chicho achikana nukulunangannya ulufingo lwane, nkwiza pakumufunda.

²⁰ Nkwiza pakukuzula ichilepa chane, sona akwiza pakulemiwa muchipingo chane. Nkwiza pakwiza nawe ku Babiloni nukumufunda kulakula pachifukwa ichakuti atakaba musubiliwa kukwane.

²¹ Ivilundilo vyache vyosi ivya bwite vikwiza pakufwila kubwite, babo bapona bakwiza pakunyampanikila kuvyisu vyosi. Po mukwiza pakumanya ukuti ane ne Mwene nanena.

Ilayizyo ilya Chala ilyalusubilo

²² “ ‘U Mwene Uwamaka Ghosi akuti: Nane bulo nkwiza pakusendapo akasamba pamwanya nkani pikwi ilya mwale nukukabyala. Nkwiza pakukapyola akasamba akabisi ukufuma pamwanya nkani, nukukabyala nemwenecho pighamba itali nkani.

²³ Nkwiza pakukabyala pighamba pamwanya muchisu icha Izilayeli, umwakuti kabe nisamba nukwela ivikomwa, nukuba likwi ilya mwale ichindikiwa. Muntende mwache mukwiza pakwikala iviyuni ivya luko nuluko, vikwiza pakuzengamo ivivumbo musamba zyache.

²⁴ Amakwi ghosi agha mumughunda ghakwiza pakumanya ukuti ane ne Mwene. Nkwisya ikwi itali, nukulipela ikwi ipimpa pakumela. Nkumizya ikwi ibisi nukulipela ikwi ilyumizu pakuba libisi. Ane ne Mwene nanena sona nkwiza pakuzibomba.’ ”