Ezekiyeli 16 - IBAYIBOLO 2024

Abantu aba mu Yelusalemu bate basubiliwa

¹ U Mwene akambuzya akati,

² “Wee mwana uwa muntu, umulanjizye u Yelusalemu inkalo yache iya mwiko,

³ ‘Umubuzye u Yelusalemu ukuti u Mwene Uwamaka Ghosi ati: Abanyenya bako bakafuma muchisu icha ba Kenani kuko ukapapiliwa. U ghuso akaba waluko ulwa Amoli sona u nyoko akaba waluko ulwa Hiti.

⁴ Pisiku lilyo ukapapiliwa inkuvu yako yitakadumuliwa, pamo ukoziwa na mizi ukuti uboneke akiza, pamo ukupakiwa ni mbeya pamo ukunnyembeteliwa mumwenda.

⁵ Atakabapo nayumo yuyo akakwennya ni chisa pamo pakuba nichililizi nawe umwakuti akubombele zinizi. Loli bakakutaghila mumughunda, pakuti ukakaniwa pisiku lilyo ukapapiliwa.

⁶ “ ‘Po nkadumusannya papipi nawe nkakwennya bo uli pakughalaghata mwibanda lyako, bo ulambalaye mwibanda lyako nkakubuzya ukuti, “Ubanje mumi!”

⁷ Nkakupela awe pakukula ngati likwi ilya mughunda. Ukakula nukuba chintu ichakwibonesekezya akiza. Amabele ghakamela sona ivigaba vyako vimo ivya mubili wako vikamela ameya, loli pope bulo ukaba nkule.

⁸ “ ‘Pisinda pache nkadumusannya papipi sona bo natalankannya, nkakwennya ukuti naloli wafikapo pakabalilo akasendwa nkakukuzulila inkuto iya nkazo yane nukuvwinka inkule yako. Nkafingana nawe ulufingo ulwa sendwa, u Mwene Uwamaka Ghosi anena, sona ukwiza pakuba we wane.

⁹ “ ‘Nkakozya na mizi nukusuka ibanda sona nkakupakazya amafuta.

¹⁰ Nkakuvwika umwenda uwakulabiwa nukukuvwika inkwato iya ikwela itonte. Nkakuvwika umwenda ughutonte nukukuvwinka umwenda uwamutengo.

¹¹ Nkakuyannya nivyakwibonesekezya akiza nukukuvwika ivibangili munyobe zyako na mambo musingo yako,

¹² ni mpete pampuno yako, ni ndelebele mumakutu ghako ni mpumpu inyiza nkani kumutu wako.

¹³ Po ukayaniziwa nu golide nu siliva, amenda ghako ghakaba matonte sona aghakulabiwa aghamutengo uwapamwanya. Ichakulya chako chikaba cha busu ubutinye nu buchi na mafuta agha misyunguti. Ukaba we wakuboneka akiza nkani sona ukakweziwa pakuba we mwene umukolo.

¹⁴ Ubumanyikwe bwako bukafumuziwa pakasi pa inko pachifukwa icha bwiza bwako, pakuti ubuchindamu bubo nkakupa bwakupela pakuba we wakuboneka akiza nkani, u Mwene Uwamaka Ghosi anena.

¹⁵ “ ‘Loli ukasubila ukuboneka akiza kwako nukubombezya ubumanyikwe bwako pakuba we malaya. Ukiyipa pakuba we malaya na wesi yuyo akwenda papako sona ukuboneka akiza kwako kukaba kwa muntu wesi yuyo akukunyonywa.

¹⁶ Ukasendapo amenda ghako ghamo nukulabannya ubuzilo ubwapamwanya ubwa kwiputilapo ivifwani, papo ukendelela nu bwamalaya bwako. Ivintu vinivi vitakabombiwepo nalumo pamo ukubonekapo.

¹⁷ Ukasenda sona ivyakwibonesekezya akiza vivyo nkakupa ivya golide nu siliva, nukuyanizizya ivifwani ivyanavuli vivyo ukubomba navyo ubwamalaya.

¹⁸ Ukasenda amenda ghako aghakulabiwa nukuvivwika ivifwani vyako, sona nukwiyipa amafuta ghane nutwakununkila pantazi papabo.

¹⁹ Sona ni chakulya chane chicho nkakupa, ubusu ubutinye, na mafuta agha misyunguti nu buchi ukuti ulye, ukiyipa pakuba twakununkila pamaso papabo. Izi zyo zizyo zikabombiwa, u Mwene Uwamaka Ghosi anena.

²⁰ “ ‘Ukasenda abana bako abalumendo na balindu babo ukampapila nukwiyipa pakuba chakulya icha vifwani. Nkimba ubwamalaya bwako butakakukwana?

²¹ Ukabaghogha abana bane nukwiyipa pakuba chakwiyipa ichakocha ku vifwani.

²² Po mubunyazu bwako bosi nu bwamalaya bwako utakaghakumbuka amasiku ghako agha kubulumendo, bo uli nkule umusita kuvwala po ukughalaghata mwibanda lyako.’ ”

Ubumi ubwa Yelusalemu pakuba we malaya

²³ U Mwene akambuzya akati, “U Mwene Uwamaka Ghosi akuti, ‘Wee Yelusalemu, chighune! Chighune kukwako! Pachifukwa icha konjelezya ububibi pabubibi,

²⁴ na pankomano izya misebo uzengitepo ubuzilo ubwapamwanya ubwa kwiputilapo ivifwani, ukuti momumo ubombelayemo ubwamalaya bwako.

²⁵ Pa musebo ghosi ukazengapo ubuzilo ubwapamwanya ubwa kwiputilapo nukukusamula ukuboneka akiza kwako kuwesi yuyo akudumusannya nukubomba nawe ubwamalaya bwako.

²⁶ Ukabomba ubwamalaya naba Ijiputi, abapalamani bako abavinyonywa po ukankalalizya pachifukwa ukabalizya ubwamalaya bwako.

²⁷ “ ‘Po nkalanjizya amaka ghane papako nu kwefyako ichigaba chimo icha chisu chicho nkakupa, sona nkwiza pakukubika munyobe izya balwani bako, aba Filisiti babo isoni zikabalema pachifukwa icha nkalo yako imbibi.

²⁸ Ukabomba ubwamalaya naba Asiliya, pachifukwa ichakuti utakikutiziwa, naloli ukabomba nabo loli pope bulo utakikutiziwa.

²⁹ Ukabalizya ubwamalaya bwako naba muchisu icha Babiloni, ichisu icha baghulizi, loli pope bulo mutakikutiziwa.

³⁰ “ ‘U Mwene Uwamaka Ghosi akuti: Umoyo wako mudedebazu nkani, wabomba zyosi zinizi ngati mukolo umalaya yuyo ate ni soni nazimozimo.

³¹ Bo wazenga ubuzilo ubwakwiputilapo ubwapamwanya ivifwani posi na posi pankomano izya misebo, utakaba ngati mukolo umalaya, pakuti ukaghabenga amalipilo.

³² “ ‘Wee muchi umalaya! Ukubalonda abayeni mubuzilo ubwa mulume uwako nu wako!

³³ Abanavuli bakubalipilagha abakolo abamalaya indalama, loli awe ukuvipa ivighane vyako ivyabupi. Ukabapa ukuti bizaye ukwanda inkuto ni nkuto, umwakuti ubombaye nabo ubwamalaya.

³⁴ Po mu bwamalaya bwako ukususannya na banji. Ulekanite nabo nkani pakuti ukubapa amalipilo, loli ghatalipo naghamoghamo amalipilo ghagho ghakapeghiwa kukwako.’ ”

Ubulongi ubwa Chala pa Yelusalemu

³⁵ U Mwene akambuzya akati, “Mubuzye u Yelusalemu ukuti, ‘Polelo, awe we malaya, ivwa amazyu agha Mwene!

³⁶ U Mwene Uwamaka Ghosi akuti: Pachifukwa ichakuti ukatagha ubukabi bwako nukuyilanjizya inkule yako kuvighane vyako, pachifukwa icha vifwani vyako ivyamwiko, sona na pachifukwa icha libanda ilya bana bako lilyo ukuvipa ivifwani vyako,

³⁷ po nkwiza pakubabungannya abaghaniwa bako bosi, babo ukabomba nabo ivibibi, babo ukabaghana sona na babo ukababenga. Nkwiza pakubabungannya ukwanda kunkuto zyosi, nkwiza pakukuvula pamaka pamaso papabo, po bakwiza pakwennya inkule yako.

³⁸ Nkwiza pakukufunda pachifukwa icha bwamalaya nicha kukupula ibanda, po nkwiza pakutanizya pakukupula ibanda pachifukwa icha bukali bwane sona na kabini kane.

³⁹ Po nkwiza pakukubika munyobe izya baghaniwa bako, sona bakwiza pakubunangannya ubuzilo bwako ubwapamwanya ubwakwiputilapo ivifwani. Bakwiza pakukuvula pamaka amenda ghako nukusenda ivyakwibonesekezya vyako akiza nukukuleka nkule.

⁴⁰ “ ‘Bakwiza ni chilundilo icha bantu ukuti bakusumbe na mabwe, nukukudumula muvipuza naba panga babo.

⁴¹ Bakwiza pakocha inyumba zyako nukukufundila pamaso pabakolo abinji. Nkwiza pakumazya ubwamalaya bwinyu sona mutakwiza pakuvilipila ivighane vyinyu.

⁴² Po ubukali bwane papinyu bukwiza pakutozoka sona ubuzuba bwane bukwiza pakumala, nkwiza pakupuma bulo, ntakwiza pakukalalapo sona.

⁴³ “ ‘Pachifukwa ichakuti utakaghakumbuka amasiku agha kubulumendo bwako bosi, loli ukankalalizya na vyosi vinivi, naloli nkwiza pakutanizya pambibi zyosi zizyo wabomba, u Mwene Uwamaka Ghosi anena. Nkimba utakonjelezyapo ubwamalaya pavyamwiko vyosi ivinji?’ ”

U Yelusalemu akuyaniziwa nu Samaliya nu Sodomu

⁴⁴ U Mwene akambuzya akati, “Mubuzye u Yelusalemu ukuti, ‘Umuntu wesi yuyo akunena ivyili akwiza pakunena ukuti, “Mumo abeleye unyina momumo wepe u mwana wache umulindu abeleye.”

⁴⁵ Awe we mwana wache umulindu uwanaloli uwa nyoko, yuyo akamusula umulume wache na bana bache, sona we wamwinyu umulindu uwanaloli, pa bawamwinyu bako, babo bakabasula abalume babo na bana babo. Unyoko akaba mu Hiti sona ughuso akaba mu Amoli.

⁴⁶ “ ‘Umukulu wako umulindu akaba mu Samaliya, yuyo akikalagha kumitu kukwako na bana bache abalindu. Yuyo akikalagha kuntende na bana bache abalindu, akaba we Sodomu.

⁴⁷ Pope bulo utakakonka inkalo zyabo, nukubomba ivyamwiko, loli pakabalilo akapimpa bulo ukaba mubibi nkani ukubachila abene.

⁴⁸ “ ‘Naloli ane ne Mwene Uwamaka Ghosi umumi nkulapa ukuti: Umuyemba wako u Sodomu na bana bache abalindu batabombitepo zizyo awe poka na bana bako abalindu mwabomba.

⁴⁹ Iyi yikaba mbibi iya muyemba wako u Sodomu, umwene na bana bache bakwituvya pachifukwa icha vyakulya ivyinji, bo abapina na bakusobelwa bakuyimba.

⁵⁰ Bakaba bakwikwezya nukubomba ivyamwiko pamaso papane. Polelo nkabanangannya ngati mumo wazyenezya.

⁵¹ “ ‘Wepe u Samaliya atakabombapo uhafu uwa mbibi zizyo wabomba. Wabomba ivyamwiko ukubachila abene nukubapela abawamwinyu babo pakuba bagholosu ukuchila awe ni mbibi zizyo wabomba.

⁵² Isoni zikwiza pakukulema pakuti ubulongi bwako bwabapela abawamwinyu bako pakuba bagholosu. Pachifukwa ichakuti imbibi zyako zikaba nyazu nkani ukuchila izyabo, bakuboneka bagholosu ukukuchila awe. Polelo ukoziwanje isoni sona usamuliwanje, pakuti wabapela abawamwinyu bako pakuba bagholosu.’ ”

U Sodomu nu Samaliya bakwiza pakunyokelamo sona

⁵³ U Mwene akambuzya akati, “Mubuzye u Yelusalemu ukuti, ‘Pope bulo nkwiza pakunyosezyamo ubwiza ubwa Sodomu na bana bache abalindu, sona nu bwiza ubwa Samaliya na bana bache abalindu, po nkwiza pakunyosezyamo ubwiza bwako poka nu bwabo,

⁵⁴ umwakuti isoni zikuleme nukusamuliwa pavyosi vivyo wabomba, ukuti ubasangalusye.

⁵⁵ Sona abawamwinyu bako, u Sodomu na bana bache abalindu nu Samaliya na bana bache abalindu bakwiza pakunyokela mukabele kako bakabamo pakwanda, po awe na bana bako abalindu mukwiza pa kunyokela mukabele kinyu aka kwanda.

⁵⁶ Utakamutambulapo uwamwinyu wako u Sodomu pakabalilo akakwituvya kwako,

⁵⁷ bo ububibi bwako buchili butavumbuliwe. Loli ilelo wipela bulo pakuba chintu ichakusamuliwa naba muchisu icha Edomu nabapalamani bache bosi, sona naba muchisu icha ba Filisiti babo bakazenga umwakukuzyungulila bakukusamula.

⁵⁸ Ukwiza pakufundiwa pachifukwa icha nkalo yako imbibi sona iya mwiko, u Mwene anena.’ ”

Ulufingo ulwa bwila na bwila

⁵⁹ U Mwene akambuzya akati, “Mubuzye u Yelusalemu ukuti, ‘U Mwene Uwamaka Ghosi akuti: Nkwiza pakukubombela zizyo zikubaghiye pachifukwa ichakuti wachisula ichilapo chane pakunangannya ulufingo lwane.

⁶⁰ Loli pope bulo nkwiza pakukumbuka ulufingo lulo nkafingana nawe mumasiku agha bulumendo bwako, po nkwiza pakwikazya ulufingo lwane ulwa bwila na bwila.

⁶¹ Po ukwiza pakukumbuka izila zyako nukukoziwa isoni pakubapokela abawamwinyu bako, bosi babo bo basongo kukwako sona babo banandi kukwako. Nkwiza pakukupa pakuba bana bako abalindu, loli chite chifukwa icha lufingo lwane, lulo nkafingana nawe.

⁶² Po nkwiza pakwikazya ulufingo lwane nawe, sona mukwiza pakumanya ukuti ane ne Mwene.

⁶³ Ukumbuke nukuba nisoni umwakuti utakighulaye sona umulomo wako, pachifukwa icha kusamuliwa kwako, bo nkukuhobokela zyosi zizyo wabomba, u Mwene Uwamaka Ghosi anena.’ ”