Ezekiyeli 14 - IBAYIBOLO 2024

U Chala akubasusya babo bakwiputa ivifwani

¹ Abasongo bamo aba mu Izilayeli bakiza kukwane nukwikala pantazi papane.

² Po u Mwene akambuzya akati,

³ “Wee mwana uwa muntu, abantu aba babika amoyo ghabo pavifwani nukubika ichipunulo ichibibi pantazi papabo. Nkimba bakwinong'ona ukuti nkwiza pakubamula?

⁴ Polelo ubabuzye ukuti, ‘U Mwene Uwamaka Ghosi akuti: Umu Izilayeli wesi yuyo abika umoyo wache pavifwani, nukubika ichipunulo ichibibi pantazi papache, pisinda pache akubuka kumulaghuzi, ane ne Mwene nkwiza pakumwamula nemwene pachifukwa icha bwinji ubwa vifwani vyache.

⁵ Nkwiza pakubomba bunubu umwakuti inganyosye amoyo agha bantu aba Izilayeli, babo banchimbiye pachifukwa icha kwiputa ivifwani vyabo.’

⁶ “Polelo ubabuzye aba Izilayeli ukuti, ‘U Mwene Uwamaka Ghosi akuti: Pinduka! Vileghuke ivifwani vyinyu nukubuleka ubunyazu bosi!

⁷ “ ‘Nanti umu Izilayeli wesi, pamo umuyeni yuyo akwikala mu Izilayeli isabuye mwene kukwane nukubika umoyo wache pavifwani sona ni chipunulo pantazi papache nukubuka kumulaghuzi pakulalusya izya, ane ne Mwene nkwiza pakumwamula nemwene.

⁸ Nkwiza pakulwana nu muntu yunuyo nukumupela pakuba chifwanikizyo chabo. Nkwiza pakubefyamo pakasi pabantu bane. Po mukwiza pakumanya ukuti ane ne Mwene.

⁹ “ ‘Sona nanti umulaghuzi azimbuliwa ukuti alaghule zimo, ane ne Mwene nene namuzimbula umulaghuzi yulayula, po nkwiza pakulwana nawe nukumughoghela pakasi pabantu bane aba Izilayeli.

¹⁰ Bakwiza pakupokela ulufundo lwabo, ulufundo ulwa mulaghuzi nulwa yuyo akwiza pakulalusyako vikwiza pakuyana bulo.

¹¹ Po abantu aba mu Izilayeli batakwiza pakwepako kukwane pamo ukwinyazya bene ni mbibi zyabo. Bakwiza pakuba bantu bane, sona nane nkwiza pakuba ne Chala wabo, u Mwene Uwamaka Ghosi anena.’ ”

U Nowa nu Daniyeli, sona nu Yobu

¹² U Mwene akambuzya akati,

¹³ “Wee mwana uwa muntu, nanti ichisu chambombela imbibi sona chite chisubiliwa, po nkwiza pakubafunda nukunangannya ivyakulya, abantu poka ni vinyamana bakwiza pakughoghiwa nizala.

¹⁴ Napapo abantu batatu bala, u Nowa, u Daniyeli nu Yobu, bakikalagha mulamula, ngali bakapoka ubumi bwabo bwene nu bugholosu bwabo, u Mwene Uwamaka Ghosi anena.

¹⁵ “Nanti ningavituma ivinyamana pakubaghogha abantu, nukuchipela ichisu pakuba chisami umwakuti patakabepo nayumo uwakudumusannya mulamula, pachifukwa icha vinyamana,

¹⁶ napapo abantu batatu bala bangaba mulamula, nkulapila mwitabwa ilya Mwene Uwamaka Ghosi, ane ne Chala umumi ukuti batangabapoka abana babo abalumendo pamo abalindu. Loli ngali babupokite ubumi bwabo bwene, sona ichisu ngali chipelite pakuba chisami.

¹⁷ “Pamo nanti ni ngiza nu bwite muchisu chila nukuti, ‘Leka ubwite busate ichisu chosi,’ nukubaghoghamo abantu ni vinyamana,

¹⁸ napapo abantu batatu bala bakikalagha mulamula, naloli nkulapila mwa Mwene Uwamaka Ghosi umumi ukuti, ‘Pope ngali batabapokite abana babo abalumendo nabalindu.’ Ngali babupokite ubumi bwabo bwene.

¹⁹ “Pamo nanti natumamo ichiwaya muchisu chila nukupungulila ubukali bwane pachisu ni banda, nukughogha abantu bache ni vitekwa vyabo,

²⁰ napapo bakikalagha mulamula abantu batatu bala, u Nowa nu Daniyeli sona nu Yobu naloli nkulapila mwa Mwene Uwamaka Ghosi umumi, ngali batakabapoka abana babo abalumendo pamo abalindu. Ngali bakipoka bene pachifukwa icha bugholosu bwabo.

²¹ “U Mwene Uwamaka Ghosi akuti: Nkimba zikwiza pakuba bulibuli nanti nkutuma ubulongi bwane folo ubwakoghofya pa Yelusalemu nu bwite nizala ni vinyamana sona ni chiwaya pakubaghogha abantu ni vitekwa vyabo?

²² Napapo bangabapo bamo abakupona batakwiza pakubalongozya abana babo abalumendo na balindu, nanti abantu aba bakwiza kukwako, sona ukwennya inkalo yabo ni mbombo zyabo, ukwiza pakusangalusiwa pachifukwa icha ntamyo zizyo na muwisizya u Yelusalemu sona nintamyo zyosi impalapala zizyo imbombite mulamula.

²³ Ukwiza pakusangalusiwa nanti wennya inkalo yabo ni mbombo zyabo, po mukwiza pakumanya ukuti intabombitepo nachimochimo awe mukaya akakulu nkani bo pate ichifukwa ichenecho.” U Mwene Uwamaka Ghosi anena.