Ezekiyeli 13 - IBAYIBOLO 2024

Amazyu aghakubasusya abalaghuzi abanavuli abamyasi

¹ U Mwene akambuzya akati,

² “Wee mwana uwa muntu, laghula umwakubasusya abalaghuzi aba mu Izilayeli babo ilelo bakulaghula. Ubabuzye babo bakulaghula ukuyana ni nyinong'ono zyabo ukuti, ‘Bivwe amazyu agha Mwene.’ ”

³ U Mwene Uwamaka Ghosi akuti, “Chighune kubalaghuzi abapunganu, babo bakukonka inyinong'ono zyabo napapo batavyenizyepo ivisetuka navimovimo!

⁴ Wee Izilayeli, abalaghuzi binyu bali ngati bo bakabila, babo bakwikala muvisami.

⁵ Abene batabukiteko pakubuyannya ubuzilo bubo bukamongoka ubwa ba Izilayeli ukuti baponelemo, umwakuti bwime nkani pisiku ilya bwite ilya Mwene.

⁶ Ivisetuka vyabo vyabumyasi sona bakulaghula ivyabumyasi bakuti, ‘U Mwene akuti,’ loli u Mwene atabatumitepo, sona bakusubila ukuti amazyu ghabo ghakwaniliziwe.

⁷ Nkimba mutavyenizyepo ivisetuka ivyabumyasi sona nukulaghula ukwabumyasi bo mukuti, ‘U Mwene anena,’ napapo intanenitepo?

⁸ “Polelo u Mwene Uwamaka Ghosi akuti: Pachifukwa ichakuti mwanena amazyu agha bumyasi, sona nukuti ivisetuka vyinyu vyabumyasi, po nkubasusya u Mwene Uwamaka Ghosi anena.

⁹ Nkwiza pakabafunda abalaghuzi babo bakuvyennya ivisetuka ivyabumyasi sona bakulaghula ivyabumyasi. Batakwiza pakubangapo pankomano izya bantu bane pamo ukusimbiwa mumabuku agha ba Izilayeli, pamo ukwinjila ichisu icha Izilayeli. Po mukwiza pakumanya ukuti ane ne Mwene Uwamaka Ghosi.

¹⁰ “Pachifukwa ichakuti bakusobezya abantu bane, nukunena ukuti, ‘Umutende,’ napapo pate umutende bali ngati bantu babo bazenga ilinga, po abene bakwiza pakusingula nibanya,

¹¹ polelo ubabuzye abantu babo bakulisingula nibanya ukuti likwiza pakumongoka. Ivula iyamabwe niya mpepo iyamaka yikwiza pakutima.

¹² Bo ilinga lyamongoka, nkimba abantu batakwiza pakulalusya ukuti, ‘Nkimba lili ko kwiyi ibanya lilyo mukasingulila?’

¹³ “Polelo u Mwene Uwamaka Ghosi akuti: Mukukalala kwane nkwiza pakutuma impepo iya maka ni vula iya mabwe pakulimongola ilinga lila.

¹⁴ Nkwiza pakulimongola ilinga lilyo mwalisingula nibanya sona likwiza pakumongoka mupaka pa lwalo lwache umwakuti lube pabuzelu. Nanti lwamongoka, namwe bulo mukwiza pakunanganikila mulamula, sona mukwiza pakumanya ukuti ane ne Mwene.

¹⁵ Po nkwiza pakutanizya ubukali bwane pilinga linili napa babo bakalisingula nibanya. Nkwiza pakubabuzya ukuti, ilinga nalimo poka na bantu babo bakalisingula nibanya,

¹⁶ abalaghuzi banaba mu Izilayeli babo bakalaghula mu Yelusalemu nukumwenezya ivisetuka ivya mutende napapo umutende naghumo.” U Mwene Uwamaka Ghosi anena.

Amazyu aghakubasusya abalaghuzi abakolo

¹⁷ U Mwene akuti, “Ilelo wee mwana uwa muntu, ennya icheni chako ku bakolo aba mu Izilayeli, babo bakulaghula ivya mumoyo ghabo.

¹⁸ Ulaghule uti, ‘U Mwene Uwamaka Ghosi akuti: Chighune kubakolo babo bakusona inchilisi nukuyibika panyobe sona umuntu wesi yuyo akuyannya amenda agha kwivwinka kumitu iya bantu umwakuti abateghe abantu. Nkimba ukwiza pakubutegha ubumi ubwa bantu bane, bo awe ukubupoka ubumi bwako?

¹⁹ Mwankozya isoni pakasi pabantu bane pachifukwa ichakupokela amapemba amanandi bulo nu tumenyu utwa chibama. Mwabazimbula abantu bane, babo bakuteghelezya ubumyasi, mwabaghogha abantu babo batabaghiye pakufwa nukubaleka babo batabaghiye pakuba bumi.

²⁰ “ ‘Polelo u Mwene Uwamaka Ghosi akuti: Intakuzilonda inchilisi zyinyu zyizyo mubateghite abantu bane ngati viyuni sona nkwiza pakuzizepula inchilisi panyobe zyinyu, nkwiza pakubasatula abantu bane babo mubateghite ngati viyuni.

²¹ Nkwiza pakuzepula ivyakuvwinka vyinyu kumutu nukubapoka abantu bane munyobe zyinyu. Batakwiza pakuba munyobe zyinyu sona mutakwiza pakuba namaka aghakubalemela. Po mukwiza pakumanya ukuti ane ne Mwene.

²² Pachifukwa icha bumyasi bwinyu mwabawisya amaka abantu bane abagholosu napapo ane intakulonda ukubapelela ichitima awe, loli mwabakazya ababibi ukuti batakazileke izila zyabo imbibi, po pakubomba bunubu bakubupoka ubumi bwabo.

²³ Polelo mutakwiza pakwennya ivisetuka ivyabumyasi pamo ukulaghula. Nkwiza pakubapoka abantu bane munyobe zyinyu. Po mukwiza pakumanya ukuti ane ne Mwene.’ ”