Ezekiyeli 12 - IBAYIBOLO 2024

Umulaghuzi ngati muzya

¹ U Mwene akambuzya akati,

² “Wee mwana uwa muntu, ukwikala pakasi pabantu abasambuke. Bali namaso aghakwenezya loli batakwennya namakutu aghakwivwila loli batakwivwa, pakuti bantu abasambuke.

³ “Polelo, wee mwana uwa muntu, nyamula ukatundu wako ngati muntu yuyo akubuka kubuzya po ubuke kubuzya pamusanya bo bali pakukwennya, ubuke ukufuma kubuzilo bubo uliko nukubuka kubuzilo ubunji. Lumo bangakwivwa, napapo bantu basambuke.

⁴ Pakabalilo akapamusanya, bo bakukwennya ufumye ukatundu wako pakuba ngati we katundu wayuyo akubuka kubuzya. Po pachamabwila, bo bakukwennya ubuke ngati bantu babo bakubuka kubuzya.

⁵ Udobole palubumba bo bakukwennya, po ufumile sona palapala.

⁶ Umubaghale bo bakukwennya nukubuka nawe muchisi. Uchivwinke icheni chako umwakuti utakachennyanje ichisu, pakuti nakupela awe pakuba chimanyilo icha Izilayeli.”

⁷ Po nkabomba ngati mumo nkalamuliliwa. Nkefya ukatundu wane pamusanya, ngati we katundu uwa muntu yuyo akubuka kubuzya. Po pachamabwila nkadobola palubumba ni nyobe zyane. Nkabaghala ukatundu wane muchisi bo bakwennya.

⁸ Pandabindabi u Mwene akambuzya akati,

⁹ “Wee mwana uwa muntu, nkimba te bo ba Izilayeli babo bakasambuka, bakukulalusya ukuti, ‘Nkimba ukubomba choni?’

¹⁰ “Ubamule ukuti, u Mwene Uwamaka Ghosi akuti amazyu agha ghakumupalamasya u mwene uwamu Yelusalemu na bosi aba Izilayeli babo bali mulamula.

¹¹ Ubabuzye ukuti, ‘Ane ne chimanyilo chinyu.’ Ngati mumo nabombela, po zikwiza pakubombiwa kukwabo. Bakwiza pakubuka mubuzya ngati bakayidi.

¹² U mwene yuyo ali pakasi papabo akwiza pakubaghala ivintu vyache nakachisi nukubuka, sona palubumba pakwiza pakudoboliwa ukuti umwene endayepo. Akwiza pakuvwinka icheni chache umwakuti atakachennyanje ichisu.

¹³ Nkwiza pakumukuzulila ichilepa chane, sona akwiza pakulemiwa muchipingo chane, nkwiza nawe ku Babiloni, kuchisu icha bakaladeya, loli atakwiza pakuchennya, po akwiza pakufwila kulakula.

¹⁴ Bosi babo bamuzyunguliye pakumwavwa, sona nutubukatila tosi utwa basilikali nkwiza pakubachimbizya nupanga wane.

¹⁵ “Bakwiza pakumanya ukuti ane ne Mwene, bo nkubalesannya pakasi pa inko nukubanyampannya muvyisu vyosi.

¹⁶ Loli nkwiza pakubaleka bamo bumi kubwite, kuzala nakuchiwaya, umwakuti ku inko zizyo bakubukako bitikizyanje inyiho zyabo imbibi. Po bakwiza pakumanya ukuti ane ne Mwene.”

Ichimanyilo icha kutetema ukwa mulaghuzi

¹⁷ Pisinda pache u Mwene akambuzya akati,

¹⁸ “Wee mwana uwa muntu, ulyanje ivyakulya vyako nukutetema, sona ung'welaye amizi nukunyila.

¹⁹ Ubabuzye abantu aba muchisu chila, izi zyo zizyo u Mwene Uwamaka Ghosi akunena nizya bantu babo bakwikala mu Yelusalemu muchisu icha Izilayeli ukuti bakwiza pakulya ichakulya nubogha nukung'wela amizi bo bakutetema, ichisu chabo chikwiza pakufyuliwa navyosi vivyo vili mumo pachifukwa icha vyongo ivya bantu babo bakwikala mulamula.

²⁰ Po utwaya utukulu tuto mukwikalamo abantu tukwiza pakuba visami sona ivyisu vikwiza pakunanganika. Po mukwiza pakumanya ukuti ane ne Mwene.”

Ichili ichiza na mazyu ghagho te miza

²¹ U Mwene akambuzya akati,

²² “Wee mwana uwa muntu, nkimba choni chicho muli ichili ichi muchisu icha Izilayeli pakuti, ‘Amasiku ghakubuka sona ivisetuka vyosi vikubanga vyabulo’?

²³ Po ubabuzye ukuti, ‘U Mwene Uwamaka Ghosi akuti: Nkwiza pakumazya ichili ichi, batakwiza pakuchinena sona mu Izilayeli.’ Ubabuzye ukuti, ‘Amasiku ghapalamiye po ichisetuka chosi chikwiza pakukwanilisiwa.

²⁴ Pakuti vitakwiza pakubako ivisetuka ivyabumyasi pamo ubulaghuzi ubwakubasobezya abantu aba mu Izilayeli.

²⁵ Loli ane ne Mwene nkwiza pakunena zizyo nkulonda, sona zikwiza pakukwanilisiwa kusita kukaba. Pakuti mumasiku ghinyu, amwe mwe bantu abakusambuka, nkwiza pakuzikwanilisya zyosi zizyo nanena, u Mwene Uwamaka Ghosi anena.’ ”

²⁶ U Mwene akambuzya akati,

²⁷ “Wee mwana uwa muntu, aba Izilayeli bakwinong'ona ukuti, ‘Ivisetuka nubulaghuzi vivyo bakuvyennya vikunena nizya vintu ivyamuntazi nkani, sona akalaghula nivya muntazi nkani.’

²⁸ “Polelo ubabuzye ukuti, u Mwene Uwamaka Ghosi akuti, ‘Te mazyu ghane ghagho ghakwiza pakukabapo lumo, zyosi zizyo nkunena zikwiza pakukwanilisiwa, u Mwene Uwamaka Ghosi anena.’ ”