Ezekiyeli 11 - IBAYIBOLO 2024

U Yelusalemu akulongiwa

¹ Po Umuzimu uwa Chala akanyamulila mumwanya nukumbika pamulyango uwa Nyumba iya Mwene yiyo yenizye kubufumilo bwizuba. Pabwinjililo ubwa mulyango pala, pakaba abantu 25, pakasi papabo nkennya u Yazaniya umwana uwa Azuli nu Pelatiya umwana uwa Benaya, babo bakaba balongozi aba bantu.

² U Mwene akambuzya akati, “Wee mwana uwa muntu, aba bo bantu babo bakubatika pakukubombela ububibi nukukapa akaya akakulu nkani ubulongozi ububibi.

³ Bakuti, ‘Nkimba akabalilo akakuzengela inyumba kate papipi?’ Akaya aka, sonta iya kupiyilamo, sona aswe twe nyama.

⁴ Polelo ubalaghulile nizya kubasusya, wee mwana uwa muntu, laghula.”

⁵ Po Umuzimu uwa Mwene akiza papane nukumbuzya ukuti, “Izi zyo zizyo u Mwene akunena kuba Izilayeli: Inzimenye zizyo zili munyinong'ono zyinyu.

⁶ Mwabaghogha abantu abinji mukaya akakulu nkani aka nukuyizuzya imisebo yache nimivimba.

⁷ “Polelo u Mwene Uwamaka Ghosi akuti: Imivimba yiyo mwayisumbila mumisebo yo nyama sona akaya aka yo sonta, loli nkwiza pakuyefyamo.

⁸ Mukunyila ubwite, loli nkwiza pakubawisizya ubwite, u Mwene Uwamaka Ghosi anena.

⁹ Nkwiza pakubefyamo mukaya akakulu nkani nukubabika munyobe izya bayeni pakubapa lufundo papinyu.

¹⁰ Mukwiza pakufwila kubwite, sona nkwiza pakubalonga mupaka mufike kumpaka izya chisu icha Izilayeli. Po mukwiza pakumanya pakuti ane ne Mwene.

¹¹ Akaya akakulu nkani aka katakwiza pakuba sonta yinyu awe, pamo amwe pakuba mwe nyama pakuvighililiwa ni sonta, nkwiza pakubalonga mupaka mufike kumpaka iya chisu icha Izilayeli.

¹² Po mukwiza pakumanya ukuti ane ne Mwene, pakuti mutakukonka amalamulo ghane pamo pakuzisunga indaghilo zyane, loli mwabomba ukuyana ni ndaghilo izya inko zizyo zibazyunguliye.”

¹³ Bo nkulaghula, u Pelatiya umwana uwa Benaya akafwa. Po nkakupama icheni chane pasi nukukolomoka nkani ukuti, “Wee Mwene Uwamaka Ghosi, nkimba ukwiza pakubananganizizya zila abakusyalako aba Izilayeli?”

Ulufingo ulwa Chala ku bazya

¹⁴ U Mwene akambuzya akati,

¹⁵ “Wee mwana uwa muntu, abantu aba mu Yelusalemu bakunena nizya awe na bakamu binyu sona naba Izilayeli bosi babo bali mubuzya. Bakunena ukuti, ‘Abantu banaba bali kubutali nkani nu Mwene, ichisu ichi chikapeghiwa kukwitu ukuti chibanje mpyana yitu.’

¹⁶ “Polelo ubabuzye ukuti u Mwene Uwamaka Ghosi akuti, ‘Nene nkabatuma pakwikala ku inko izya kubutali nukubanyampanikizya kuvyisu ivinji ivya kubutali. Loli pakabalilo aka nkwiza pakuba ne buzilo ubuzelu muvyisu mumo babukite.’

¹⁷ “Polelo ubabuzye ukuti u Mwene Uwamaka Ghosi akuti, ‘Nkwiza pakubabungannya ukufuma ku inko nukubanyosezya muvyisu mumo mukanyampana, po nkwiza pakubanyosezya sona ichisu icha Izilayeli.’

¹⁸ “Bo banyokela babaghiye pakwefyamo ubunyazu bosi sona ni vifwani ivyamwiko.

¹⁹ Nkwiza pakubapa umoyo umupya ninyinong'ono impya nukwefyamo umoyo ghugho ghuli ngati libwe nukubapa umoyo uwa kwivwila.

²⁰ Po bakwiza pakusunga indaghilo zyane nukughivwila akiza amalamulo ghane. Bakwiza pakuba bantu bane sona nkwiza pakuba ne Chala wabo.

²¹ Loli abantu babo bighanite pakubomba ubunyazu sona nukwiputa ivifwani. Nkwiza pakubatanizya pachifukwa icha zizyo babomba, u Mwene Uwamaka Ghosi anena.”

Ubuchindamu ubwa Chala bwepamo mu Yelusalemu

²² Po abakelubi bala bakanda pakubuluka poka ni vingelengele vivyo vikaba mulubazu lwabo. Ubuchindamu ubwa Chala uwa Izilayeli bukaba papabo.

²³ Ubuchindamu ubwa Mwene bukepamo mukaya akakulu nkani kala nukubuka kwighamba ilya kubufumilo bwizuba.

²⁴ Umuzimu uwa Chala akanyamulila mumwanya nukunyosezya sona ku bantu babo bakaba mubuzya mu Babiloni muchisetuka chicho nkapeghiwa nu Muzimu uwa Chala. Po ichisetuka chicho nkachennya chila chikazyebeluka bulo pamaso papane,

²⁵ po nkababuzya abazya vyosi vivyo u Mwene akandanjizya.