Ezekiyeli 10 - IBAYIBOLO 2024

Ubuchindamu ubwa Mwene bwafumamo mu Nyumba iya Chala

¹ Nkatalankannya, nukwennya ichifwani icha chitengo icha bumwene ubwa safile pamwanya pamitu iya bakelubi.

² U Mwene akamubuzya yuyo akavwala umwenda umutonte akati, “Injila pakasi pavingelengele vivyo vikuzyungulila pasi pabakelubi. Izuzya amazimwa munyobe zyako ghagho ghakwaka umoto pakasi pabakelubi nukubanyampanizizya posi na posi mukaya akakulu nkani.” Nkamwennya bo akwinjila.

³ Abakelubi bala bakimilila kuntende ukwa Nyumba iya Chala, bo umuntu yula injila, ibingu likizula muchipinda icha mukasi.

⁴ Po ubuchindamu ubwa Mwene bukepapo pamwanya pabakelubi nukufika pamulyango uwa Nyumba iya Chala. Ibingu lila likizula mu Nyumba iya Chala yila, sona ulubinjilo lukizula nukulama ukwa buchindamu ubwa Mwene.

⁵ Ichongo icha vipapande ivya bakelubi chikivwika mupaka ku lubinjilo ulwa kuzi, ngati lizyu ilya Chala Uwamaka Ghosi bo akunena.

⁶ Bo u Mwene amulamula umuntu yuyo akavwala umwenda umutonte akati, “Senda umoto pakasi pavingelengele vivyo vizyunguliye pakasi pabakelubi,” umuntu yula akinjila nukwimilila kulubazu ulwa chingelengele.

⁷ Weka uwa bakelubi akagholosezya inyobe yache pamoto, ghugho ghukaba pakasi papabo. Akasendapo umoto, nukughubika munyobe izya muntu yuyo akavwala umwenda umutonte. Umuntu yula akaghusenda umoto ghula nukufuma kuzi.

⁸ Muntende muvipapande ivya bakelubi mukabonekagha ichintu chimo ngati nyobe izya muntu.

⁹ Nkatalankannya, nukwennya ivingelengele folo vikaba palubazu ulwa bakelubi. Vikabonekagha ngati libwe ilya mutengo.

¹⁰ Akabonekele aka vingelengele folo vila kakaba kakuyana bulo, sona vikinjililana ni lyamwabo.

¹¹ Bo bakwenda bakabukagha kulubazu losi ulwa mbazu folo sona batakaghalabukagha bo bakubuka. Loli kuko umutu wennya ko kuko bakabukagha.

¹² Amabili ghabo ghosi poka ni nyuma zyabo ni nyobe zyabo ni vipapande vyabo vikizula na maso ngati mumo vikabela ivingelengele folo vila.

¹³ Nkivwa ivingelengele vila vikwitiziwa ukuti, “Ivingelengele ivyakuzyungulila.”

¹⁴ Ukelubi weka akaba nivyeni folo, icheni choka chikaba cha kelubi, ichabubili chikaba ni cheni icha muntu, ichabutatu chikaba ni cheni icha nkalamu, ichafolo chikaba ni cheni icha lizwanga.

¹⁵ Po abakelubi bala bakakwela mumwanya. Ivi vikaba vipeliwa ivyabumi vivyo nkavyennya papipi nu lusoko ulwa Kebali.

¹⁶ Bo abakelubi bakwenda, ivingelengele mulubazu lwache vyope vikendagha, nanti abakelubi bakukuzula ivipapande vyabo pakwanda pakubuluka, ivingelengele vitakuba mulubazu lwache.

¹⁷ Bo abakelubi bimilila, vyope ivingelengele vikimililagha, sona nanti bakunyamuka, vyope ivingelengele vikunyamukilagha poka nabo, pachifukwa ichakuti umuzimu uwa vipeliwa ivyabumi vila ghukaba mulamula.

¹⁸ Po ubuchindamu ubwa Mwene bukepapo pamulyango uwa Nyumba iya Chala nukwimilila pamwanya pa bakelubi.

¹⁹ Bo nkwennya, abakelubi bala bakakuzula ivipapande vyabo nukubulukila mumwanya, bo babuka, ivingelengele vikabuka poka nabo. Bakimilila pamulyango uwakubufumilo bwizuba uwa Nyumba iya Mwene, sona ubuchindamu ubwa Chala uwa Izilayeli bukaba pamwanya papabo.

²⁰ Ivi vikaba vipeliwa ivyabumi vivyo nkavyennya pasi pa Chala uwa Izilayeli mulubazu ulwa lusoko ulwa Kebali, po nkazyaghannya ukuti bakaba bo bakelubi.

²¹ Ukelubi wesi akaba nivyeni folo, ni vipapande folo, kuntende kuvipapande vyabo kukabonekagha ngati nyobe izya muntu.

²² Ivyeni vyabo vikabonekagha ngati vivyo nkavyennya mulubazu ulwa lusoko ulwa Kebali. Wesi akendagha umwakugholokela kuntazi.