Esitele 9 - IBAYIBOLO 2024

Aba Yuda bakubaghogha abalwani babo

¹ Zizyo u mwene akalamula ukuti zibombiwe zikabaghila pakubombiwa pisiku ilya 13 mumwezi uwa 12, umwezi uwa Adala. Po pisiku lilalila abalwani aba ba Yuda bakasubila ukuti bakwiza pakubapota aba Yuda, loli ivintu vikanduka. Aba Yuda bo babo bakaba na maka nkani ukubachila abalwani babo nukubanangannya.

² Aba Yuda bakabungana mutwaya twabo utukulu nkani muvigaba vyosi vivyo u mwene u Ahaziwelo akalaghilagha pakulwa na bantu babo bakalondagha pakubanangannya. Patakabapo nayumoyumo umuntu uwakwiminkana nabo, pachifukwa ichakuti abantu aba inko izinji zyosi bakabanyilagha.

³ Po abantu abamanyikwe bosi muvigaba vilavila, na makambala agha mwene, na balaghili ba vigaba sona na bakwenelezya ivintu ivya mwene bakabavwa aba Yuda, pakuti bakamunyilagha nkani u Molodikayi.

⁴ U Molodikayi akaba muntu umanyikwe nkani munyumba iya bumwene, umwakuti imbili yache yikasata muvigaba vyosi sona akaba muntu uwamaka nkani.

⁵ Aba Yuda bakabaghogha abalwani babo bosi, nukubazimizya bosi sona bakababombela abalwani babo ukuyana namumo bakalondelagha.

⁶ Aba Yuda bakabaghogha nukubanangannya abantu 500 mukaya akakulu nkani aka Susa.

⁷ Bakamughogha sona u Palishandata nu Dalifoni nu Asipata,

⁸ nu Polata nu Adaliya nu Alidata,

⁹ nu Palimashita nu Alisayi nu Alidayi sona nu Vayizata,

¹⁰ babo bakaba bana 10 aba Hamani, umwana uwa Hamedata, yuyo akaba mulwani uwa ba Yuda. Loli batakafyula ichintu nachimochimo.

¹¹ U mwene akabuziwa ubwinji ubwa bantu bosi babo bakaghoghiwa mukaya akakulu nkani aka Susa pisiku lilalila.

¹² Po u mwene akamubuzya u mwene umukolo u Esitele akati, “Aba Yuda babaghogha nukubanangannya abantu 500 poka na bana abalumendo 10 aba Hamani mukaya akakulu nkani aka Susa. Nkimba babombite choni muvigaba ivinji vyosi vivyo u mwene akulaghila? Po nkimba losi ulu ukulonda ichoni? Nena ukwiza pakuchipokela. Mbuzya chosi chicho ukulonda, ukwiza pakuchipokela.”

¹³ U Esitele akamula akati, “Wee mwene, nanti chingakuhobosya ubitikizye aba Yuda babo bakwikala mukaya akakulu nkani aka Susa ukuti ilelo, ni ndabi babombaye zizyo ukalamula sona babapayike pikwi abana abalumendo 10 aba Hamani bala.”

¹⁴ Po u mwene akalamula ukuti zinizi zibombiwe. Ululaghilo lukafumuziwa mukaya akakulu nkani aka Susa, po bakabapayika abana abalumendo 10 aba Hamani bala.

¹⁵ Pisiku ilya 14 mumwezi uwa Adala, aba Yuda aba mukaya akakulu nkani aka Susa bakabungana poka nukubaghogha abantu 300 mulamula, loli batakafyula ichintu nachimochimo.

¹⁶ Pakabalilo kalakala aba Yuda babo bakasyala muvigaba vivyo u mwene akalamulagha, bope bakabungana poka ukuti bipoke bene kubalwani babo. Po bakabaghogha abantu 75,000 loli batakafyula ichintu nachimochimo.

¹⁷ Zinizi zikabombiwa pisiku ilya 13 mumwezi uwa Adala, po bakatuzya pisiku ilya 14 sona bakaba nu lusekelo ulukulu nkani.

Ulusekelo ulwa Pulimu

¹⁸ Loli aba Yuda aba mukaya akakulu aka Susa bakabungana poka pisiku ilya 13 nilya 14 po bakatuzya pisiku ilya 15 sona bakaba nu lusekelo ulukulu nkani.

¹⁹ Ichi cho chifukwa aba Yuda babo bakwikala mutwaya bakuba nu lusekelo pisiku ilya 14 mumwezi uwa Adala sona pakuba lisiku ilyakugabana ivyabupi.

²⁰ U Molodikayi akavisimba ivintu vinivi mwibuku nukubatumila abakalata aba Yuda bosi aba muvigaba vivyo u mwene u Ahaziwelo akalaghilagha, babo bakikalagha papipi na kubutali bulo

²¹ ukuti babanje nu lusekelo umwaka nu mwaka pisiku ilya 14 nilya 15 mumwezi uwa Adala,

²² pachifukwa ichakuti kakaba kabalilo kanaka kako aba Yuda bakapona munyobe izya balwani babo sona pakuba mwezi ghugho ichitima chabo chikanduka pakuba ukusekela sona ukulila kwabo kukanduka pakuba ukuhoboka. Akabasimbila ukuti bakumbukaye amasiku ghanagha pakuba masiku agha lusekelo sona nukugabana ivyakulya nukubapa abapina ivyabupi.

²³ Po aba Yuda bakivwana pakuba nu lusekelo ulu umwaka nu mwaka ukuyana namumo u Molodikayi akabalamulila.

²⁴ Pakuti u Hamani umwana uwa Hamedata umu Agagi, yuyo akaba mulwani uwa ba Yuda bosi, akabatika nizya kubanangannya aba Yuda bosi pakupanga u pulimu kokuti amayele, umwakuti abazimizye nukubanangannya aba Yuda.

²⁵ Loli bo u mwene azyaghannya zizyo akalondagha pakubomba, akabika ululaghilo ulusimbe ulwakuti ichintu ichibibi chicho u Hamani akabatika pakubabombela aba Yuda chimuwile yuyo. Po u Hamani na bana bache bakapayikiwa pikwi.

²⁶ Ichi cho chifukwa amasiku ghalaghala ghakitiziwa ukuti Pulimu, lilyo likaba litabwa ilya Puli. Pachifukwa icha vintu vyosi vivyo akasimba mwakalata yula, sona ni vintu vivyo bakavyennya sona na vivyo vikabawila,

²⁷ aba Yuda bakabika ulwiho ulwakuti abene na baluko lwabo sona na bosi babo bakiza pakuba poka nabo babanje nu lusekelo pamasiku mabili ghanagha umwaka nu mwaka ukuyana namumo u Molodikayi akabalamulila.

²⁸ Chikadumuliwa ukuti aba Yuda bosi babo bakikalagha muvigaba vyosi sona na mutwaya tosi utukulu nkani baghakumbukilaye amasiku mabili ghanagha, sona nukuti babanje nu lusekelo mumasiku agha Pulimu agha. Patakabanjepo nayumoyumo umuntu uwakughanyazya amasiku aghanji pakasi pa baluko lwabo batakaghaluvyanje.

²⁹ Po u Esitele u mwene umukolo, umwana umulindu uwa Abihayili poka nu Molodikayi umu Yuda yula, bakasimba sona ukalata nukudindapo ni chidindo ichakusimikizya nizya kalata uwabubili yula, yuyo akunenagha nizya Pulimu.

³⁰ Abakalata bala bakatumiwa kuba Yuda bosi muvigaba 127, vivyo u mwene u Ahaziwelo akalaghilagha pakubalondela aba Yuda umutende nukufwasa,

³¹ nukubalamula aba Yuda na bana babo ukuti baghakumbukaye amasiku agha Pulimu pakabalilo kache, ukuyana namumo u Molodikayi nu mwene umukolo u Esitele bakabalamulila sona ukuyana namumo bakapinyila ululaghilo lwabo poka na baluko lwabo nizya kutuzya pakulya ni chililo.

³² Ululaghilo ulwa Esitele lo lulo lukasimikizyanga nizya lusekelo ulwa Pulimu sona lukasimbiwa mwibuku ilya mbili.